تحياتي للجميع بكتب لكم بالتفصيل وش اللي صار 100% في مقابلة الأمن العام:

أول شي جيت الساعه4فجر وكان فيه ناس قليل وبدأو يزيدون شوي شوي ومافتحوا لنا البوابه إلا الساعه7وخمس دقايق تقريباً يعني لا أحد يروح بالفجر ويتعب نفسه، وصار تدافع عالبوابه مع أنهم دخلوهم كلهم بس الشباب مراجيج الله يهديهم، المهم دخلنا الساحه وصفونا صفوف وكل واحد يجلس بمكانه بعدين قالوا لنا :
1) اللي معاه ثانوي لحالها يطلع هنا وطلع عدد كبير، وطردوهم...
2) اللي معاه كمبيوتر3شهور يطلع هنا وطلعوا ناس وطردوهم...
3)بعدين بدأو يمرون علينا وأي واحد لابس ثوب أو شعره طويل أو وسط يطلع برى لازم محلق ياشباب....
4) بعدين قالوا اللي مسجل عالنت ومعاه الورقه يجي هنا وطلعنا (كنت معهم) وقاسوا الطول وأي واحد أقل من 168برى ولايعطونه فرصه حتى يحتج...
5) مطابقة الشهادات أي واحد شهادته مو مكتوب عليها عدد الساعات وتاريخ دخوله وتخرجه ينطرد أنا كان عندي كامبردج6شهور طردوني وأجي أتكلم وأشرح قال هذا تعميم من مرجعنا تكفى يمين يسار طردني وطرد كل من معهم كامبردج...
6) اللي أوراقه تمام مثل مايبون يدخلونهم مكتب ومدري وش يسوون هناك الظاهر يعطونهم الأوراق حقت الفحص الطبي والشرطه والعمده والأحوال (الله يوفقهم)

الزبده للي باقي ماراح:
1) حلق شعرك وربي تنطرد تنطرد لو شعرك خفيف لازم مكينه.
2) أي واحد معاه كامبردج ياشباب وهو من خارج الرياض أقوله لاتعب نفسك وربي واحد قالي وماصدقته وطنشته ورحت سفر وتعب وجيت مواصل وصار اللي قال كامبردج للأسف مايقبلونا

وحسبي الله ونعم الوكيل طولي178 ووزني70 والقدرات عندي91 والثانوي84 وعندي كامبردج تعادل6شهور ولاقبلوني قال ايش لازم عليها تاريخ متى بدأت ومتى طلعت

أخيراً الواسطه شغاله عندهم100% كل شوي تجي ورقه عند العسكري وينادي أسماء ويدخلونهم عالمكتب على طول بدون قياس طول ولا وزن ولامطابقة شهادات واللي أكفأ منهم براااااااااا