المقاولات مجال خصب للربح وخصوصا في العشر سنوات الجايه

واللي بيبدأ بقوه او عادي بيعين خير ان شاء الله

لكن لازم يبدأ بخطوات متزنه ويملك معلومات كثيره

انا بعطيك بعض النصائح بحكم خبرتي بهالمجال

العماله
1- مهن النجار والحداد والبناء يفضل من مصر لان اكثر شد للسقوف هنا على الطريقه المصريه والشاميه والبلاط من باكستان او الهند والسباك والكهربائي افضل انا الهند وعلى فكره في الوقت الحالي افضل ايدي عامله هي الهند يعني اذا قدرت تجيب طاقم كامل ومؤهل من الهند حتى لو على فترات جيب لانها بصراحه جنسيه اثبتت جدارتها.

2- طريقة محاسبة العمال تكون كالتالي:
النجار والحداد والبلاط: بالمتر المربع
البناء بعدد البلك وباقي العمال بالمقطوعيه

المواد:
1- الخشب لازم يكون عندك ما يكفي بالبدايه لشد عماره من القواعد للسقف وطبعا لما نقول خشب نعني ( المرابيع طول ثلاثات واربعات , والالواح طول ثلاثات واربعات , والبليوت الاندنوسي ودرررربالك من الصيني تراه ما ينفع ولا بريال والمشكله اكثر ما يطيحون فيه المقاولين الجدد لانه من اول فكه ينهري وما يقاوم الماء مثل الاندنوسي)

2- يبيلك ملازم حديد وجكات لتثبيت السقف والجكات فيه النوع السعودي افضل من الامارتي على ما اظن

اعذرني ياخوي هذا اللي قدرت عليه لان جاء وقت النوم واي شيء انا حاظر راسلني على الخاص وما يصير خاطرك الا طيب

موفق خير