[align=center]
نرجع لمحور حديثنا

أختم جزئية ادارة الوقت واللي تكلمت عنها وأقول : أفضل معين ومساعد لك على تنظيم وقتك

المحافظة على الصلوات الخمس في أوقاتها مع الجماعة ومواظبتك عليها هو مفتاح النجاح في حياتك

والمرتبط بإدارة شؤونك ومنها ادارة المال وثقافة الاستهلاك

أشياء كثيرة نجهلها ومفردات كثيرة مو موجودة بقواميسنا مثل اقتصاد وادخار والصرف بحساب

ولو تسأل أبوك أو أخوك عمك أو خالك << كم دخل بحسابك طول فترة عملك الوظيفي

يقولك عشرات أو مئات الالاف او حتى ملايين << طيب وش مردودها عليك ؟ وش استفدت منها ؟

وش سويت بها << nothing << يعني بالعربي لاااااااااااااشيء

كم جمعت ؟ << ولا شي طيب شغلتها ؟ << يقولك هي وين أصلا

للأسف هذا هو كلام الأغلبية

على كلام واحد يقول اذا اردت وصفة لفقد الجماهير فقل أن الاغلبية غبية << فاصلة مالها علاقة بالموضوع

حتى اللي استثمر فلوسه لو تتبعته وجدت عنده خطأ في التطبيق اما انه يكون شغل بدائي عشوائي

والدخل مضروب يوم فيه وأيام مافي أو انه يحجر على نفسه وعلى عياله ويضيق عليهم والصرف بالقطارة

ان سأله الولد الخمسة والعشرة قاله ماعندي وفي بعض الاباء يقول دبر عمرك << يعني شلون يسرق

معيشهم ومعيش نفسه بجوع وسيارة قرمبع وبيت أثاثه من الحراج

ياخي اجلس بمجلس وشوف اغلب السوالف عن وش ؟ غلاء المعيشة ووغلاء المعيشة والتضخم وبركة الراتب

وانت لو تسأل واحد فيهم تتصدق كل شهر من راتبك قال لا << طيب شلون تنشد عن البركة في الراتب

لا تجلس مجالس اطلع كل يوم 25 وشوف طوابير السيارات عند الصرافات ولا طابور الفول عند القرموشي

لا الحين طالعين بحركة الساعة 3 الفجر تلقى الناس عند الصرافات خاصة اللي على الأهلي

ياخي صار أكثر الناس اذا شاف الضيف على عتبة بابه كنه شاف ملك الموت

واذا دق على واحد ينشد عن احواله قاله م الاخر على قول المصاروه يعني انجز وش عندك تبي سلف

طيب السؤال اللي يسدح نفسه .. ليه وصلنا لهذه المرحلة ؟

بالمختصر لأننا نستلم راتب ورى راتب بدون نستثمره وبدون نقسمه وبدون ندخر منه

واذا نزلنا السوق نبي نشتري كل شي واي شي

بدون ما نقسم ضروريات وحاجيات وكماليات << وهذا التقسيم ضروري

وبنده عربية ورى عربية وسوق الجوالات يشكي

وصار همنا الوحيد هذا مثل اللي عند فلان ونبي نصير مثل فلان

والأدهى والأمر وخاصة اللي تو متوظف يبي يكشخ بسيارة جديدة آيرون ولا كامري ولا كومارو

ويدخل نفسه بأقساط وديون وهو بعد ماوقف على رجوله

استلم الوظيفة من هنا وباقي ما استلم قرار التعيين وهذا يفكر بالسيارة والبيت والزوجة << لا ويبيها مدرسة بعد

على قولهم ماهكذا يا بني << خخخخخ

كل شي يجي حبة حبة مو بالسرعة هذا وحط ببالك ان بديت حياتك بالديون بتموت وانت ما سددت نصها

لأن دين يجر دين وبتستلم راتبك بدون ما تستفيد منه << واعتبر واتعض نت اللي سبقوك

نرجع للاستهلاك .. أستغرب من شغلة اللي يقضّي أشياء فوق طاقته وماهي ضمن احتياجاته

ليه أقول غريب لأن بعضهم ان سألته يقول ممكن يجي يوم وأحتاجه

صحيح اننا بعصر السرعة لكن مو معقول اننا نبي كل شي بسرعة وبأي وقت وبأي ثمن

حتى لو قطينا وجيهنا ومدينا يدنا للي يسوى واللي ما يسوى

والحديث يطول ويطول وتشعيباته كثيرة

لكن أتمنى وصلت الفكرة
[/align]