صباح الخير اخوي عزوووووبي .... المشكله وانا اخوك ان اكثر الموجودين هنا مو جادين بالعمل ... يبغون افكار لكن بدون تنفيذ تلاقيه دخل على فكرة من الافكار وعجبته وسجل اعجابه وبالاخير ما نفذها والدليل انك تلاقيه بموضوع فكرة اخرى مشكلتنا حاجز الخوف ... خايفين يخسرون ... ما يدرون انو مافي ربح الا بعد خسارة .. ومافي نجاح الا بعد فشل ... ياما خسرنا .. وياما انسرقنا ... وياما انضحك علينا .. وبالنهايه عرفنا وعلمتنا التجارب .. وعرفنا شلون نتعامل وكيف نتاجر هنا وهناك ... راح اعطيك كم قصة حصلت لي في بداياتي .... اول مشروع سويته كان وكالة دعاية واعلان ... كانت ناجحة بكل المقاييس ... فعلا ربحها كان كبير ... لكني ما كنت اعرف شي اسمه حساب بنكي واحط فيه كل مدخولات الوكاله ... لا كل الفلوس تجي احطها بجيبي واصرفها رواتب .. غير صرفي الشخصي ... وبالاخير الاقي نفسي تورطت بشغل الزبون اللي اعطاني الفلوس وماعندي حق المواد الاولية لانجاز عمله . حليتها بغباء ... سلمتها لواحد سعودي ... صار الاخ يتفق وياخذ الفلوس ويشتري فيها ملابس وجينز وجوالات ضاعت من يدي وبعتها بتراب الفلوس ... رغم انها كانت قوية في بداياتها .... عرفت من خلال هالتجربة انه مافي شي اسمه بيع وحط في جيبك واصرفه على نفسك ... ومافي شي اسمه سلمها لفلان من الناس ... لان المال السايب يعلم السرقة ... تعلمت اني اوقف على شغلي بنفسي ويكون فيه محاسبه لكل صغيره وكبيرة بعد كذا حاولت اجيب شي من الصين وابيعه هنا ... راحت افكاري واوهامي وجبت فكرة وهي اني اخذ تصاميم جلابيات كويتيه وخصوصا بعض تصاميم اشهر مصممات الكويت وانفذها بالصين اتفقت مع مصنع بعد عناء بحث طويل ... اتفقت معاهم عن طريق موظفه وصرت اراسلها وكنت طالب عينات لشغلي وكانت رافضة مسألة العينات ... وقالت أقل كمية عدد كذا وبعد محاولات اتفقنا تسوي لي من كل تصميم 4 حبات كعينة وبكل امانه وطيبة قلب ... ارسلت لها الفلوس ... على قولتهم الدار امان .... انتظرت الارساليه من هناك ... ماوصلني شي ... كلمتها قالت انها ارسلتها بالبريد واعطتني رقم بوليصة الشحن دخلت موقع الشركة ومافي شحنه بهالرقم ... عرفت اني انسرقت .... والي يومك هذا 18000 ريال ما ادري وينها تبت بعد كذا ؟؟؟ بطلت ؟؟ لا .. والله ما تبت ولا بطلت .. حاولت وحاولت ... وميزتي اني فدائــي ولا يهمني لان الخوف ما راح ينفعني وقلت ان ما صابت هالمره تصيب بالمرات الجايه .... بعدها حاولت اجيب جوالات ... وكان الجوال بأسم عيون نوكيا ... مو موجود بالسعوديه وشكله كان شيك مره .. هذي صورته : طلبت خمسة جوالات كتجربة .. وطحت بيد واحد ما يرحم ... حولت له المبلغ واذكر كان 5000 ريال ... لما استلم المبلغ ... بعدها بيومين وانا انتظر شحنها لي ارسلي ايميل وقال ان شركة الشحن متوقفه عن العمل ولازم نروح لشركة اخرى وطالبين فرق 4000 ريال زيادة ... وانا من هبالتي قلت انقذ الـــ 5000 ريال الاولى بالاربعة اللي طلبها واضطريت احول له 4000 ريال اخرى بالاخير لطش مني 9000 ريال و لليوم هذا ماشفت لا عيون نوكيا ولا اذنه وبالنهاية اكتشفت انه نيجيري من ضمن النصابين بالمواقع . المصيبة ومن حقارته لليوم هذا يرسل لي يقول لو حاب تتعامل معنا ونزودك بالبضائع ... عرفت من هالتجربة ان الثقة بالناس خطأ .. ولا تثق الا بنفسك فقط أو شي تمسكه بيدك ... غير كذا لا تثق بأحد وقفت بعدها ؟؟؟؟؟؟ او بطلت شغل ؟؟؟ او خفت وقلت توبه ؟؟؟ لا ما تبت .. ولا خفت .. وكملت بأصرار على النجاح لكن بطريقة صح ومتلافي لكل الاخطاء السابقة ... الان لدي مشاريع كثيرة كلها ناجحه والحمد لله ويمكن ساعدني بنجاحها بعد توفيق الله سبحانه وتعالى تخصصي بالتسويق ودراستي خارج السعودية فلديهم من الافكار هناك الشي الكثير ... الان وبعد كل هالمعاناة امتلك الكثير .. وقولوا ما شاء الله : شركة تسويق بالرياض ( استشارات تسويقية / تسويق للغير ) لديها عقود مع بنوك وشركات ومصانع بقيمة اكثر من 8 مليون مزرعة خضار بالقصيم تحتوي على 23 بيت محمي بدأتها ببيت واحد كتجربه شركة خاصة للدخول بالمناقصات الحكومية وتوريداتها والحمد لله فيها خير كثير سلسلة مطاعم وجبات سريعه كل هذا غير وظيفتي بالقطاع الخاص كمستشار تسويقي بأحد الشركات والحمد لله ... لكن لا انام الا قليلا .. طول الوقت بعملي من الفجر لاخر الليل ... قد ما تعطي عملك وتجارتك .. قد ما تعطيك واكثر ... الافادة من كل هذا .... اني ما وصلت الي ما وصلت اليه الان الا بعد محاولات فاشلة وخسائر ودروس تعلمتها من السوق ومن الشارع ومن العامل ومن التاجر وتعلمت ان العميل والزبون هو نقطة ومحور ارتكاز نجاحك ... ايضا تعلمت ان المحاولة والاصرار على النجاح والمتابعه المستمرة لاعمالك هي اهم اسباب النجاح تعلمت ايضا ان الامانه سواء مع نفسك او مع عملاؤك هي اهم اسباب النجاح تعلمت ايضا ان الكسل والنوم راح يأخرني للخلف عشرات السنين ولن يقدمني خطوة واحد للامام ايضا الخوف يقتل ما بداخلنا من عزيمة واصرار ... وسنقف بمكاننا الي الابد مالم نرمي هذا الخوف وراء ظهورنا ونقدم خطوه حتى نأخذ مقابلها خطوتين باقي مشروع الزواج ادعوا لي بالتوفيق حفظكم الله