أيام وسط الأسبوع أقوم الفجر الساعه 5 بالضبط وأتسنع وأتزهب وأفطر وأصلي إلين تجي الساعه 6 إلا أنا رايحه مع النقل لم مدرستي . أرجع لبيتنا الساعه وحده وربع أريح وأقوم بواجباتي الدينيه همن أكل لي لقمة أحياناً مالي بالغدا وأمزمز على اللي معي من المدرسه إن تسان بقايا الحلا وإلا فطاير أسنتر على المنتديات على أذان العصر إلا انا مزهبه القهوه والقدوع ومسيره على البطاله أشقر عليهم إن تسان عندي شغل من غسيل أو كوي ملابس أنهجته وإلا مذاكرة دروسي ومتابعة الجديد مع الأساتذه إن تسان به شغل من الدوام قعدت عليه إلين أخلص على أذان المغرب سيرت بذا وجلست إلين العشاء همن سكرت النت وقعدت على أشغالي الخاصه وأزهب كل قراشيعي لليوم اللي بعده وأمرح حدود الساعه 10 ونص وإلا بالتسثير 11 . وعلى هالحال .. طبعاً يومي الخميس والجمعه يختلف أقوم الصبح الساعه 8 وأشقرعلى البطاله وألعب شوي على أذان الظهر إلا أني بمطبخي أكشن غداي وأحطه أبد الساعه وحده وعشر وش نسوي بالشيبان اللي عندي همن يقيلون أحياناً أقيل إلين العصر وأحياناً لا إذا أذن العصر مولمتن القهوه والعزبه حقته وجلسنا مع بعض سواليف و كلن يروح يشوف اللي عنده من أشغال و على أذان المغرب رايحين لبيت عمنا إلين العشاء عاد موب دايم نسير عليهم على حسب الوقت .. الجمعه لا وقت خاص وحالة إستنفار مع الغساله وز وز غسيل من الصبح إلين الظهر همن كوي من المغرب إلين العشاء همن إنخماده من غير شر ..