المشاركة الأصلية كتبت بواسطة إبتسم

الحمدلله طلعت من المقابلة ومعي الكشف يعني مجتاز بفضلٍ من الله

طبعاً أنا موعدي يوم الأحد الساعة 12:00 بجدة : )

لكن جيتهم اليوم " السبت " الساعة 11:30 وبلحق موعد الساعة 12:00

طبعاً بعد ما أخذوا معظم الشباب شافوني أنا ومجموعة جالسين وقالوا إنتم متى موعدكم قلنا الساعة 12:00

قالوا طيب وراحوا دوروا في الأوراق وقالوا متأكدين قلنا متأكدين خخخخخ

وبعدها قلنا ترى حنا يوم الأحد لكن معروف إن الساعة لادقت 12:00 يوم السبت فهذا صباح الأحد يعتبر بالتقويم العالمي

فقالوا تعالوا بكره لكن واحد من المشرفين مطوع مثل العسل وقال ترى كلهم 8 خلهم يدخلون

وبعدها سألنا واحد منهم قال تبون تسونن المقابلة اليوم ولا بكرهـ أزين لكم

قلنا يارجال نسويها ونفتك من همها قال ترى بتنتظرون ساعتين قلنا مو مشكلة

والحمدلله مامرت 50 دقيقة إلا وندخل ويطابقون البيانات ويرسلوننا ع القاعات وكلن ينتظر مقابلته

دخلوني في القاعة عند 2 زي العسل كلهم إنجليزي مافي أحد تربوي لكن عندهم خبره ومعرفه

واحد منهم طلع دكتور : )

المهم لما سألني عن إسمي وقبيلتي إنبسط ويسألني وين ديرتكم وليه ماجبتلنا حليب خلفات ومن هالكلام والمزح

وبعدها قال تكلم عن نفسك بالإنجليزي ويادوب كملت جملتين إلا ويجي خويه ويعطيني ورقه ويقول عبي هالورقة فقلت له طيب خلني أجاوب على زميلك قال لامسموح

الورقة كتبت فيها إسمي وسجلي وموعدي لإني جاي قبل الموعد بيوم

وبعدها سألني لو واحد سوى شي فاصخ في الفصل وش تسوي له فقلت أعاقبه بحدة النظر ومن هالكلام وللأسف راح عن بالي إني أقوله أحيله للمرشد لإنه شي مو بهين فعل الولد : )

وبعدها قال ليش معلم .؟

قعدت أتفلسف وإني شلت على عاتقي مخرجات التعليم ومعرفة مكامن الخلل وإن كل الناس تنقد ع إن طلابنا مايفلحون في الإنجليزي ومن هالكلام : )

قال طيب هل من حل عندك .؟

قلت له أنا مهما سويت الطالب لن يتعلم إلا إذا أحب المادة فأنا واجبي قبل كل شي إني أحببه فيها وأكسبه لصفي كي يرغب في التعلم

قال كيف .؟

قلت أغلب الطلاب يستعملون الكمبيوتر ويلعبون بالألعاب صح .؟

قال إيه .

قلت خلاص أنا أشوف هالمجموعة وأحببهم في اللغة عن طريق ألعابهم لإن أغلب الألعاب فيها قصص حلوة وممتعة والطالب يجيه شغف إنه يفهم مردود القصة ع البطل ويتوسع ومثلها مثل الكمبيوتر

قال أجل أنت تؤمن بإستعمال التكنولوجيا الحديثة في التعليم ؟

قلت أكيد

وسألني وقال طيب لو جاتك وظيفة حلووووووووووة براتب أكبر من راتبك بكثير كمعلم

وبالمدينة اللي تبيها توافق ! .؟

قلت : لا لإني أرغب إني أكون معلم وبالأسباب اللي أسلفتها سابقاً

قال : أكيد قلت : أكيد

قال روح وفقك الله وعطوني الكشف وبسّ : )

تقريباً جيت 11:30 وماطلعت إلا 2:07



..

أهل جدة بالنسبة للكشف .؟

قال لنا واحد روحوا للخدمة المدنية وهي تحدد لكم المستشفى

فهل حصل لكم مثل هالشيءْ .؟ والخدمة من كم لكم دوامها .؟

وسمعت من أغلب الشباب إنه مافيه إلا المستشفى اللي في مدائن الفهد

فهل فيه غيره .؟

وشُكراً

وأسأل الله لكم التوفيق : )