اقتباس:
المشاركة الأصلية كتبت بواسطة محتاااج وووظيفه
بسم الله الرحمن الرحيم
السلام عليكم ورحمه الله ,,,
طبعا طلعت من البيت الساعه 8 ,, ورحت لام الحمام مع ليموزين عند مركز قوات الامن الخاص
لاقيت باصات وطبعا من بعيد راح تعرف لان في شباب متجمعين هناك ... المهم ركبنا الباصات
.. في شباب لابسين زي سعودي شماغ وثوب ,, طبعا توهقوا,, راح يقولك اللي هناك ,, اللي معه صور ومعه بطاقته الاصل يقول واللي مامعه بعد يقول ,, في شباب مامعهم ,, قالهم انتوا اول مره قالوا ايه ,, قالهم اوكيه مو مشكله .. بس ثاني مره مع الباب .. مشينا داخل مبنى القوات الخاصه ونزلنا من الباص في مسجد ,, والله نااس كثيره ,, متواجده ,, شفتها ,, المهم وصلت الساعه 9 بالضبط ,, صفونا طابور وقالو خشوا المبنى خشينا ,, وطابور طويل عريض 
المهم بعد الزحمه وصلنا عند اللجنه اللي تسجل معلوماتك وماشاء الله اخلاق وابتسامتهم تشق الوجه
وبعدين جلسنا عشان نروح على اللجنه الاخرى تبع الطول و الوزن والنظر والعظام ...
بعد الوصول الى اللجنه اول شي طول و وزن ,, طبعا ميزانهم ينقصك بالطول و الوزن ميزان كذاب
انا طولي 180 واكثر بعد ,, خلوني 176 ونص ,, والوزن يمكن 84 خلوه 81 ,,
بعدين يقولك ارفع سروالك فوق عشان يشوف سيقانك وركبك ,, وبعدين تروح عند واحد يقرر هل وزنك وطولك زين ولا ,, ويوقع انك تمام ,, بعدين ,, النظر ,,
المهم
شباب اللي شعره كثير لايحلق الحين وربي ناس شعورهم تحت كتوفهم ولا قالوا لهم شي
-
لاتجي بالثوب وربي يفسخون لك وشرهه قدام الناس
-
جوالك صامت ولا تطلعه ابد يطردونك
-
لاتسولف مع احد
-
خلك منتبه موب نايم ترا يمسخرونك
-
لاتعابط لان في رقيب هناك مايرحم واحد قزم اصلع راعي نظاره
-
اذا كنت دب من الحين لاتروح ابد ابد ,, وربي مشوهم وحنا نشوف
-
اذا سئلك العريف كم طولك ولا كم وزنك .. لاتسكت ولا تقول مدري ,, قوله شروط التقديم ثابته علي
-
روح لابس ملابس رياضيه بدون جزمه
-
اذا وصلت عند لجنه الطول و الوزن ,, حاول تمدد جسمك لفوق بقدر ماتستطيع لان ميزانهم كذاب ينقصك كثير ..
--
وانت خاش على لجنه القبول على يسارك الدكتور حق النظر انت حاول تطالع الورقه وتحفظ اتجاهات الحروف الاخيره واللي قبل الاخيره احفظها حفظ اذا نظرك تعبان
--
وطبعا في اكثر من دكتور ,, سعودي وهندي مدري باكستاني والله مدري وش جنسيته بالضبط ,, اتمنى انكم تطبون على هالادمي ذ1 لانه كويس ( طبعا معاي واحد عتيبي ,, ماشاء الله طوله و وزنه تمام ومعه دبلوم برمجه ,, طب عند السعودي ,, الولد ارتبك لخبط شوي قاله تعال انت غير لائق ,, المهم انا طبيت عند هالدكتور اللي اقولكم عليه ذ1 طبعا راح يقولك تعال عندي عطني ملفك و الورقه وراه مباشره انت حاول تلقط لك كم حرف من اتجاهات الحروف الصغيره ... المهم قالي تاخذ هالورقه وتروح تقعد على الكرسي وتغطي عينك اليسار و تقولي بأتجآهآت الحروف رحت وغطيت وشفت الحروف تقريبا كلها الا الاخيره لخبط فيها ويساعدك كثير لدرجه اذا لخبطت يقولك حاول تركز يعني افهمها ترا خطا آجآبتك ,, وقالي بعدين غطي اليمين غطيتها وشفت كل الحروف الا الحروف الاخيره واللي قبل الاخيره ,, قالي اوكيه خلاص تعال ,, قلت له مامشى الحال صح ..؟ قالي الا مشى بس حاول تضبط اليسار لان هناك ماراح يمشوك بالمستشفى ,, والله انه كفو موب مثل السعودي المطوع ,, وهق الناس )
وفي مطوع مصري والله مدري عن اخلاقه كيف ,, المهم انه يكشف عن عيونك يشوفك مركب عدسه او لا ,, وبعد السعودي يكشف ,, والله في ناس مشوهم عشان النظر و الوزن المصيبه ميزانهم كذوب يارجال ,,,
وبعدها الحمدلله انا مشيت وعطوني موعد في 20 / 10
الجدير بالذكر ,, اهم المقابلات الشخصيه ..
في واحد ركبنا انا وهو في ليموزين واحد وكنا نسولف ,, قلت له وشلون المقابله قالي بسطيه مره انا استغربت قلت له ,, وش صار علمني.. قالي دخلت عليهم سئلوني كم سؤال ماعرفت شي اخر سؤال قالوا مين امير الرياض جاوبتهم ,, وعطوني اوراق المستشفى,, قلت انت تمزح ,, قالي ليش قلت له ناس جاوبوا ع كلشي ورسبوا قالي لامستحيل ,, اهم شي ترفع صوتك قدامهم ,,
اهل الواسطات ,, ياربي ,, والله بالاسماء ينادوهم ,, فلان بن فلان تعال
وهذ1 كل اللي صار وادري طولتها وهي قصيره بس بالتفصيل قلت كلشي عشان ابين لكم وش الاوضاع هناك
والسلام عليكم واتمنى الكل يتوفق ويتوظف ويشوف حياته
اي سؤال انا حاضر |
طيب يالخوي اليه لابس نظارة شوضعها يحط عدسات وله كيف اتمني الاجابة