اسعدالله اوقاتكم بكل خير

ياخوان ارجو احل هذه المشكلة

ابناء عمي الان يسكنون الرياض وملف الضمان في الشمال امس بالليل يبون يسحبون راتبين الضمان وكان في البطاقة 5500 ريال عند ادخال البطاقة وادخال سحب نقدي ارادو سحب 5500 ريال لم تقبل صرافة الراجحي لاان الحد المسموح لسحب فقط 5000 الاف في اليوم اعادو العملية وارادو سحب 5000 ريال وطلع لهم في شاشة الصرافه ان باقي الرصيد 500 ريال انتظروا البطاقة تطلع والفلوس 5000 الاف لم يخرج لهم شئ البطاقة حجزتها صرافة الراجحي والفلوس لم تخرج لهم ايضا

رحت انا لفرع بنك الراجحي وقلت لهم على المشكله قالو حنا مالنا دخل في الموضوع قلت طلعو بطاقة الضمان من الصراف رفضوا قالو لي احنا مالنا دخل حسبي الله عليهم تبريرهم انه صرافاتهم الي مليانه منها الشوارع فيه شركه اسمها المجال هم الي يقذون الصرافات ويطلعون اي بطاقة محتجزه فيها

رحت لفرع الضمان بالنسيم بالرياض ولقيت سكرتي جزاه الله خير وماقصر دخلت معه في مكتب وفتح الكمبيوتر ودخل بيانات ام ابناء عمي ولقى الرصيد 5500 ريال قلت له ممتاز يعني الفلوس موجوده قال نعم موجوده قلت المشكله نريد البطاقه قال لازم تروح الى عرعر وتروح لمكتب الضمان هناك ويطلعون لك بدل فاقد قلت ياخوي السالفه مطوله والبطاقه باقي تاريخها مانتهى باقي حوالي 13 يوم وتنتهي وهم فرحانين بقرار ابو متعب ولاتهنوا فيه بسبب صرافات الراجحي قال والله ماعندي حل رحت من عنده واخذت العجوز زوجت عمي ورجعت لفرع الضمان نفسه ودخلت على احدى الموظفات قالت ياخاله ملفكم مو هنا بالرياض ملفكم في عرعر لازم تروحين للفرع هناك وتطلعين بطاقة بدل فاقد وتنقلين ملفك الى الرياض

ملاحظه اتصلت على الرقم المجاني وادخلت رقم بطاقة الضمان والرقم السري وحاولت جاهدا اكثر من مره يرد الجهاز يقول رقم البطاقة او الرقم السري غير صحيح

والان ياخوان وش الحل والله هم محتاجين وثلاجتهم فاضيه من كل شئ وعايشين على الله ثم الضمان الي يقدر يساعد لايبخل جزاكم الله خير

افيدوني وش اسوي لهم حسبي الله على صرافات الراجحي التعبانه