شباب انا راجعت الصفحات السابقة ، وأشكر العضو سليمان نايف وحلم قانوين وبقية الشباب اللي تفاعلوا ، وهي ماهي بغريبة عليكم ، وفالكم القبول النهائي جميعاً ، إن شاء الله يارب .

لاحظت أن اغلب الاسئلة المتكررة تدور حول :
1- موقع العيينة ، أو موقع التدقيق الأولي .
2- إجراءت الكشف والمواعيد .

ـــــــــــــــــــــ
الشباب كفو ووفو ، لكن بعيد الوصف والخطوات للشباب اللي يبون يسلمون الايام الجاية .
ــــــــــــــــــــــــ

الوصف :

تتجة إلى طريق (القصيم والدرعية والعيينة وصبلوخ وحريملا وثادق) ، كل هذي المسميات ترى طريقها واحد يعني لاتشتت وتضيع وتظن أن لكل ديرة طريق ، كلهم على طريق واحد لذلك مادمت تشوف لوحة تدلك لاحد المواقع هذي اتبعها.
طبعاً ما قادر أحدد وصف واحد واجبر الشباب يجون معه من داخل الرياض ، لان اللي ساكن بالجنوب راح يجي مع الجسر المعلق واللي ساكن بالوسط راح يجي مع طريق الملك فهد واللي ساكن بالشمال بيجي مع الدائري الشمالي من عند مخرج ( 5-6 ) وزي كذا يعني.
موقعك الحالي هو اللي بيحدد لك من وين تبي توصل لطريق العينة ، لكن المهم أنك تطلع لطريق الدرعية وكثير من اللوحات تبي تدلك للدرعية .

ملاحظة فية لوحات للدرعية القديمة ، هذي طنشها مالك فيها صلاح

خلك على طريق صبلوخ وفية أكثر من لوحة توصلك للطريق.
نفرض الحين أنك مسكت طريق الدرعية من عند بداية ، وباقي على الدرعية كليو تقريباً .
تمشي وتتعدى الدرعية على يدك اليمين وانت ماسك الطريق السريع ، خلك على طريقك ، إن جتك لوحات وانت بنفس الطريق مكتوب عليها ( العينة ، حريملا ، صلبوخ ) معانتها أنت بالطريق الصحيح .

خلك على نفس طريقك لين تشوف ( كلية الملك عبدالعزيز الحربية ) على يدك اليسار ، تعدي الكلية وانت بنفس طريقك ، أحسب تقريباً من 4 كليو إلى 7 كيلو تقريباً ، راح تجيك زي الديرة الصغيرة أسمها سلطانة على يدك اليمين ، أبداً راح تشوف على يدك اليسار مدخل البوابة للتقديم وقدامها المحطة حقت ديرة سلطانة ، هذي هي البوابة اللي تدقق أوراقك فيها ، وقف بعيد شوي عن السيارات ، عشان مايجي واحد مطفي النور ويقف وراك ويسد عليك الطريق ، همن تلبش كيف تطلع سيارتك ( صارت لي ) .

خطوات التسليم :

1- راح تلاقي عسكري عند البواية ، ويوجهك للجنة التدقيق حقت الجامعيين .
2- طبعاً لازم تتاكد قبل لاتمشي أن أوراقك كاملة + أن معك صور مقاس 3×4 عددهم لايقل عن أربعة + أن ملفك يكون شفاف من قدام وتقدر تخرم الاوراق فيه ، لاني لاحظت أن فية واحد جاي بملف أخضر علاق ، وفية واحد ثاني جاي بملف شفاف سادة ماتقدر تخرم الاوراق وتحطها فية ورجعوهم يجبون الملف المطلوب ، وهذا نموذج للملف حطة أخونا تهامة :

3- راح يعطيك ورقة الكشف الطبي + كرت موعد ، ويطلب منك تجلس هناك على الطاولة تعبئها وترجع له مرة ثانية ، طبعاً الورقة هي ورقة الكشف وخلفها أسئلة عن الربو والدوخة والامراض النفسية والصرع وغيرها من الامراض التي تؤثر عليها العسكرية ، طبعاً بعد ماتخلص من تعبئتها ( ماتخذ ثلاث دقائق ) ترجع له وهو يبي يدقق في اوراقك ويختم على الصور ويسالك متي تبي موعدك وأكيد أنه يبي يخيرك مابين الاحد والاثنين والثلاثاء اللي هو آخرموعد للكشف وليس للتسليم ، يعني لاحد يفهم أن أخر موعد يوم الثلاثاء للتسليم ، ( أخر موعد للتسليم هو يوم الأثنين تاريخ 24/8 ) ، وانت عاد أختر الموعد اللي يناسبك .

4- راح يسلمك جميع أوراقك ويقول تسلمها لهم هناك ومعك الكرت اللي عبيتها والورقة ، وهي مختمة ، ويقول تكون موجود الساعة اربعة الفجر بطريق الملك عبدالعزيز امام الشعلة سابقا ًوالحين الظاهر أسمها فلنسيا ، عند الكلية القديمة .

إجراءات الكشف الطبي الأولي هي :

1- العين وتشمل : ( عمى الالوان ، والعضلة ، والحول ، وغيرها )
2- الباطنية .
3- الاسنان .
4- العيادة النفسية وسلامة النطق .
5- الطول والوزن .
6- المقابلة الشخصية .
7- الانف والاذن والحنجرة.
8- الفحص المخبري .
9 فحص العظام.
10. الفحص الجراحي.
11- الفحص الاشعاعي .
12 مقبولين كلم إن شاءالله .

ــــــــــــــــــــــــــــــــــــــــــــــــــ ــ
طبعاًَ الاجراءت هذي ما أخذت معي أكثر من عشر دقائق مع التعبئة والتدقيق والتختيم .
تعاملهم مميز جداً جداً ، لدرجة أني جلست أسولف أنا وعسكري أسمراني ، أسائلة عن عدد المتقدمين عن تخصصي ، وسالته عن وزني هل أصلح للعسكرية وإلا اضرب الباب من الحين قعد يضحك ويقول تفاءل خير ويجي منك عسكرية ههههههه .

موفقين خير جميعاً .