المشاركة الأصلية كتبت بواسطة تسويقار

هلا اختي ...

شايفة الملون بالاحمر ؟؟؟ ( نستأجره منك ... )

اوكي

اولا : بكم بيستأجره منك لو لا قدر الله فشل المشروع ؟؟

ركزي على نقطه مهمه اختي انو في حالة الفشل انتي مستعده تقبلي بأي مبلغ المهم تطلعي من الورطه ...

هل سيستغـل ظروفك وقتها ويستأجر منك بمبلغ زهيـــــد ؟؟ ام يقيم المحل بشكل حقيقي ؟؟؟

ثانيا : ما مصير الـ 75 ألف قيمة الاسم ؟؟ هل راح يرجعها لك ويكمل هو لان الاسم ملكا له بالاصل والمحل استأجرة ويعتبر ملكا له الان ؟

ثالثا : هل سيستأجر منك فقط ام سيدفع لك نسبة على المبيعات لو افترضنا انه ما رجع لك قيمة الاسم ؟؟

لو افترضنا انه ما رجع لك قيمة الاسم ... اجل ايش فايدة المبلغ المدفوع للاسم .. اخذه كذا بارد مبرد ؟؟؟

رابعا : هل سيقدم لك شيئ من الدعم .. ايا كان نوع الدعم مقابل النسبه ؟؟؟

بمعنى اختي الله يحفظك يارب :

هل سيقدم لك مثلا اعلانات مجانيه ؟؟؟ هل سيقدم لك علب العصير المطبوع عليها الاسم .. مناديل .. كراتين حمل العصائر ... هل سيقدم لك اي شئ ؟؟

ان كان لا لن يقدم لك اي شي ... فليش اخذ منك نسبة ؟؟؟ الاسم وانتي دفعتي حقه وقيمته .. اجل النسبه عشان ايش بالضبط ؟؟

اللي اعرفه ان الفرنشايز يقدمون دعم حقيقي للمستثمر مقابل نسبة من المبيعات ... اخونا هذا ايش بيقدم لك ؟؟

امور كثيرة اختي لازم تتأكدي منها ...

واهمها ما مصيرك انتي لو فعلا لا قدر الله المحل خسر واستأجره منك ... بكذا بياخذ محل مجهز بالكامل من ديكورات وعمال واجهزة وكل شي بتراب الفلوس

مقابل ماذا ؟؟

مقابل ايجار شهري هو من سيحدده وليس انتي ... ولو رفضتي راح يسحب منك الاسم بأعتبار ان المحل خسران وانتي مو عارفه تشغليه ...

يعني لو ضغط عليك بأيجار 4000 ريال راح توافقي وبكذا يبغى لك قريب من خمس سنوات عشان ترجعي رأس مالك

اختي تراميسيو ...

لو فعلا مصممه على المحل بلغيني اعطيك كل الاشياء المهمه اللي تكتبيها بالعقد معاه حفظا لحقوقك ...

وقتها اقولك افتحي المحل ونامي وانتي متطمنه انتي ربحانه سواء نجح المحل او فشل ...

لكن بالشكل الحالي ما زال الامر مبهم وغير واضح من طرفه ..

بالنسبة لطريقة دراسة المشروع على ارض الواقع .. ابشري وانا اخوك .. تفضلي :

اولا : الموقع ...

اختياره للموقع على اي اساس ؟؟ يعني لا يكون هو يفتح بالمكان اللي يعجبه وبأسعار رخيصه ولما جت عندك اختار موقع غالي وتكلفته غاليه

ثانيا : المبيعات فعليا :

ما ينفع انك تشوفي الاوراق المحاسبيه كما تفضلتي سابقا ... لازم تنزلي انتي بنفسك وتشوفي البيع في كل الفروع وليس بفرع واحد

لانه ممكن يقولك اوكي روحي للفرع الفلاني وشوفي كيف المبيعات .. ويكون هذا الفرع هو الفرع الوحيد من بين فروعه اللي شغال كويس

ثالثا : مدى تقبل الناس للمنتج :

وهذا ما راح تعرفيه الا من خلال تواجدك بالفروع وكمان تعرفي اكثر المناطق او الاحياء طلبا على المنتج

عشان تحددي اكثر موقع مناسب لك عشان تفتحي لهم فرع فيه .. وهذا تعرفيه من خلال توزيع استبيان على الزبائن .. يعبي الاستبيان وهو ينتظر دوره

رابعا : التكلفة الحقيقية للمشروع :

هل فعلا تكلفة الديكور واللوحه والعماله 200 ألف ؟؟ لا تقولي هو قال ؟؟

لا انتي بنفسك تروحي وتشوفي ديكور محلاته ونوعية الثلاجات واللوحه وتسعريها من برا

وتجيبي تكلفة كل الاشياء المطلوبة بنفسك انتي ... مو من فواتيره واوراقه

وانتبهي تكلفة كل شي تعتمد على حجم ومساحة المحل ... لوحة لمحل كبير تختلف عن تكلفة لوحة مدخل واحد ...

هل المحل يتحمل ثلاجة او 2 او 3 ... وقيسي عليها بقية الاشياء ...

خامسا : الدخل اليومي لكل فرع من فروعه :

انتي متواجده اليوم بهذا الفرع .. احسبي كم عميل دخل للمحل .. وما معدل شراء كل عميل

هل كل عميل ياخذ علبه عصير وخلاص او فيهم مين ياخذ 3 علب او خمسه او عشرة ؟؟

تحسبيها بعدد الزبائن وبعدد الطلبات اللي طلعت من المحل

بعدها اليوم الثاني تروحي للفرع الاخر وهكذا .... وتختاري ايام عشوائية للزيارات والمتابعه يعني لا تقولي اروح كل خميس .. لا خميس ومره سبت ومره ثلاثاء وهكذا ...

وانتبهي لا تحسبي الشغل وقت الاجازات او وقت الويك اند .. احسبيها بالايام العاديه ...

فمحل وقت الاجازة دخله غير دخله ايام العمل ... كمان محل في الكورنيش بيكون دخله اكثر من محل وسط البلد ايام الويك اند

و وسط الاسبوع ينقلب الحال ويكون محل وسط البلد اكثر مبيعا من محل الكورنيش وهكذا ..

الامر الاخر اختي ..

ما ينفع نقول ان دخل المحل 5000 ريال ويوصل لعشرة الاف .. كذا الحساب خطأ

انا يهمني صافي الربح من اجمالي الدخل ...

كلنا نعرف انه كلما زاد الدخل كلما ارتفعت التكلفه ...

بمعنى لما ابيع بخمسة الاف اكيد بتكون عندي التكلفة مرتفعه فالمواد الاولية لازم نحسبها صح وما ينفع يقولنا 45 ألف فواكه

كلما ارتفع عدد مبيعاتك كلما زادت عندك تكلفة الفواكه .. الكهرباء ... استهلاك المعدات .. والمواد الاوليه الاخرى مثل الاكواب والمناديل والكراتين وغيرها ...

يهمني اطلع صافي الربح من اجمالي الدخل ... معادلة مهمه

طولت عليك بالكلام .. انا اسف ...

حفظك الرحمن .. واي سؤال او استفسار انا بالخدمة ...