سجل معاك وحدة جداوية حضرية حجازية أصيلة بداية أحب اوضح نقطة انه كثير من الناس يخلطوا بين الحضري والمجنس الحضري اللي طول عمره يسكن في المدن مكة وجدة المدينة الخ المجنس اللي اصوله ترجع لخارج الجزيرة العربية القبيلي : معروفين القبائل وتلقى منهم حضر وبدو ..وريفيين البدو : سكان الصحراء والريفي : سكان القرى الساحلية اللي يعتمدوا على الصيد ووالتجارة وسكان القرى اللي يعتمدوا على الزراعة .. طيب بعد هذه المحاضرة نرجع لموضوعنا زي مانعرف كلنا جــــدة غيــــر عنصرية ما في الا في النادر و معروفين أصحابها .. كلنا أو أغلبنا نتزوج من بعض على اختلاف اصولنا لأننا نشوف نفسنا سعوديين مافي فرق بيننا وبحكم كوني من الأشراف وأجدادي معظمهم من سكان جدة ومكة (أهل البلد ) كما يطلق علينا...عاداتنا غير ثابتة ..وليس لها معايير محددة بل تتبلور على حسب المجتمع وطبقته وهي غير جامدة بل مرنة يعني المهور تختلف لكن الأغلب الأعم 30 وفي 25 وممكن أقل بعض الناس اللي أصولهم قبيلية مهورهم عالية وبعضهم لأ مو شرط وناس كثير مثلنا ماتشترط الذهب أهم شيء الشبكة وبس الأعمار وقت مايجي النصيب يعني مافي عمر محدد ولازم العريس يشوف العروسة ..حتى لو العريس ماطلب أبو العروسة يطلب منه ويقوله : لازم تشوفها حقك يا ولدي ... الشبكة أو الملكة تكون عادة على أهل العروسة ممكن تكون كبيرة وممكن صغيرة ويعملوها فين ما يحبوا حتى لو على السطوح العربية عادة تكون فيها الشبكة والعطور والبخور والعود البعض يجيب مكياج وجنيهات وعباية وفلوس وغيرها من الخرابيط ماعندنا شيء اسمه هدية للخالة والعمة يادوب العروسة واذا مرة مرة أمها بعض العرايس تحن على العريس وتهديه ساعة .. الفرح يكون في قاعة مرتبة مو شرط انها بالشيء الفلاني وبعض الناس لازم قاعة واااو ..وبعض العائلات المعروفة أوالغنية يكون خارج المملكة مصر ..اليونان ..تركيا ..مو قلت لكم جدة غير والفرح للرجال بعد العشاء وكثير يجيبوا مطربين ومزمار وعرضة حسب مرة شفت فيديو لفرح زميلتي وكانت هي والعريس من عسير بس كان فرح الرجال عاملين فيه عرضة جيزانية !! ومرات مافي حفل للرجال خصوصاً اذا كان في فندق ممكن يكون هناك عشاء في استراحة أو زفة بمجس في الملكة وانتهينا ... أما الحريييييم سهرتهم صباحي و كثير عرايس صاروا ينزفوا بدري وتجلس مع المعازيم طوال السهرة أما العريس يطب علينا وقت الزفة وأحياناً يجوا معاه أخوان العروسة وأبوها ...وهات يارقص أنواع التفنن هههههه في فرح أخويا الماما والبابا انزفوا لحالهم بعدين افسحنا المجال لأخويا المرجوج جلس ينقز من أول القاعة لأخرها وللأمانة بعض الأسر الملتزمة ترفض دخول العتريس قصدي العريس كمان في عرسان يرقصوا slow والبنات يصرخوا واااااو ويجلسوا يتمايلوا بالورود ..ولازم تسمع حاجات مو حلوة وفي ناس تستحي وتقصر الشر من أساسه .. طبعاً الفرح كله على العريس المسكين ماعدا : الكوشة والمطربة والمصورة >>> أحلفي وفي ناس تحب الفرح يكون صغير ..ويعملوه في فندق او استراحة وأنا منهم نفسي اعمل فرحي في يخت أو ع البحر في الدرة والمعازيم من الطرفين مايتعدوا الـ 80 بالكتير فرح صغنن على قدنا عز الله من الرطوبة راحت التسريحة والميك آب في خبر كان وبس تعبت من القرقرة ...... راح اعطي المكيرفون لغيري