بعد التحية والتقدير للجميع ،،، اليوم جايب لكم آخبار ومعلومات حلوة ، بس دعاوتكم ياشباب . أحد الزملاء تخصص علم نفس اليوم قابلته بعد الساعة 12 وأخذت منه معلومات كثيرة . راح أكتبها على شكل سرد قصصي ، لان بعض الشباب الله يهديهم يحبون التفاصيل الصغيرة . الرجال طبعاً جهز أمورة في يومين عبئ اوراقة ووقعها من شيخ القبيلة وارسلها مع ولد عمة يوم الجمعة ، عشان يسلمها له يوم السبت نيابة عنه ، وبحكم أن ولد عمة يشتغل عسكري بالمدينة العسكرية اللي بالعيينة ، سلم الاوارق في المكتب الخاص بالتسليم الاوراق ودققوا في الأوراق من ناحية اكتمال الطلبات والتواقيع وغيرها ، وبعدها عطوة كرت فيه صورتة ومختمة وفيها موعد الكشف الطبي والوزن والمقابلة وغيره وموعدة كان يوم الأحد الساعة 4 الفجر ( يعني اليوم الثاني من التسليم ) و يكون متواجد في مبنى وزارة الدفاع اللي أمام الشعلة ( طريق الملك عبدالعزيز ، أو يسمى شارع الوزارات القديمة ) المهم الرجال حضر من أبها الساعة 3 الفجر وعلى طول على المكان المحدد ، يقول كان فية تجمع وغالبيتهم طلاب الثانوية العامة ، المهم ركبوهم الباصات ونقلوهم للمبنى ثاني وعلى ما اعتقد قال مبنى الخلية ، المهم صفوهم سرى ، شوي ونادوا ( الجامعين يجون سرى ) ويقول عدد الجامعيين ما كان يتعدى 17 شخص ويمكن أقل لانه ماعدهم ، منهم إثنين اطباء ومنهم إثنين علم نفس ومنهم واحد خدمة أجتماعية ومنهم واحد إدارة اعمال مدري محاسبة ومنهم واحد اخصائي اشعة والباقي ماعرف تخصصاتهم المهم طلبوا منهم ينزلون ملابسهم مايخلون إلا السراويل المقوصرة وعطوهم لبس أزرق يشبة حق المرضى بالمستشفيات ( السترة الزرقاء معروفة ) المهم بدء باول كشف اللي هو النظر وبعدها الباطنية وماني متذكر لانه يطلع من غرفة يروح الثانية ، ودخل على المقابلة النفسية الاولى ويقول طلب مني الدكتور أقول ( آمر أمير الأمراء ) وطلب يقول ( حاشاك ) وكلمات ثانية يبغى يقيس ويعرف النطق عنده ، المهم عدى الرجال وأنتقل الحين للمرحلة المفصلية الطول والوزن المهم الرجال يقول أذكر طولي حوالي 165 تزيد ولا تنقص ، المهم طلع طولة 163 والوزن عندة 58 المهم عدى الرجال ، يقول بعدها المقابلة الشخصية التخصصية ، يقول أنا ارسلوني للجنة الطبية ( مادري ليش ، بس الظاهر عشان اقسام علم النفس بيعملون في الخدمات الطبية ) وقبل لا أبدا في تفاصيل المقابلة بقولكم شيء عن الرجال ماشاء عليه في جرأة وثقة وتحس فية خفة دم مع رزانه يعني تركيبته وتعامله مع الآخرين مميزة جداً . المهم دخل عليهم صبحكم الله بالخير مع ابتسامة أدب جلس وساله العقيد السعدون وش تعرف عن علم النفس ؟ قال وش اللي ماتعرفة ، وانا أعلمك فيه . يقول أبتسم وقال عرف لي علم النفس ووش قريت من كتب في علم النفس وليش دخلت علم النفس . المهم أنتقل إلى الأسئلة الثانية ليش أخترت العسكرية ووش هوايتك ا؟ الرجال جاوب عليها بثقة وجراة ولما جاء يجاوب على الهواية قال هوايتي الشعر قال له تكتب قصيد ؟ قال إية قال قل لنا قصيدة المهم سدحهم بكم بيت ، يقول يوم خلصت حسيت أن وضعي بالسليم . وبعدين رجع وساله لو جاء تعيينك للخرخير بتروح ولو جاء تعينك في الشمال بتروح ( يبي يقيس تقبلة للعمل ) الرجال جاوب جواب اشوف أنه نموذجي قال ( دامني قبلت أني أدخل بالعسكرية ، فالواجب علي أني التزم بالتعليمات وتوجيهي للمكان اللي أقدر أخدم فيه ) وسالوة أيضاً كم أخذت في مشروع التخرج ومن حسن حظة ماخذ A+ وسالة عن لغته الانجليزية وبعض الاسئلة الثانية . المهم قالوا له فالك التوفيق ، طبعاً جلس يتميلح علي ويقول أنبسطوا مني ويوم طلعت وجيهم زي كذا الكشرة من الاذن إلى الأذن . المهم طلع الرجال وعطوه كرتة مختم وكل شيء وقالوا له توكل على الله أنتظر الفرز الثاني . ــــــــــــــــــــــ الحين جاء وقت الأسئلة اللي أشغلته فيها . س/ كيف كان تعملهم معكم ؟ ج/ بشكل عام أكثر من ممتاز ، والجامعيين لهم تعامل ثاني ولاحظته من خلال تعامل العسكر والمشرفين بشكل عام . وهذا يثبت نظريتي أن وزارة الدفاع تقدس الجامعيين س/ كيف الوزن والطول وتشددهم من هالناحية ؟ ج/ لاحظت أن فيه تساهل وعدم تدقيق ، حتى لما قلت للي قاس طولي أن طولي الحقيقي 165 ، رد عليه وهو ويبتسم وقال له ماعليك بتمشي ، ( أعتقد أنه ممرض ) نسيت وش قال وقال فية واحد أشوفهم رجعوه لان وزنة زايد بقوة وجسمة غير متناسق مع طولة اللي هو تخصصة أخصائي اشعة ، لدرجة أن السترة الزرقاء بعض الازرار ماتسكر معه ، ولا خلوة يكمل المقابلة التخصصية الأخيرة . بشكل عام يقول مافية تشدد على الجامعيين ماشفتهم رجعوا من قروبنا إلأا هذا . س/ كم الوقت اللي أستغرقتوة من وصولك لين طلعت نهائياً ؟ من الساعة 4 حتى الساعة 9.30 تقريباً ، لانهم أنتظروا الباص على ما أعتقد أكثر من نص ساعة ومع التفسيخ أخذو نص ساعة أكيد ، لكن تمر بسرعة مافيها أنتظار كثير أطول أنتظار هو حق الباص الباقي لايتجاوز أنتظار ابو 5 إلى 10 دقائق . س/ متى الفرز النهائي ووش المرحلة الجاية ؟ ج / مدري ( شايفني رئيس لجنة قبول الجامعيين ) قالوا أنتظر الفرز الثاني وانا أنتظر من بعد ماطلعت . س/ كم عدد المقبولين تتوقع السنة هذي ؟ ج/ من 200 إلى 150 من جميع التخصصات ، والله أعلم . س/ دبرت لك وساطة ؟ ج/ واسطتي رب العالمين ، وهذي صحيح الرجال أعرفة شخصياً يعني ماهو ذاك الواصل مع كامل تقديري وأحترامي لصديقي العزيز ، يمكن واسطتة ولد عمة اللي سلم الأوراق نيابة عنه وانتهت مهمتة من تسليم الأوراق . ـــــــــــــــــــــــــ هذا اللي طلعت منه وتعليقي على كلامه : 1- استعينوا بالله وتفاؤلوا برب العالمين ولا أحد يتررد سواً زايد وزن أوناقص أو ناقص طول ، أتكلوا على مقسم الأرزاق ، وهو الكريم اللي محداً باكرم منه . 2- أثبت نظريتي وكلام الشباب اللي سابقاً قدموا بأن وزارة الدفاع تهتم بالجامعيين ، والواسطات أقل من غيرها . 3- أتمنى أن التقية بالدورة وكل من يقرأ هذي الحروف .