يعطيك العافية صاحب الموضوع
والله يرحم أبو يارا

راح أقولكم على حاجة سارت معانا في الشركة اللي كنت أشتغل فيها

الشركة خلال فترة عملي اللي هي سنتين ونص ، مرّت بـ 3 إدارات
الإدارة الأولى هي نفسها الإدارة الثالثة واللي مستمرة إلى قبل ما أترك الشركة ، مع تغيير في بعض الموظفين
أما الثانية هي اللي حكايتها حكاية مع السوبرفايزر الأجنبي !
جنسيته أريتري وديانته مسيحي ، وموظفة الـ HR كانت زيو بالزبط أريتريه ومسيحية
بس ما كانت مبينة شي ، حتى كلامها كان سعودي بحت وحسبتها سعودية وربي !
اللي سار إنو نحنا مكاتبنا البنات منفصلة عن الشباب .. يعني نقدر ناخذ راحتنا نشيل العبايات وكذا
لمن اتغيرت الإدارة وجا هالأريتري إيش سوا ؟؟
تخيلوا .. خلى الباب اللي يفصل بيننا وبين قسم الشباب مفتوح !
وقال لحد يقفله خلوه دايماً مفتوح
صرنا يومياً وطول مدة الدوام ، 8 ساعات وربي ونحنا قاعدين بالعبايات !!
واللي يقهر أكثر ، إنو يجي ويدخل علينا بلا إحم ولا دستور ولا حتى يتنحنح !
لأنو أحياناً لازم يدخل يتطمن على الشغل وكيف ماشي ولا إذا فيه مشكلة بالأجهزة
سار في مرة وحدة من البنات سارت لها مشكلة مع الإدارة ، وفصلها تعسفي
البنت قدعة وعجبتني .. راحت اشتكت أول شي لمكتب العمل
بس الغريبة إنو ما عملوا معاه شي
ولما عرف بكل قوة عين يقولها أصلاً كل اللي في مكتب العمل أصحابي !!
فراحت أشتكت عليه الجوازات والهيئة
وربي سحبوه قدامنا ، وسرنا نضحك عليه ههههه
وبعدها رجعت الإدارة القديمة .. ورجعت حرّيتنا أخيراً

فنصيحة للي يشتكوا من الأجانب وتعاملهم
روحوا اشتكوهم ، ولو إنو المسؤولين ما راح يعملوا شي
بس برؤوا ذمتكم وأشتكوا
وإذا ما عملوا معاكم اللازم ، خذو حقكم بيدكم زي ما سوت هذي القدعة