المشاركة الأصلية كتبت بواسطة فريق التحدي

توني جاي من المقابلة (الرياض)

والله يا طحت لكم في لجنة الله بهم عليم ,, قعدت معهم 10 دقائق وتعتبر مدة طويلة .. لأن باقي اللجنات ما تجلس معهم أكثر من دقيقتين وبعضهم دقيقة بدون مبالغه

كل لجنة مكونة من شخصين .. والدخول على شخص واحد لكل لجنة

أغلبهم بشوشين وضحك ووناسة ,, لكن حضي طاح باثنين متشددين ويدققون لدرجة ان العرق يتصبب منك أمامهم

المقابلة كالتالي: (طبعاً تخصصي لغة انجليزية)
1- عرف بإسمك: فلان بن فلان .. تخرجت من الجامعة الفلانية .. تخصصي لغة انجليزية
2- ليش اخترت اللغة الانجليزية: جاوبتهم
3- عطني أشوف السجل الأكاديمي حق الدرجات ,, عطيته وقاعد يتصفح ,, والثاني قعد يكمل أسئلته
4- هل طبقت في مدرسة ؟ جاوبت لا .. قالي لييييش !! قلت له محد وجهني أطبق في مدرسة ولا عندي خبر !! وقعد يقولي ليش وما ليش .. في الأخير سألني الثاني وقال لحظه لحظه !! انت قلت من أي كلية متخرج ؟؟ وقلت له .. قااال آهاااااا انت غير تربوي صح ؟؟ قلت ايه ... قال عشان كذا محد وجهك تطبق في أي مدرسة .. قلت ايه عشان كذا .. وقال خلاص فهمت.
5- لو طلبنا منك تقدم محاضرة بالانجليزي في ندوة اسلامية .. هل عندك الاستطاعة؟ قلت له عندي القدرة على التحدث بالانجليزي لكن بما ان الندوة حتكون مصطلحاتها اسلامية .. فأنا أحتاج إلى تدريب منكم لأتعرف عليها ... قالي صح عليك .. هذا اللي كنت أبغاك توصل له.
6- رجع الأخ اللي طلب مني السجل الأكاديمي حجر لي وقال ليش عندك رسوب كثير وكل ترم تشيل معاك كم مادة؟؟ (طبعاً الشيء هذا زعله جداً لدرجة اني أشك بأنه بيسقطني في المقابلة) ايه والله ... قلت له لما دخلنا الانجليزي اتوقعنا بأننا بندرس من الصفر .. لكن طلعت الدراسة من النص .. وبعد ما رسبت .. أصريت اني آخذ دبلوم لغة انجليزي عشان أحسن مستواي وأقدر أكمل البكالوريوس .. وقد ما كنت أبرر له .. ما كان مقتنع وكل شوي يقولي (بس ليييييييش) ليش هالرسوب أكثر من مرة !!! وانا والله طلعت من المقابلة وانا قلقان من انه يعرقلني بسببها.
7- وش تعرف من آخر الأحداث عندنا في المملكة؟ قلت له الثورات الشعبية.. قالي !!!!! أنا أقولك في المملكة مو في الدول الثانية !! .. قلت له القرارات الملكية .. قالي أخر شيء يعني أمس والا قبل أمس ... قلت الإعلان عن الدفعة الثالثة للبنات .. قالي صح .. قلت والشباب عن الوظائف الادارية والصحية .. قالي وش بعد .. قلت اممممممم وضحكت .. قلت له ما أدري وش تقصد هل تقصد أمور سياسية والا عادية والا ايش بالضبط .. قالي أبي وش آخر شيء صرح فيه الملك وشهو القرار ؟ سكت وابتسمت .. وقالي خلاص.
8- الثاني قالي خلاص الله يوفقك وانا أنصحك تاخذ دورات في التربية لأنها ضرورية وقلت له ان شاء الله وهذا أكيد. وعطوني الكشف الطبي وقالولي كمل اجراءاتك وبالتوفيق ,, واتشكرتهم.

بصراحة اللجنة في قمة الأخلاق وعداهم العيب ,, ونعم الرجال ,, لكن قد ما شفت منهم الإصرار في الأسئلة والتشدد في المقابلة .. إلا اني اسأل الله لهم التوفيق ,, وأتمنى انهم يكونوا سبب في قبولي للتعين.

بكرة بروح مستشفى الملك سعود في الرياض وبعد كذا باخذ النتيجة وأتوجه للخدمة المدنية .. وبعدها أتوقع بتطلع أسماء نهائية واللي بيطلع اسمه يروح يوقع العقد ويتوجه لمدرسته. والا ايش رايكم يا شباب !!!

هل المقابلة روتينية وما فيها رسوب ؟؟ أنا أتوقع ان ممكن الرسوب فيها ليش لا .. ومافي شيء مضمون .. إلا ان الواحد لازم يقول ان شاء الله وبإذن الله. والله يكتب اللي فيه الخير.


الغريب انه ما جاني ولا سؤال بالانجليزي ؟؟؟؟؟؟؟؟؟ واللجنة كانت تسوي مقابلة مع جميع التخصصات.