السلام عليكم

حبيت اقدم لكم تجربتي الأولى في بيع التمر

اول ما بدات الفكره كنت متردد كثير ولكن بعد تجربه اخونا الغالي دماغ تجرأت و فكرت اني اروح اشوف سوق عتيقة للجملة الفجر
تفرجت وشفت الاسعار وبعدها توكلت على الله ومشيت في نفس اليوم العصر للقصيم
وصلت القصيم بعد التراويح ودخلت للسوق اتجول وإذا بأسعار الرياض ارخص بكثييير
اتصلت على واحد من الشباب قلت له بكره تروح للسوق وتجيب من الرياض الدنيا معكوسه!!
راح للسوق وقام يسأل كثير من تجار التمر اتهموه بالجنون وان هذه الطريقة خاسره
بلغني بهذا الكلام بديت استفسر من اهل السوق واخر شي وصلت لنتيجة ان التجار
يجيبون التمر من المزارع مباشرة بسعر رخيص وان سبب الغلاء ان السوق عالمي وله شروط ومواصفات طلعت من السوق وجهتي الرياض بعد الفجر بدون اي نتيجة تذكر

ارتحت في الرياض وبعد الفجر رحت لسوق عتيقة افر وافر واشوف الحراج وادخل في مزايدات وما رزقني الله بنصيب

شريت من برا المزادات الصندوق الصغير من 25 ريال وهو سعره في المزاد ما يتعدى 22 ريال
تمر سكري درجة ثانيه وخذت 50 صندوق وبدات رحلة البيع اتجهت مباشرة لسوق الخميس في اسواق الشمال وجلست فيه إلى صلاة الظهر وبعدها التعب اخذ مني ما اخذ سفر وسهر متكرر وبيع قليل
وانا طالع قالي احد الباعه ان بعد صلاة الظهر يبدأ السوق فرفظت وخذت تمري ورحت للبيت
وانوم إلى وقت الفطور وافطر واعين من الله خير واروح لأحد المساجد استعداداً لصلاة التراويح
وبعد الصلاة بقي معي ما يقارب 25 كرتون اخذت التمر للبيت والفجر طلعت لسوق عتيقة املا بالحصول على صناديق وجوده اعلى وتفاجأت ان الأسعار في ازدياد وقاربت الدبل !!!

وكان في وقتها تركيزي على السكري الرطب فقط بعد تفاجئي بالأسعار
بدات ابحث عن انواع اخرى وجدت احد الباعه يبيع تمر برحي بسعر صندوق كبير بـ8 ريال
خذت 3 كراتين ورجعت للبيت وعند اقتراب صلاة العصر اخذت التمر وذهبت به لسوق الشمال للتمر
وبدأت في البيع وقسمت كرتونين برحي على كراتين صغيره بـ5 ريال والحمد لله ذهبت بسرعه
وبعت كرتون كبير بـ20 ريال

وبقي معي من التمر السكري 6 كراتين للبيت

وكانت تجربه متعبه جداً والتصريف صعب والحمد لله اني قدرت ارجع راس المال ومكسب بسيط
لا يتعدى 200 ريال

طبعا بعد هذي التجربه دخلنا في العشر الأواخر فقررت التوقف لأن هذي التجاره ظيعت علي صلاوات كثيره بسبب عامل الوقت في البيع فانت محدود في وقت معين للبيع

فبعد التوقف بدأ يدور في خاطري كنز التمر السكري

فياليت اللي يعرف اسرار هذي التجاره يفيدنا ولو بالشي البسيط
واكون له من الشاكرين