صباح العطر ... والطاعه ...

صباح الامل ... والحب ...

الحياة أحلى ... بس نحتاج وقفة صادقة ...

ماحب الفلسفة ... وتخصصي ابعد مايكون عن كلام الانشاء ...

واللي بكتبه أبعد ما يكون عن مثاليه ...

ودي اتكلم بمنطق شوي وعقلانية ... وتكفون تكفون اقروني بألبابكم مب بمشاعركم ....


كلنا نتنظر الامل ... كلنا ننتظر الفرج ...

بس بقولكم عن تجربة ... الكدر يخلي تفكيرك مشلول ... واليأس يخليك انسانه سلبيه مب إيجابية


اتفهم ان وضعنا مزري ... واتفهم أيضا ان اعصابنا مشدودة ...

بس فيه شي غايب عن الكل حبيت اقوله :

قرأت بأحد المنتديات ان الواسطة مشتغله وان التعيين مايجي الا للي عنده واسطة ...

صدقوني لو المسألة واسطة ماجلسوا كل هالوقت ...

بكذا انتم تظلمون دائرة كامله ... تداوم حتى بأيام العيد عشان تسد الاحتياج وبشي اسمة مفاضله ...

ماقولكم ان مافي واسطة ... بس السؤال بنسبة كم ؟؟

ع فكرة بعض الدوائر تبتعد عن الواسطة عشان العيون مسلطة عليها واي شكوى توديهم بستين داهية ... وهالشي حاصل بالتعليم حريصين اشد الحرص بهالناحيه

المنطقة اللي انا فيها اقسم بالله التعيين يجي بالترتيب ... الاولى على الدفعه ثم الثانية ثم اللي بعدهم ...

اللي تجيب امتياز ومؤهلة فعلا ماتجلس بدون وظيفه ياما تتوظف بالحكومة او اي قطاع خاص يرحب فيها ...

ع فكرة وحده من قريباتي ابوها يقدر يوظفها برمشة عين :

بس تدرون وش يقول لها ؟؟

يقول لها والله لو وش تسوين ماخليك تاخذين مكان وحده احق منك وانا السبب ..


ليش غابت عنكم هالنوعيه ... لو خليت خربت ...

الجانب الثاني اللي يبتعدون عن الواسطة لانها بتطيح على روسهم بالنهاية ومحد بيجامل ع حساب مستقبله ومكانته وكرسية الدوار

لذلك النسبة ضئيلة ... وشي طبيعي تكون موجودة بنسبة قلبيلة لان حنا مب بجزيرة الملاك اللي مايغلطون .. جزيرة النزاهه والبياض ...

اتفق معكم فيه بس اختلف على النسبة ..

قريت قبل شوي ان فيه خوات بالدفعات ..وكل الردود فسروا ( هذي يعني واسطة )؟؟

سبحان الله يعني الخوات مايتوظفن ؟؟

اعرف هالخوات بصفه شخصيه واعرف تخصصاتهن ومعدلاتهن ... وابعد مايكون عندهم واسطة

لكن وش شهادتهم ..تخصصات مطلوبة واحتياج .... وجاء رزقهن مع بعض ليش التفكير السئ ؟؟؟

ترا لو نبعد فلانه توظفت قبلي ومدري ايش ... اقسم بالله نص مشاكلنا النفسية تهون واعصابنا ترتاح ..


نجي للمسألة الثانية وهي الاهم واللي اعتقد انكم بتختلفون معي بها ...


شرط اثبات الاقامة .. قامت القيامة ان هالشرط تعجيزي ..

بس فيه احد فكر ليش هالشرط ؟؟

مدري احد عاجبة حوادث المعلمات ؟؟

احد عاجبه ان امراه تطلع من بيتها 3 بليل كل يوم ...

ماتحسون هالشرط حماية لكم ...

ماتحسون هالشرط فيه عداله ان كل منطقة واحتياجها وكل منطقة بها خريجات واولى بها ؟؟


يتقولون لي فيه اقاربنا بذيك المنطقة نقدر ؟؟
بقولكم اتحدى وحده تقدر تعيش في بيت مب بيتها ... محد يتحملنا غير اهالينا ..

اخوك او اختك مراح يتحملون ....
هذا دوام وارتباط يعني مسئولية واستقرار...

الشئ الاخر الي بقوله لكم ...

من واقع تجربة ..

لا سمح الله لو ماصار لك نصيب بالوظيفه ...لا سمح الله ويارب كلنا نحقق امانينا ...

لاتطيح منك ولا دمعه ... بالعكس ابتسمي وقولي هذا شر والله صرفه عني ..

اكيد كلنا نعرف الحديث القدسي اللي يقول ( لو رأيتم كيف يصرف الله اموركم لذابت قلوبكم من محبته )

بالله استشعروا هالحديث .... شوفوا اللذه ... شوفوا الرحمة .... شوفوا الحكمة

كنت قبل انوح وابكي بعد اذا ماصار اللي خططت له ...

بس كل مرة اعرف ان اللي مايصير ربي ماكتبه ربما هو شر ... واللي نكرهه ربما هو خير ..


أنا ماكتب هالكلام عشان المثاليه ...او عشان تقولون ماشاء الله عليها
حنا وراء معرفات محد يعرف احد ..

أ وعشان اوريكم انو ماهمني ...

لا بالعكس ... الامنيات كثير لا حصر لها ....

اللي علينا اننا ندعي الله واسعى بالاسباب ... واناجي ربي بالسحر والفجر وءاناء الليل واطراف النهار .واقول ( ان كان مااتمناه خيرا لي في ديني ودنياي ومعاشي فعجل لي فيه وان شر فاصرفه عني واصرفني عنه انك تعلم ماتخفي الصدور ) ...

الشي الاهم

لاتوقفين مكانك ... ماجاك بالتعليم روحي لمجال ثاني مالقيت بمجال ثاني .. مارسي هوايه لك وطوريها ... الين يجي فرج الله ..

لاتحطين يدك ع خدك وتتنظرين اسمك كل سنه ... بهذي السنة وخلال الانتظار طوري نفسك

ادرسي انبسطي ..اقري ... ابحثي ...

اطرقي كل البوابات لاتقعدين مكانك ابد ...

كل مرة بتحسين انك انسانه مختلفة ...كل مرة بتكبرين بعين نفسك اكثر

ومااقولكم الا من واقع تجربه ...ابسرد لكم تجربتي وانتم احكموا :

لمن تخرجت ... طلبتني احد المعاهد ادرس فيها ...

وفعلا درست بنات اكبر مني ..

لمن فبلت فرصة العمل كان المجتمع واهلي والكل وافقين ضدي بحجة ان الراتب قلبيل ومايسوي قومة الصبح ...

كنت اقولهم انا لمن اشتغل مب عشان المادة وبس لاني مادخلت مجال التجارة بنية الربح ...لا

أنا دخلت مجال التعليم يعني اطور نفسي واطور اللي قدامي

وفعلا درست مواد صعبه وجديدة علي .. بحثت ... حفرت الصخر ... وتميزت .. وذقت ثمار التميز

فجأه جاني عقد لحين مباشرة المعلمة الاصليه ... كان منهجها متعطل لمدة شهرين لانها تاخذ اجازة مرضيه

لمن جيت الكل يطالع اني مستحيل بتحمل تأخر المنهج ...وانا خريجة جديدة لسى ماعندي الا خبرة ضئيلة

خذيت الموضوع تحدي وفعلا انهيت المنهج بالفترة المطلوبة كنت أشتغل 7 حصص ورا بعض كل يوم ..كنت آخذه من وقت فطوي وراحتي ..

وابهرت الكل خلصت المناهج بالفترة المطلوبه ... وكرمت البنات المتميزات وتركت اثر في نفوس طالباتي ... ذقت النجاح طعمة مستساغ ...طعمة أحلى من السكر ...

انتهى الفصل الدراسي الاول والمفروض اكمل الفصل الدراسي الثاني

تفاجأت انهم جايبين معلمة عقد بدالي ... وعرفت ان فيه سبب ؟؟

تدرون وش سويت ؟؟

طلعت مبتسمة .... ولا اكترثت ... حسيت اني انظلمت وانحطيت بخانه اليك

بس قلت جواتي مستحيل اسمح لأحد يكسرني ... رحت البيت وافطرت ونمت وحلمت بأحلام حلوة ...

من بعد اسبوع وفقني الله ببشرى انتظرها ...

خلال السنة هذي درست ... طورت نفسي .... وشبه ألف كتاب ولله الحمد والمنه ....

كله من فضل ربي ...

كنت دائما انظر بعدسة الايجابية ...

ع فكرة كل اللي صار مب مثاليه ولا انكسار ولا ضعف ... ولا لان ماعندي احساس او اعصابي باردة ...

كله لاني احب نفسي ومابيها تتكدر لأي سبب كان ....

عقلي / شهاداتي عندي

اقدر اسخرهم باللي ابي ... بس التوكل على الله والثقة بالنفس ... واطردي خفافيش اليأس من حياتك ...

سااعتها بتكونين أجمل انسانه ....

....

ممكن اي احد يقرا كلامي يتهمني بالنرجسية وحب الذات ...

بالعكس كانت ثقة بالنفس ليس الا ... كونوا واثقين برزق الله ثم بأنفسكم بتلاقون الطريق معبد قدامكم

ولا تقولون اللي يده بالنار غير اللي يدة بالمويه ...

انا مثلكم شبه معلقة ... بس الفرق اني مابي اكدر نفسي ... او اعذب نفسي ... لاني احب نفسي ..


وابيكم كلكم تحبون انفسكم ...

لاتنسون حنا مؤمنات

سعوديات قويات ...

ثقتي بالمرأه السعودية فوق ماتتخيلون ...مب لاني سعوديةو بس ...

انما لان فيه بارعات ومبدعات بكل معتى الكلمة ...

أحبكم في الله جميعا لانكم بنات ديرتي ... واللي يتبض بقلوبنا واحد ...وحنا مب مناطق كلنا ارض وحده سعودية وحده

بنات نجد خوات بنات الحجاز خوات بنات الجنوب والشمالية والشرقية لبى قلوبهم كلهم
.

.

كل عام ونحن أجمل يا أطهر من ماء عيني