ليش الصمغ القوي ما يلزق داخل الأنبوب؟

[IMG]http://**********.com/2011-02-12/12974686631.jpg[/IMG]


الصمغ القوي كيف يكون سائل حده أول ما نفتح العلبة، وبس يطلع من الأنبوب نشوفه ينشف ويلزق بسرعة على كل شي، حتى على طرف الأنبوب نشوفه يخرّب على الغطا، طيب ليش يعني؟ ليش ما يلزق داخل؟

ملخص الجواب : الموية

الله يسلمكم الصمغ القوي مكون من مادة كيميائية اسمها إيثيل سيانو أكريليت (ethyl cyanoacrylate) ، هالمادة تكون سائلة ومحفوظة تمام بأنبوب صغير، إذا طلعت هالمادة من علبتها وتعرضت للهوا تتفاعل كيميائياً مع الرطوبة –أو الموية – الموجودة في الهوا، تقريباً كل مكان حتى لو حسيته ناشف راح تلقى فيه نسبة من الرطوبة بالهوا أو على الأسطح حتى لو ما نحس فيها. داخل العلبة طبعاً مافي أي رطوبة او موية عشان تبقى المادة سايله ما تنشف.

عشان كذا طرف الأنبوب دايماً ينشف عليه الصمغ بعد الاستخدام لأن التفاعل سريع. والمشكلة هالتفاعل السريع في طرف الأنبوب يخرّب على المغطى ما تتصكر تمام وبعد فتره تشوف علبة الصمغ صارت قاسية شوي مو سائلة مثل أول ما شريتها، مع تكرار الاستخدام تبدأ الرطوبة تتسرب لداخل العلبة أكثر وأكثر ويبدا كل الصمغ اللي في الداخل يتفاعل، زيد عليه تلقى الصمغ اليابس على طرف الأنبوب يخرب على إغلاق المغطا بكل مرة تستخدمه والرطوبة تتسرب أكثر وأكثر… وهكذا.

بسبب هالمشاكل كلها في خواص الصمغ شافوا إذا باعوه بعلبة كبيرة راح تخترب الكمية بسرعة والناس تزعل، يعني واحد يشتري أنبوب كبير من هالصمغ كلها مرتين يفتحه خلاص يخترب وينشف، قالوا نبيعه على أنابيب صغيرة وبس.

نختم الموضوع بقصة شلون اكتشفوا الصمغ القوي بالصدفة، سنة 1942م أيام الحرب العالمية الثانية مجموعة علماء كانوا يحاولون يصنعون بلاستيك صافي عشان يستخدمونه بعدسات لنيشان البنادق، التجارب كانت فاشلة، ليش؟ أنا أقول لكم ليش: لقوا المواد كلها تلزق ببعض حيل ... العلماء قالوا مافي فايدة وطفوا المصانع وراحوا بيوتهم .

وراحوا بيوتهم .

عالم واحد من من مختبرات كوداك – Kodak Laboratories اسمه دكتور هاري كووفر – Dr. Harry Coover قال خل آخذ هالمادة اللي تلزق واسويها صمغ قوي… وقام سوقه حيل !
هالدكتور اليوم موجود وعمره 93 سنة، الرئيس أوباما كرّمه الشهر اللي فات (7 نوفمبر 2010م) بميدالية وطنية للتكنولوجيا والإبداع – National Medal of Technology & Innovation بس عشان اكتشافه للصمغ القوي هذا،
هذي صورته :

[IMG]http://**********.com/2011-02-12/12974685761.jpg[/IMG]


[IMG]http://**********.com/2011-02-12/12974685772.jpg[/IMG]
شفتوا كيف اكتشاف صغير مثل هذا يسوي بلاوي ؟



شفتوا كيف كان موجود قدام درزن علماء بس محد انتبه له إلا هذا وطلع فيها؟