السلام عليكم ورحمة الله وبركاته كيف الحال ياوحــوش والله من زمان ماشاركت ولا شفت المنتدى قطنــت في المركز من يوم دربونا السعوديين كل اسبوع محجوز بس الحمد لله طلعت ذالاسبوع عقب مافلسعت هههههه والله انا جاي بأعطي نصـآيــح لأخواني المستجديـن الله يوفقكم وييســر اموركم ولا ابي منكم الا الدعاء اول شيء ياحبـآيبي واهم شيء الصبر والله وقت دورتكم ماشاء الله ميه بالميـه كلها اسبوعين ويجي رمضان ويصير كل تدريبكم بالمساء وتفلونها ان شاء الله طبعاً اول اسبوع بيجيكم نفسيه اكيد اي واحد ينفس الا اللي بياخذها بفله خلك وسيع صدر ولا تفكر في الخروج اذا ضاق صدرك عشان الحبس 45 يوم او اقل تذكر فيه مساجين عشرات السنين وش يسوون واذا على الكرف خذها من باب انك تضبط لياقتك البدنيه والصحية وخل معنوياتك عاليه وان شاء الله مايعوقكم شيء والله معنا ناس دببـه مررره وماشيــن في الدوره احسن مايكون الدوره يبي لها صبر كلها كم شهر وتخرجون بإذن الله طبعاً زي ماقلت اهم شيء اول اسبوع اصبرو وثاني اسبوع بعدين تبدون تفلونها مع بعض والله تضحكون ضحك ماعمركم ضحكتوه برى في حياتكم يجي مواقف واشياء وانت مهلوك تضحك بتستاسع صدوركم مع الوقت اهم شيء خلو عنكم النفسيه ولا تقرب من احد يقول ( متى نطلع , ياليتني مادخلت , ياليتنيي كملت دراسه , ... إلخ ) لانهم يحبطون معنويـآتكـم وبعدين انت فكر فيها الرجال اللي دخلو دورات وخلصوها وش عندهم اكثر منك ؟؟ كلكم نفس بعض اللهم العزيمه والصبر والله ان الايام في الدورة العسكرية تمشي بسرعه ماتخيلونها بتحسون ال45 خلصت في اسبوع وإذا خلصتو الـ45 تسهلت اموركم لأنك كل 4 ايام وانت طالع وتنبسط وترجع المهم انا دخت قايم من الفجر ولا نمت زين ولا ادري وش قلت وش ماقلت بس شكلي ضيعت ثاني شيء انتبه يحفضونك المدربين خلك بريء ولا تبزوط واي شيء يقوله نفذه الا اذا صرت خلاص ماتستحمل وقف عاد ولا راح يقولك شيء ولا تنسون ترى التعب منسي والله كنا نهرول نعرج رجولنا رايحه فيها بس صبرنا وضفرنـآ وبتتذكرون الكلمه هذي ( التعب منســي ) بتقولونها بعد كل جزا تاخذونه طبييييعي والله بعض الاحيان ودك تتجازا تفلها في الجزا واذا صار فيك نشاط زايد تهبل بالمدربين وتستعبط عليهم وتسوي نفسك دلخ وتضحك ياراجل ايوه وش كنت اقول ؟؟؟ والله اني انلحست صراحه ومانيب رايق ارجع اقرى وش كتبت داااايخ وهلكان وتوني واصل الرياض يارجال خلها على ربك شسمه وش كنت بقول ايه الناس اللي ماجتهم رسايل بإذن الله تجيهم ترى فيه نااس مادخلو معنا الا بعد كم يوم وناس جو الاسبوع الثاني بإذن الله تجيكم الرسايل يارب انك تحقق امانيكم وكل مسلم ولاتنسون اقرو قرأن واستغفرو في الثبوت ( هذى اهم شيء لانك بعض الاحيان تتصلب ساعه وتقعد تشطح بالتفكير وكذا يعني لو تستغفر احسن لك وتذكر الله ينقطع الوقت ولا تدري عنه ) لا اوصيكم ياوحوش لا احد يفصل والله اذا صبرتو اول اسبوعين او ثلاثه خلاص انتهت الدورة لأن الكرف في اول ثلاث اسابيع بعدين يصير عندكم تعليم وتصيرون ترتاحون في التعليم ولا تنسون كل خميس اضاهر مافيه الا 3 حصص والجمعة مافيه ولا حصة ابد تغسل ملابسك تروش تنام على كيفك تصير كل اسبوع تحتري يوم الجمعة بس بعد 3 اسابيع من الدورة يصير ماعندكم الا حصتين الصباح والعصر بسسسسسس يعني انواع الراحه والسوالف والضحك والسهــر طبعاً الحصتين حصة مشاه وحصه رياضة المشاة راحه والرياضة مع التعود تصير طبيعي يتعب المدرب وانت ماتعبت ياشيخ ولا اوصيكم مع الاغراض المطلوبة لاتنسون تجيبون مرهم فولتارين لانه زين للعضلات والمفاصل وفيه مرهم رصاصي مرسوم عليه جسم عضلات مدري وش اسمه اشتروه بعد وخوذو بودرة اطفال عشان مايجيكم تسلخات في الفخذ من الهروله وفازلين وفكس وكثرو من الملابس الداخليه وجيبو تايد ثنين وكثرو شرابات لو تجيب 20 حبه زين عشان كل يومين واحد وعلى كيفك لو تكثر احسن وحاول تجيب كنادر سبير وزنوبات سبير << بتعانون من زرف الزنوبات هههههههه وحاولو تكثرون في كل شيء عشان ماتحتاج شيء واللي بتحتاجه يجيبونه لك اللي بيزورونك ان شاء الله وش بعد وش بعد ايه جيبو 3 بدال خضراء احسن لكم وفي النهاية نتمنى لكم قضاء اوقات ممتعه في الدورة والله ياشباب اني اقول لخويي قرب التخرج والوناسه يقول بالعكس هنا الوناسة مع اخوياك يالله انا تعبت اجيكم بعدين ولا تنسون ذكر الله قولو مـــاشاء اللــه والله عندنا ناس جاهم عين بسبب دخولهم الدورة واخاف احد يجيب اجلي يالله في امان الله ولا تنسونا من دعائكم يا ابظايات