هلا بن صيتان شوف ما دام فلوسك زاهبة ما عندك مشكلة يزبطون أمورك و يخلونه لك شهر و يسموه كورس مكثف أقلك شغلة قبل تقريبا 4 أو 5 سنوات ما كان عندي في المدينة الا بيرلتز دخلته قبل ما ادخل انجليزي و كان التيتشر من أمريكا المهم أنا زي وقتك تقريبا كان في الصيف فاعطوني كورس مكثف تقريبا شهر و أسبوعين قل شهر لان آخر أسبوع كنا نجي نطقطق بس المهم و بعدين جينا عالاختبار كانت التكلفة 2000 ريال الفين

هذا زمان لسا ما فتح وول ستريت بس أنا أسمع الناس مرة يمدحون وول ستريت الرجالي مرررررررة خذ رقمهم من الالستعلامات و كلمهم و فهمهم السالفة كلها هما ما راح يقولون أي شي ما دام معاك فلوسك و بالتوفيق و بشرنا اش يصير معاك و شوف كمان رقم نيو هورايزون و بيرلتز دق عليهم و اسال يصير حلو تاخذ الهرجة منهم دايركت أفضل هذا شي سمعت كمان فيه معهد اسمه الخليج بس ما ادري صراحة و الله يوفقك و ييسر أمرك

الحين بالنسبة للجامعة أنا سمعت ان أغلب جامعات المملكة صار فيها نظام السنة التحضيرية يعني تدخل هذي السنة التحضيرية و يعطوك مواد عامة انجليزي و حاسب و لغة عربية و قرآن و مدري اش كمان اذا خلصتها على خير ان شاء الله و بمعدل تمام تقدر تدخل أي قسم تبغاه بالنسبة لمادة الانجليزي في السنة التحضيرية أنا شفت المنهج و الله تريقة تذكر اللي كنا ناخذه في المتوسط اذا جاء حرف علة في الكلمة نحط قبلها آن و اذا حرف سالم نحط آ و مدري وشو و الله سهل بس يبغالك تىخذ الموضوع بجدية لان فيه ناس على الرغم من سهولته تعثروا و الله مو صعب بس استهونوا و على فكرة الأسئلة مو من الأستاذ لا من الشركة شركة أجنبية هي اللي تحط الاسئلة و الأستاذ ما عليه الا يشرحلكم

بس جامعة ام القرى ما طبقت هذا النظام على حسب ما سمعت يعني اتوقع على طول بتدخل قسم انجليزي و بتدرسه مواده أنا صراحة ما عندي خلفية عن خطة جامعة ام القرى لتخصص اللغة الانجليزية بس عموما في كل الجامعات اول مستويين تأسيس و يركزون عالمهارات الأربعة الأساسية القراءة و الكتابة و التحدث و الاستماع يعني ان شاء الله بتتأسس صح يعني بيعطون مادة ريدينج و رايتنج و فونيتكس اللي هي صوتيات و بيعطونك يمكن مادة في الأدب بس شي بدائي مرة اتوقع خاصة اذا الانجليزي خليطي أدب و لغويات

ان شاء الله ان شاء الله اذا انت صامل الكورس هذا اللي بتاخذه من المعهد بيحطك على اول الطريق و بتدخل و عندك خلفية يجي منها في الانجليزي يصير تدخل القسم ان شاء الله وانت تفهم اش قاعد يقول الأستاذ و اكيد أشياء قد درستها في المعهد ما دام المواد لسا بسييطة و مواد تأسيس

أحب أقلك اذا كلمتهم و اخذت العلم من المعاهد زي الناس لا تشيل هم فين المعهد و ما فين احنا اذا رحنا جدة كذا نسوي نعطي تاكسي 10 و لا 15 لانه مستحيل يوصفك ببلاش قله وين المعهد الفلاني و امش وراه بسيارتك بدل ما تقط وجهك على فلان و علان عشان يدلونك

أعتذر طولت عليك بس يشهد الله حبيت أفيدك بكل اللي أعرفه و ان شاء الله الأخوان ما بيقصرون

و تراني عند كلمتي اذا تبغى حاجة ولا شي انا في الخدمة و ما يردك الا الكيبورد
موفق و عقبال ما نشوفك دكتور في الجامعة