اقتباس:
المشاركة الأصلية كتبت بواسطة dihoo
هلا فيك اخوي تسويقار منور بوجودك ...
بالنسبه لكلام عن الاخ بارق صحيح وبالفعل صعب علي جدا لاني مبتديء ...
واما بالنسبه للبقاله فانا لو حصلت الموقع المميز والمناسب ماراح اتردد ..وعن اسرارها وطريقة تاسيسها ياليت والله مااستغني عنك ولا عن اي كلمه تطلع منك يالغالي ...ولو تعرف لي موقع مناسب بجده تدلني عليه ...
اسعدتني ونورتني ...دمت بصحه
|
هلا اخوي ...
شوف كيف راح تأسس البقاله ....
طبعا بعد ايجار المحل ... تقدر تروح مثلا لشركة بيبسي او كوكا كولا ... وهم يسوون لك لوحة المحل على حسابهم
لكن راح يشرطوا عليك شرط مهم جدا وهو :
لو اتفقت مع شركة البيبسي راحوا يطلبوا منك ما تدخل الكولا للبقاله وهذا شرطهم
ومثلها الكوكا كولا راح يسووا لك اللوحة ولكن طلبهم ما تدخل البيبسي
وطبعا راح يسووا لك اللوحه بشعار البيبسي واسم البقاله وراح ينزلوا عندك ثلاجات خاصه فيهم وكمان يختاروا موقع الثلاجه داخل المحل .
لو انت خايف تخسر الكولا فأترك عنك اللوحه وسوها على حسابك واطلب منهم فقط الثلاجة
الان : عندك موقع الكل يتنافس عليه سواء شركات البيبسي او شركات الالبان ..
هو المكان اللي دائما يكون بصدر المحل او المكان اللي تطيح عليه العين اول ما تدخل البقاله .
هذا المكان تأجره للشركات شوف مين بيدفع اكثر تأجره له وبعده المكان اللي جنبه
ممكن شركات الالبان تدفع لك ايجار وخاصة نادك اكثر الشركات تأجير ...
طبعا هم ما راح يدفعوا لك فلوس ...
راح يدفعوا لك بضاعه يعني يقولوا قيمة الايجار هالشهر 400 ريال راح نعطيك المبلغ البان ما قيمتها 400 ريال او انه ينزل المبلغ من فاتورتك
شركات الالبان لها بونص شهري وانتبه لا يأكلوه عليك ...
قد ما تبيع يطلع لك بونص شهري او كل 3 شهور .. وكمان يدفعوها اما منتجات البان او يخصموها من فاتورتك .
تأسيس البقاله ...
يفضل تشتري ارفف مستعمله من اجل تخفيض التكاليف وبتلاقي المستعمل عند محلات بيع الارفف مثل العمران للارفف او غيره ...
بعد ما تجهز البقاله تروح وتشتري بضاعه بمبلغ معين وهالامر لابد منه وتكمل بقالتك بالكامل ..
من وين راح نجهز البقاله بالمواد ؟؟؟
من اولا :
المستودعات وتجار الجمله وهذولا بتلاقيهم بالحلقه بالصفا ..
شوف كم واحد وسعر الاسعار وبعدين اختار واحد بحيث تتعامل معاه بشكل مستمر مو كل يوم عند تاجر ؟؟ اترك عنك النطنطه 
وهنا اقولك تاجر واحد فقط وذلك لسبب راح اقولك عليه فيما بعد ....
وانتبه لا تشتري من التاجر الاشياء اللي ممكن يوفرها لك مندوب الشركة
ثانيا :
نجهز البقاله ايضا من خلال مندوبي الشركات ومبدئيا الشركات والمندوبين راح يتعاملوا معاك كااااش ونقدي لفترة معينه وهي فترة يسمونها فترة اختبار الزبون
اختبار من اي ناحيه ؟؟
من ناحيه كثرة الطلب وسحب منتجاتهم .. يعني لو كنت تسحب منهم كثير راح يحطوا العين عليك
بعد كذا انت جهزت البقاله وتمام التمام وشغلتها .. بعد فترة راح تحتاج بضاعه .. الاكيد بتروح لتاجر الجمله اللي تعاملت معاه اول مره بتشتري منه
وكمان تشتري من المندوب ...
بعد فترة ... وهنا اجابه ليش اخترنا تاجر واحد مو اكثر ....
تروح للتاجر وتقوله انا عميلك بشكل دائم واشتري منك كل اغراضي ..
الان جاء دورك يا تاجر تعطيني بضاعه واسددها لك على شهر او شهرين او ثلاثه حسب ما تتفق معاه ... يعني سداد بالاجل
وهنا ميزة انك تتعامل مع تاجر واحد ...
شركات الاغذية والمندوبين :
لما تشتغل بقالتك وتسحب من المندوبين بالاخير تقولهم نزلوا بضاعه والسداد بالاجل ...
بيقولوا لآ بالبدايه تقولهم لو ما اعطيتوني بالاجل راح اخذها من تاجر الجمله بالاجله وانتم برا بقالتي
طبعا المندوبين قسمين .. مندوبين بقالات ومندوبين لتجار الجمله ومندوب البقاله ما يبغاك تاخذ من التجار لان المستفيد هو مندوب التجار .
راح يوافق غصب عنه وخله ينزل البضاعه ويكثر ويعبي المكان لا تهتم ....
طريقة السداد مع مندوبي الشركات :
لو افترضنا اصبحت مديون للمندوب بمبلغ 5000 ريال قيمة بضاعه نزلها عندك اهم نقطة بالموضوع ان المندوب لما يجي لك ومعاه فاتورتك لا ترجعه و يده فاضيه ..
يعني لا تقوله ما عندي او تعال بكرا ؟؟
لا اعطيه اي مبلغ .. اعطيه 500 او 600 او 300 وقوله الاسبوع الجاي تعال وخذ مثلها
هنا بيكون حسابك متحرك معاهم وهم اهم شي عندهم ان العميل يسدد حتى لو مجزأ
وشوف وانا اخوك الـ 500 ريال اللي اعطيتها للمندوب بعد يوم اتصل عليه وخله ينزل لك بضاعه بــ 500 ريال راح يقبل ما عنده مشكله لانه خلاص صار ضامن انك تسدد
ليش ناخذ من المندوب ؟؟؟
المندوب غير التاجر .. التاجر لما يبيع لك ما في شي اسمه ارجع الحاجة او استبدلها ...
وعشان كذا قلتلك قبل شوي لا تشتري من تاجر الجمله كل شي .. لا .. تشتري منه فقط الاشياء اللي مالها مناديب مثل الرز والطحين والاشياء هذي ..
اما المندوب لو فيه نوع ما مشي معاك جيبه من اذنه يشيلها من البقاله واما يعوضك عنها ببضاعه ماشيه او يخصمها من فاتورتك
الامر الاخر ان الشركة او المندوب مسئول مسئولية تامه عن اي بضاعه تنتهي صلاحيتها
يشيلها من البقاله ويخصمها من الفاتورة او يجيب لك نفس البضاعه بس بتاريخ صلاحيه جديد او يغيرها بمنتج اخر ...
اهم نقطة بموضوع المندوبين انه لا يرجع ما اعطيته فلوس مهما كان الامر ...
بعد فترة بتلاقي ان بقالتك مليانه بضاعه بس كلها على حساب الشركات .. وانت تبيع وتشتري بفلوسهم مو بفلوسك .. 
نقاط مهمه ارجو الانتباه لها :
لا تكثر من الثلاجات داخل المحل لسببين :
اولا :
حرارة الثلاجات راح تدمر لك معظم البضاعه وكمان ممكن تأثر على بعضها البعض بسبب الحرارة وما تبرد وتخرب كل اللي بالثلاجات .
ثانيا :
اكثار الثلاجات بالمحل راح يرفع عليك تكلفة الكهرباء والفواتير .
امر آخر ...
وجودك بالمحل ضروري جدا .. لا تقول جرد وما جرد .. ما راح ينفع معاك شي ... الا وجودك
كمان امر آخر ....
الدين ...
فيه بعض العوائل تتسلف من البقاله واخر الشهر مع الراتب يدفع ...
هنا مسألتين : اما انك تفتح الباب على مصراعيه واخر الشهر تلطم ما تدري وين زباينك ولا وين فلوسك وتتوهق مافي بضاعه ولا في فلوس ...
لان الزبون ما راح يجي لك وعليه دين لانك راح تطالبه بالدين السابق وهنا راح يروح بقاله اخرى
وبكذا تكون خسرت فلوسك اللي ما سددها .. وخسرت الزبون نفسه لانه راح بقاله ثانية
المسألة الاخرى :
انك تقنن مسألة الدين .. لناس خاصين تضمن سدادهم اخر الشهر ....
او انك تقنن الدين بمبلغ معين مو كثير .. تقوله انا ممكن افتح لك حساب لكن ما يتعدى مثلا 200 ريال بالشهر او 300 ريال .. هنا مقدور عليها ..
وانت تشوف هل هو ملتزم بالسداد .. اذا كان متلزم بعدها ممكن ترفع له الحساب
التوصيل :
لازم ولابد يكون عندك توصيل ..
وتكون أمين بالطلب يعني لا ترسل للزبون شي مو كويس .. اختار الافضل وارسله مع العامل
انتبه من عامل التوصيل ممكن يجيب لك مصيبه خصوصا اوقات الصباح واصحاب البيوت في اعمالهم ...
وسلامتك طال عمرك ...
ياللا شد حيلك ... شوف ردي ملونه لك الف لون كنه كراسة بزر