اولا /كيف يكوون اول اسبووع ماهو البرنامج بالكامل ان امكن ؟؟

أول يوم--------------------
طبعا بتدخلون الكلية على حسب المواعيد اللي سوف يرسلونها لكم على الجوالات قبل يوم التحضير كل كتيبة وسرية لها وقت معين من أجل التنظيم في الدخول والتوزيع
بعد دخولكم تكونون في الميدان ويوزعون كل طلبة فصيل على حدة (الفصيل تقريبا 50 طالب يزيدون قليلا او ينقصون ) ثم يأتيكم ضابط اللي راح يكون قايد فصيلكم مستقبلا ويجلس يتفلسف شوي ويعطي تعليمات
ويبدأ يقول لكم:" الان بنفتش على حقائبكم كل واحد يفتحها امامه ، اللي عنده شيء يسلمه الآن قبل التفتيش وسوف يرجع له إذا خرج ، لكن لو فتشنا وحصلنا عند أي واحد جوال او ممنوعات ترا سوف يصادر" >> طبعا لا تقمطون من أول تهديد وتخرجون كل شيء لأن التفتيش روتيني وبعدين هم عارفين انكم مستجدين وأكيد بتجيبون اللي بورقة الطلبات بالحرف الواحد ولن تزيدوا شيء من رهبة العسكرية لكن اللي معه شيء يضبط وضعه ويخبيه صح ،،،
ثم يقول لوكيل الفصيل والعرفاء الثلاثة اللي معه ابدؤوا بالتفتيش
طبعا بعدها يأخذونكم إلى المجموعات (الغرف) ويوزعونكم عليها كل اربعة وحوش في مجموعة
ثم تنزلون تأخذون بعض العهد من بطانيات ومخدات وشراشف الخ...
وبعد صلاة العشاء يكون فيه تمام (تعداد) في الميدان ثم تتوجهون للميز لتناول وجبة العشاء وبعدها إلى مجموعاتكم للنوم (نصيحة ناموا بدري لانكم بتصحون قبل اذان الفجر بنص ساعة أو ساعة وتروحون المسجد ولن تنامون بعدها الى في الليل عند سماع بروقي النوم وسماع اذكار النوم)(كيفوا انفسكم قبل بداية الدورة بيومين أو ثلاثة بالنوم الساعة العاشرة مساء والاستيقاظ اذان الفجر بدون نوم اثناء النهار)

ثاني يوم---------------------------
الاستيقاظ قبل أذان الفجر بنص ساعة أو ساعة تقريبا والذهاب للمسجد والجلوس فيه حتى الاذان ثم الصلاة (طبعا الفترة هذه من قبل الاذان حتى اقامة الصلاة فرصة طيبة لمن أراد ان يختم القران الكريم خلال الخمس والاربعين يوما اقرأوا فيها القران وصلاة الوتر والدعاء )

بعد الطلوع من صلاة الفجر مباشرة يكون فيه تمام للحصة الرياضية وسوف يبدأون معكم من الصفر وقد يكون فيه حصة أخرى بعدها

ثم تمام الفطور ثم التوجه للميز والافطار وبعدها الى الكتايب(السكن) قليلا من الوقت
ثم التمام لحصة رياضية وقد يكون فيه حصة رياضية بعدها

ثم صلاة الظهر
والتوجه الى الميدان لتمام الحصة العسكرية (أول اسبوع يعلمونكم فيها كيف طريقة الثبوت الصحيح أشياء بدائية أخرى)
ثم تمام الغداء تحت شمس السماء والتوجه للميز وتناول وجبة الغداء

وبعدها صلاة العصر
ثم التوجه للميدان لتمام حصة رياضية أو عسكرية
وبعدها التمام المسائي

وبعدها صلاة المغرب
الفترة من المغرب الى العشاء قد تكون محاضرة في المسجد أو حصة في الميدان أو أي شيء اخر

ثم صلاة العشاء
والتوجه للميدان لأخذ تمام العشاء
وبعدها التوجه للميز وتناول العشاء ثم التوجه للكتايب وتبديل اللبس إلى بجامة النوم والنوم مع سماع نغمة البروقي >> طبعا النوم يكون له لذه خاصة لأنه جاء بعد تعب . والنوم الى قبل صلاة الفجر والاستيقاظ مع بروقي الصحيان.

وهكذا بقية أيام الاسبوع الاول -----------------------

طبعا الاسبوع الثاني يختلف الجدول لكم قليلا إذا كان هناك تعليم ونظافة و يحضرون طلبة الدبلوم ،وطبعا راح يطقطقون عليكم ويستهبلون اسبوع او اسبوعين وبعدها يطفشون ماعاد تشوفونهم "يقولون لكم للوراء در ـ ثابت ـ هرول - وجهك للجدارـ اسمك العسكري كما تعلمت ـ الخ..."
وهدفهم من هذا المزح والطقطقة التخفيف عليكم من الضغط النفسي اللي كان الاسبوع الاول >> نصيحة خذوا الطقطقة بروح رياضية وحلوة واضحكوا وفلوها لأنه تنفيس عنكم وترويض للنفس بالطاعة .