وعليكم السلام ورحمة الله وبركاته
مساك الله بالنور والسرور أخوي اللهم صبرني
اتمنى تكون بااحسن حال ..
بالنسبه للكلام الي قريناه عن السب والشتم بالمسئولين اكيد هذا الشي ضايقنا ومكان ودنا نشوف مثل الكلام الي
نكتب لاكن الله يهديهم يارب ويصلحهم وان شاء الله نشوف مواضيع وردود عن الدورهـ تبسطنا وتكون ذكره حلوهـ
لنا انا من طلاب الدوره وبصراحه أستفدت كثير اشياء كثيرهـ أول شي وهي الاهم الصـلاة في وقتها وخاصة صلاة
الفجر والشي الحلو لاحظت بكثرة قرائتي للقرآن في بداية الدوره كانت تصعب علي كثير من الايات اني اقراها
لاني قبلها ماكنت اقرء القرآن كثير بس يوم بعد يوم صرت اقرء القرآن ونادر جدا مااخطي بالقرايه لين حسيت
بمتعه كبيره وانا اقرء هذي اكبر فايدة استفدت فيها من يوم انضميت للدوره الى الحين غير كذا حصلت على جسم
رشيق خفه بالحركه لياقه حلوه وهذا الشي نشكر عليه رب العالمين أول شي ثم المسئولين الي همهم وتعبهم على
شان يخرجونا رجال ينفعون نفسهم واهلهم وديرتهم وقت الشدايد بس بعض الطلاب الي يهديه مايفكر بالفايده
الي بيلقاها من الدوره ذي ويسب ويشتم المسئولين عن الدوره وكانهم جبروه عليها !!
أتمنى انهم يراجعون نفسهم قبل يحطون اللوم على غيرهم ...
بالنسبه للمواقف الطريفه كثيرهـ مرت علينا منها احد الطلاب الله يستر عليه استدعاه احد الظباط وقاله اسمك وذكر
الطالب اسمه من غير مايرفع صوته وطلب منه الظابط يعيد ذكر اسمه بس يرفع صوته ولما قال اسمه تكلم مع
الظابط دقايق بسيطه ولما انتهى قال للطالب انصرف الطالب كان مرتبك شوي الظابط طلب منه الانصراف بس
الطالب قال بصوت عالي انا الطالب العسكري فلان بن فلان ههههههههههه الظابط ماقدر يمسك نفسه ضحك كثير
يعني موقف بسيط حبيت اذكره وعن التمارين بصراحه انا احب تمارين المشاة أتحمس معها بعض الاحيان نتدرب
مع مدربين المشاة وفي نفس الوقت طلاب الموسيقى يتدربون في غرفه قريبه من الميدان وحنا نتدرب نسمع صوت
الموسيقى تعطينا حماس اكبر للتدريبات واحب التحدي بين الفصائل وأفضل يوم عندي يوم صار تحدي بين السرايا
وحصلت سريتنا على افضل سريه بالتوحيد وكان مسئول سريتنا مبسوط منا وهذي من الاشياء الممتعه بالدوره
اعتذر منكم على الاطاله بس حبيت اذكر الي عندي ويارب التوفيق للجميع أن شاء الله
تحياتي لكم ...