اقتباس:
المشاركة الأصلية كتبت بواسطة رووكوو
السلام عليكم
ماشاء الله بيضتوا الوجه الله يبيض وجيهكم
بالنسبة لي رحت لفرع القصيم، وكنت ناوي أطلع بعد الفجر للرياض لكن الجو غبار خفيف وخفت يشتد الوضع بنص الطريق، وأطلع من المولد بلا حمّص أصير لانيب اللي وصلت للرياض بالموعد ولا اللي رحت للقصيم.
الوكاد إنه يوم صار الساعه 10:30 رحت أنا وأخوي (طبعًا ماقدّم على الوظيفة) قلت عشان يكثرنا.
بعد ماوصلت للديوان، أدور مافيه الا حنا، سلمت على العساكر قلت: وين مكتب الرئيس
قالوا الدور الثالث، سجل أسمي ورقم البطاقة، وصعدنا فوق ودخلنا مكتب الرئيس
صراحةً وللأمانه كان الرئيس قمه قمه بالذوق والأخلاق، والإبتسامة ماتفارقة، يهلي فينا ويرحب قال أجلسوا وجلسنا.
وش عندكم آمروا، قلنا مايامر عليك عدو هذي السالفة كذا وكذا
قال غالي والطلب رخيص، إتصل على واحد من الموظفين وسأله، وأتصل على واحد ثاني وسأله، قال ماعندهم علم لكن دقيقه، مسك سماعة Ip Telephone
وإتصل على الرياض تقريبًا الساعة 11 الا ربع ، قال وين زميلنا إبراهيم عندي متقدمين على المرتبة السادسة يسألون عن نتائجهم، سكر السماعة قال يقولون يجي بعد ساعة
فإذا صار بعد ساعة إتصل على مكتبي، وعطاني الرقم المباشر لمكتبة.
بعد ماطلعنا بساعة إتصلت عليه، قال قبل ربع ساعة متصل عليهم يقولون ماجاء، إتصل علي الساعه 1:30، قلت أبشر، إتصلت عليه مرتين مارد، شكله برى المكتب.
دار بيننا حوار وسألته، ليش ماتوظفون المتقدمين كلهم حنا بسنة جديدة وميزانية جديدة؟؟، وليش هالتأخير؟؟، قال التأخير انا مادري عنه، لكن اصحاب السادسة مانقدر نوظفهم الا عن طريق الخدمة المدنية.
وأنت تعرف إنه من المرتبة الخامسة وتحت نقدر عليهم، لكن السادسة حنا طلبنا من الملك خصيصًا عدد معيّن ووافق عليه إستثناءً لنا، فصعبة جدًا إن العدد يزيد.
قلت ولايمين يسار قال صعبة، لازم من الملك.
فيا إخوان انا ماودي أحطّم المعنويات لكن الزيادة يبيلها تعب شوي لازم نتعب مع الصحف ونتعب مع الديوان ونسوي برقيّة ونتفاعل أكثر مع بعضنا، عشان نتوظف كلنا.
وانا عندي إقتراح حلو يمكن يفيد واللي بيسويه ويقوم عليه بيستفيد جدًا جدًا، لكن في ظل هالتفاعل القليل ماضنتي.
[gdwl]
اللي مستعد وعنده المقدرة ويقول أنا قدها لي ولا للذيب، يعطيني خبر أنزله.
وصدقوني الدوائر الحكومية تستانس بزيادة العدد، مافيه أحد مايبي زيادة موظفين لكن المشكلة من غيرهم.
[/gdwl] |
الي حاطه بلإطار مو فاهمه ايش تقصد فيه
لازم يطلع إعتماد من وزارة المالية لعدد الوظائف الي رح تزيد الي هي 333 عشان تصير 402+333=735
لكن كيف يطلع اعتماد وزارة المالية لازم بأمر والامر من مين من الملك الله يحفظه