اول شي السلام عليكم

مسائكم خير وبركة يارب ومن العايدين ماباقي الا اسبوعين على العيد

اليوم 17\9 موعدي للمقابلة الشخصية في قوات الامن الخاصة

الي حصل:

جيت على الساعة 9 وركبنا الباص طبعآ من البوابة الغربية غيروا مكانهم عشان السياارات تكون قريبة من مكان التقديم ووقفنا امام المصلى وجلسنا يمكن 5 دقايق الا العسكري جاي
قال الاسامي الي فالصفحة الاولى ولحسن حظي طلع اسمي فيها ودخلنا للمقابلة
المطلوب : بطاقة الاحوال الاصل\كرت العائلة الاصل\6 صور شخصية 4×6
صفينا على الباب وبالدور ندخل واحد واحد
جاء دوري انا
ودخلت على 5 اشخاص 4 ضباط وواحد اتوقع دكتور نفسي لمهم سلمت الملف ورجعت على الخط الابيض
وقال\ شسمك
قلت\ رائد
قال\ اسمك كامل
وعطيته اسمي كامل وانا رافع صوتي وووقع على الملف وعطاه الي جنبه وقعد يسألني ابوك وين يشتغل ووين ساكن وجيت عند الدكتور النفسي
قال\ كم نسبتك ومافكرت تدخل الجامعة طبعآ
وقال انت تعاني من القلق
قلت لا الحمدلله لو اعاني من القلق ماجبت النسبة هذي
قال تعرف القلق وش معناه
قلت القلق هو انك تبغى شي ويحصل عكس الشي ذا
قال لا ..القلق هو زيادة الثقة في النفس
وقلت المعلومة ذي طال عمرك اول مرة اعرفها منك وقعد يضحك وعطاه الي جنبه طبعآ انسان عادي
قال انت تدخن والا لا
قلت لا
وقع على الملف وعطاه العقيد طبعآ العقيد قوي شخصية ترتبك غصب قدامه
قال ضم رجلينك وارفع الفانيلة
وسويت الي قال ثم قال تعال ابسط يدينك واقلبها
ثم قال وش في وزنك زايد.. هو متعدي ال100 قلت لاطال عمرك وزني من 98 ونازل بس اتوقع اني في رمضان جبت العيد وسلمت على ال100 وقعد يضحك
ثم قال اقرأ الجريدة وقريت وقال اقرأ ماتيسر من القران وقريت له وبعدين قال من هو سيف الله المسلول قلت خالد بن الوليد قال من هو ثالث الخلفاء الراشدين قلت عثمان بن عفان قال ويلقب ب ذي وقلت النورين وقال ماشاء الله عليك واشوف الضابط الي بجنبه بناظرني ويغمز بعيونه ان الامور تمام
وطلعت واخذت 5 دقايق الا جايني الملف وفيه الكشف الطبي والبصمات وكل شي
قال الكشف الطبي يوم 12\10
والبصمات يوم السبت الي يجي ذا

وطلعت من عندهم وجيت وحبيت اعطيكم دفعة تفاؤل للي باقي ماقابلوا مقابلة شخصية

نصيحة خلي شخصيتك بارزة وصوتك قوي وتراهم مايرفعون اصواتهم يختبرون السمع عندك وسرعة البديهة عشان كذا خلك مركز وجاوب على السؤال ولاتكثر حكي واجد وفلسفة كثير

صدقوني 3 اشياء رئيسية وتنجح ( شخصيتك+صوتك+سمعك) موب مهم تجاوب صح والا غلط حاول تاخذ وتعطي لكن بدون فلسفة

وبالتوفيق لكم يارب

قيموني ولاتنسوني من دعواتكم

اخوكم \ رائد