بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
سبحان الله وبحمده .. عدد خلقه .. ورضا نفسه .. وزنة عرشه .. ومداد كلماته ..
انا بخلي هذي الصفحه جلسة مصارحه مع الشباب ماقصدي اتفاخر بالماضي
واتمنى مايحذف الموضوع
كل اللي ابغا اتوصله ان كل الشباب اللي سارو على نهجي يتعضون من قصتي
كنت شاب كأي شاب يدرس ويحلم بعد دراسته بالوظيفه والزواج
طيب وعلى نياتي
بس بعدما تخرجنا من الثانوي تعرفت على اصحاب
غيروني 180 درجه
اسمع الأغاني وارفع صوتي على امي وكل مايخطر في بالكم
بعدها تخرجنا وبدا عندي الفراغ المميت ماكنت افكر بالزواج واقول توني ماني متزوج الحين وبدري على الزواج اول شيء الوظيفه
وانا امشي بالشارع بسيارتي ( الخجمى ) انواع السيارات الجديده وانواع القهر يوم تشوف عليها هندي ومره مصري ومره سعودي بس انها ارحم السعودي
واحيان لا صرت مودي اهلي للسوق اشوف هذي السياره وهذا مودي زوجته ... الخ
بديت اهوجس بالزواج والوظيفه لدرجة اني احسد واموت من داخلي قهر بعض الشباب زواج و وظيفه و سياره جديده وانا لا
نعم فكرت انا اقدر اصنع السعاده
انا اقدر اكلم بنات وبديت من المسنجر كأي عاطل مايمديه يشحن جواله
وما موفر له غير النت
أسهر الليل على المحادثات والكلام اللي كلكم عارفينه ومايحتاج اقوله
تطورت شوي شوي وصرت اشحن الجوال بعشره واكلم وكذلك من الكلام اللي مايحتاج اقوله
وهكذا توفرت لي شقة خالي هو وزوجته مسافرين شهرين وانا بحث عن العمل اعطاني المفتاح
وخذ راحتك فيها
يمكن طلعت فيها أكثر من ( 15 مره ) وكذلك مايحتاج اقول من الكلام اللي انتم عارفينه
والله احسبني في سعاده بس والله ماذقت طعم السعاده
زدت هموم وضغوط نفسيه
ويكلمني واحد من الشباب وانا طفشان وضايق خلقي قالي الزم الإستغفار والدعاء
والله ماتزوجت ووفقني ربي الا بعدها
بديت اراجع نفسي
وحذفت كل ايميلات البنات اللي عندي
وارقام الجوالات
قفلنا ع الشقه وماعاد فيه طلعات
التزمت صلاة الجماعه
الوالده الله يطول بعمرها مازعلها بأي كلمه
معي سبحتي في كل مجلس وهذا اللي ساعدني ع الإستغفار واني ما انسى
اذا تجمعو الشيبان وكلن قام يلولح بسبحته
تذكرت الإستغفار واطلع السبحه وابدأ الولح مثلهم بسبحتي بس لولحه عن لو لحه تفرق انا الولح فيها استغفار والشيبان تلو لح تحمس للسالفه
والله ياشباب توي احس في طعم الدنيا توي احس في السعاده
راحت الهموم والضغوط النفسيه
صرت اقوم الليل واصلي ركعتين وادعي باللي انا اتمناه
والحمدلله توظفت وظيفه ماكنت احلم فيها
وان شاء الله ربي ييسر موضوع زواجي
قولو آآآآآآآآآآآآآآآآآآآآآآآآآآآآآآآآآآآمين
اقسم بالله العظيم ماكتبت هالموضوع الا من باب النصح لكم
واللي الآن يمشي في مثل هذا الدرب
يتوب
ومن ترك شيئا ً لله عوضه الله خيرا ً منه
طبعا ً سبب كتابتي للموضوع
هو سؤال حاكم بينطيه
سألني ايش مفهومك للحياه ؟؟
بسبب معرفي ( كلنا ميتون ) شكله يخاف من الموت 
انا اقولك عش بدنياك واعملها كأنك لن تموت ابدا ً وعيش لآخرتك واعملها كأنك تموت غدا ً
عيش دنياك وسو اللي تسويه في حدود رضا الله عز وجل
واللي قريب من الله والله ان يشوف السعاده
واللي بعيد عن الله بيجي يوم ولحياتنا نهايه
وبننتقل من هالحياه للحياه الأبديه
اللي بيقفل الموضوع وماراح يغير فيه شيء اقوله تراك مثلي قبل
واللي بيقفل الموضوع وبيتغير فيها شيء يبشر بالسعاده
الله يوفقكم ويسعدكم ويحقق لكم جميع ماتتمنون الله يرزقنا الجنه وماقارب اليها من قول وعمل
اللي فاتح ايميله الحين فضلا ً لا امرا ً
انسخ هالموضوع وارسله لكل الشباب اللي مضافين عندك
يمكن تتسبب في توبة شخص ولك اجره
ياليت كل واحد يرد يعطيني نجمه صفراء مثل باقي المواضيع ام خمس نجمات
تراني تعبت وانا اكتب 