في عام 2090 ميلادي كنت توني في عز شبابي والحمدالله اني انولدت في هالتاريخ التكنلوجي والزمن المتطور لدرجة ان بدال الشغالات جايبين لنا رجل ألي يمشي على كفرات هو اللي يطبخ
ويكنس ويغسل الحوش ويجيب الطلبات ويولع لك الدخان ون تسان تبيه يلف ويفرط لك ركب له برنامج الصحن وازهله ابد كل اللي عليك تشبكه
بالشاحن بالليل وقوطي شحم تشحم به الركب والمفاصل عشان ماتطلع صوت وتتاْكل وهو عاد مايقصر يدهر بالنهار ومن زود الطفره كان عندي طيارتين بالسطح وهلي كوبتر عشان لابغيت اطعس بالثمامه انا وخوياي رحنا فيها لأن زمن السيارت ولى مع غبرة تاريخ 2040 ميلادي وماعاد فيه شي اسمه سيارات ولاقطارات وكل وسائل النقل القديمه اتلفت
كان ودي اصور بيتنا تشوفون التطور اللي عندنا
تصدقون لابغيت مويه يكون الرجل الالي نايم اوطالع يسربت مع
المرأه الاليه حقت الجيران ارص الجدار ويطلع لي خيارات لان جدران بيتنا مزوده بشاشات بلازما على الطاقه الشمسيه بعد ماتطلع الخيارات
يقول لي اختر من القائمه اقوم ارص على المطبخ وتفتح لي قوائم كثيره ومن ضمنها قائمة المشروبات ارعص على مويه ويتفتح شي جنب الجدار ويطلع لي مويه << تلعب علينا انت جايب لي مكينة بيبسي وتقول جدار
السرير حقي كل اهل الحاره غايرين منه
لانه سرير اكتروني فل كامل فتحه وجناح ومعه رادو وسي دي المخده خبال مزوده بخلايا كهرومغناطيسيه تخليك تنام غصب عليك لو انك مشدد بحبتين نايم نايم الله لايعوق بشر لان المخده اللي عندي بمجرد انك تحط راسك تحس انك راكب سفينه على
امواج الثمامه ماتدري الا انت بغيبوبه وتقدر تحط توقيت عشان تصحيك المخده بنفسها من خلال قرصه كهربائيه من فوق راسك تشفط النوم كله اللي
براسك تقوم طوالي بدون ماتحس انك قايم تلاقي الرجل الالي بوجهك معه مسدس مويه يبخخ على وجهك ويلبسك هدومك ون تسان تبيه يشيلك ماعنده مانع
في يوم من الايام كنا حنا جالسين بالمجلس حق الحاره ومتجمعين الشياب والشباب للتباحث في الامور المستجده
حول وجود اطباق طائره من المريخ ناويه تهاجم كوكب الارض وكيفية التصدي لها
وقررنا نشتري بنادق واسلحه اشعاعيه
للدفاع عن الوطن والحاره وبعد ماجمعنا القطه رحت انا لحراج بن قاسم وشريت كل شي ومعهم رجل آلي بس يعرج رحت لم الحاره
ووزعت الاسلحه عليهم واخذت سلاحي اللي كان من نوع xxr15 << يعتبر من الاسلحه المتطوره يطلق شعاع ليزر بقوة 50 م ب طن حتى اني جبت قطو كبير مره بجرب عليه بشوف وش يصير اول ما اطلقت عليه الشعاع بدا يتبخر وصار صغير مره بعدين صار قوطي تونه اخذت القطو ودفنته الله يرحمه
كان يوم خميس مشرق اخذت علبة
ستوب ورقيت للسطح المع كفرات الطياره والاصطبات على رشة المطر
الا واشوف قدامي طبق طائر
ملبق على خزان بيتنا واخذ السلاح حقي واخذ وضعية الاستعداد وينزل واحد منهم قال : بطريييط طوووووووووط طبطوووب قلت : وش تقول انت قال اقول السلام عليكم
قلت طيب وعليكم السلام وش تبون
قال : نريد احتلال الارض
قلت : تخسي وتعقب ماعاد الا هي تحتل الارض وسلاحي يشم الهوى
واقوم واطلق عليه اربع طلقات لين صار كومة حديد
وينزل اخوه الثاني يوم شاف اخوه ميت وتجيه ام العبيد وقام يصارخ يخرب بيتك يابني ادم أأتلت اخويه
ياكلب ياحقير قلت ***** جابته امك خذ تبا لك واجي ابطلق عليه ويخلص الاشعاع
اللي بالمسدس حقي وهو جالس
يضحك قال اوريك الحين ويقرب لمي ويمسكني مع رقبتي واتلاقط انا وياه
عليه يد تقول قطامة حديد حطها على
رقبتي ماعاد قويت انفس واعطيه ركبه تحت بطنه مع ضربه خطافيه بالمرفق اعلى الظهر لين جا مجاوب بالارض ونا اشيله واربطه بعامود اللمبه اللي بالسطح واجيب الزراديه وافصل اسلاكه
عشان مايشتغل مره ثانيه
رحت بجيب السلم عشان ارقا للخزان واخذ طيارتهم اللي جو فيها اول مارقيت انفتح لي باب المركبه وكنت خايف ادخل
ولا مادخل واخاف ادخل ولاعاد ارجع اتصلت على الرجل الالي قلت بسرعه تعال للسطح وهو يجي ويرقى قلت ادخل شف فيه احد ولا لا الرجل الالي ماصدق خبر ابن ***** ركب المركبه وقفل الابواب ونا اطق عليه افتح ياحقير قال على شحم انا اوريك الحين ويقوم ويشغل طيارتهم ويقعد يفحط بالحاره وكل شوي ينصا بيتنا لين بغا يشطفني وينهي
حياتي واقوم واشغل طيارتي واجلس الاحق فيه بالمكرفون ياحقير ترى مب احسن لك لو ماتلبق المركبه قال انا ماصدقت تجيني مثل هالطياره وتبيني البق الخلابس يابني ادم الحين بنرد الدين ويديور علي وهو يطلق على الاشعه على جناح طيارتي وتسبب في
كسره حسبي الله عليه مادريت الا انا موقع على الدائري الشمالي وانزل من الطياره بالبرشوت ويقوم الرجل الالي الحقير ويشغل الاسلحه ودمر حارتنا كلها مع الحاره اللي جنبنا ثم قام والقى قنبله على مولدات الكهرب واحرق البترول وقلع المواصير ماخلاشي ماخربه
وبعد ماخلص مخرب قام وانتحر
رجعت الحاره بالليل وكان كل شي مظلم دخلت بيتنا ارص الجدار ابي مويه ماحولك احد كهرب مافيه
لقيت ابوي منسدح بالصاله قلت خير يبه وش صاير قال غزونا رجال الفضاء ودمورا كل شي عندنا
خلاص كهرب مافيه بترول مافيه رجعنا 100 سنه ورا
سوينا اجتماع بالحاره وقررنا الانتقال الى كوكب القمر لقربه من الارض
اخذنا خيامنا معنا واغراضنا ورز وسكر وشاهي وغنم ورقينا لسطح القمر بحبل طاقينه بطنب هناك
بعد مارقينا طقينا الخيام ماكان فيه احد الا حنا وعجزنا نثبت بالارضيه كل شوي طاير واحد واقوم اطلع الباتكس وكل واحد صمغ رجله بالارض عشان مايتحرك
كان البر حق القمر ابيض يوم جا من بكره وقمنا من النوم حسينا بحراره شديده لين ولد الجيران صايرن سلك كباب على فحم اثر ان الشمس قريبه عندنا واللوح نايم برا وندخل الخيام عن الحراره واشوف طرف الخيمه قام يدخن من الحراره قلت وش رايكم بس نطب ونرجع للارض احسن لنا قالوا يالله يوم جينا نطب على الارض تفرقنا بدال مانطب على تحت طرنا فوق لانعدام الجاذبيه واحد من اخوياي شفته متوجه لم كوكب ليبتون ابعد مكان حاولت امسكه بس القدر اسرع مني وحنا نتطاير بالجو واشوف ابوي واتمسك بشوشته قلت حنا وين رايحين الحين قال مدري اصبر لين يطلع لنا لوحه او شي
واطلع قارورة صحه ابشرب اول مافكيتها طارت المويه واحاول اجمعها بيدي يالله مسكت قطره وشربتها ونا متمسك بشوشة ابوي لايطير عني همن اقعد اصيح بالجو بلحالي
جلسنا كل الليل وحنا نسبح بالفضاء ماخلينا كوكب مامرينا عليه وتعبنا وحنا واقفين بالجو بس كانت فله
انك تطير يديني عرقت حسيت ان شوشة ابوي بتطلع بيدي وافصخ شماغي واربط رجلي مع رجل ابوي
ونجلس نسبح بالفضاء مره سباحة فراشه ومره اتسدح على ظهري
ومره تسوى بيديك تسذا كنك تعوم بمسبح
لين مادريت الا راسي صاكن بذيك الشجره واجيك مجاوب على الارض وابوي ماقصر مادريت الا رجوله داخله في بطني وهو يقول قم صل صلوا عليك ياجليل
الحيا وش تسوي انت قلت هه وشو وين حنا فيه
قال الظاهر انك مكثر امس قلت لا وين الرجل الالي وين جرانديزر وين الشماغ اللي رابطينه مع بعض وشوشتك اللي كنت متمسك فيها وين طيارتي ويقوم ويرش على مويه ويسمي علي قال اكيد الحلم فضيع قايل لك لاتشوف افلام اخر الليل
مايستفاد
هل عندك استعداد تعيش بدون كهرب
لو خيروك تعيش اسبوع على ايام عدم وجود الطاقه بأشكالها لاكهرب ولاسيارات ولاغيره
فجأه تلاقي نفسك بالعهد العباسي توافق
لاتناظر افلام مرعبه بالليل وتصكها نومه لانك دايركت بتدخل اكشن معهم
وبس خلصنا من القصه ..
العذر نسيت لاخبركم ان هذا ماهو حلمي حلم جارنا في احد المنتديات