ابي واســطه ! ( معاناتي مع مقابلات الشركـات ) ~
السلام عليكم ورحمة الله وبركـاته ,
يمكن كثيير منكم يبي هالواسطه اللي اقول بعنوان موضوعي إني ( ابيهـآ ) ..
فالبدآية وآسطتي ربي  وإن كان فيه وآسطه جآمده مآقول لا < ~ كآنهـا صارت ام وجهين 
موضوعي اعتبروهُ مساحة فضفضه , مساحة خيبة أمل , مساحة روحات وجيات عالفاضي
مساحة مقابلة وقتها من ساعه لنص ساعه عند مدارء من جميع الجنسيات 
* الوظائف ارزاق من ربي وكلن بياخذ رزقه ونصيبه لكن اسعى ياعبدي وانا اسعى معك
مااكتف يديني واقول رزقي بيوصلني لين حد رجولي 
من تخرجت من الثانويه وانا بالي مع الشغل واني اشتغل بس مافكرت بالدراسه والشهادات لكن عرفت انه مافي وظيفه الا بشهاده وان كان وراك واسطه لو معك ابتدائي مشى حالك 
المهم درست دبلوم والحين اكمل جامعتي
وقبل الدبلوم كنت اشتغل فـ الاعمال التطوعيه هي اللي حببتني بالشغل واني اسوي واحوس
وقتي يروح لشغلي ومافي وقت فراغ لي
مدري ليه ماحب اكون فاضيه لساعات طويله تجيني حاله نفسيه فضيعه
المهم سويت سيرتي الذاتيه وماخليت مكان الا وارسلت لهم سيرتي , شركات , مدارس , بنوك
والحمدالله كان تجيني اتصالات .. اتصالات تستفسر عن دراستي وعن مؤهلاتي .. واتصالات مدري وش كانت تبي بالضبط 
*ابدأ بـ اول معاناه مع شركة للسفريات والشحن يعني امور سياحه وطيران :
كان لها قسم نسائي مستقل رحت وقدمت سيرتي والحمدالله ماخذو اسبوع الا وهم متصلين
عندي مقابله ورحت وانا كلي ثقه المسوؤله او السكرتيره مدري ايش وظيفتها والله المهم
اللي تسوي لي المقابله ( تتكلم من طرف خشمها الله يسامحها ) وكاني باخذ من حلالها شيء 
شكيت انها خايفه على مكانها والله اعلم بنيتها تسئلني اسئله عاديه زي اي مقابله والحمدالله كان الوضع مريح بالرغم من النفسيه التعبانه اللي تكلمني فيها 
شوي قالت لي يابنت حصه الراتب راح يكون كذا وغير البدلات واللزي منوو قلت ايوه
قالت لازم احد يكفلك !! قلت نعم كيف يكفلني براسي يدور ياربي وش كفيله خدامه انا ولا وش وضعي قالت : تدفعين 15 الف للشركه ولما تكملني سنه كامله معنا ترجع لك فلوسك وتسقط عنك هالكفاله فالسنين الثانيه ان كملتي  بدت خيبة الامل بوجهي وبقلبي اقول لو معي 15 والله ماجيكم  وانتهت المقابله ومشيت واقول بنفسي الله واكبر عليكم  ولما رجعت البيت واسئل اخوي عن نظام الكفاله هذي قال لي ماعاد في شركات فيها هالنظام خلاص وزارة العمل منعته 
بس مدري وش حظي استغفرالله يارب لاتحطها بذمتي وين ابتوظف انا واللي تقابلني اسلوبها كذا اعوذ بالله من هالحريم
ثاني معاناه وهي تعتبر اكبر معاناه مع شركة للأدويه وهالاشياء :
هالشركه قابلتني 4 مقابلات بتنصدمون طبعاً اربع مقابلات ولا على شيء
اول مقابله / كانت مع مدير سعودي الله يعطيه العافيه والله وبكلامه عطاني امل فالحياه
انبسط مني الحمدالله ومن ردودي باسئلته و يقول لي ( شكلك يابنت حصه بتاخذين مكاني بهالشركه لكن تكفين لاتاخذين مكتبي احبه خذي مكتب ثاني ) قلت ليش لا مااخذه لكن دامك تبي مكتبك بطلب مكتب ثاني  , خلصت المقابله وقال لي يابنتي بالمقابله الجايه لاكلموك خليك زي مانتي اليوم
ابيهم يكلمونك وتكونين من اداراتي ان شاءالله خليك قويه
جت المقابله الثانيه / بعد المفاضله بين البنات اختاروني وسويت المقابله مع مديرين من الجنسيه المصريه بعد الله يعطيهم العافيه كانت مقابلتهم بسيطه بالحيل وماكان فيها اي خوف يمكن تعودت على المقابلات مع اني كنت اخجل من كلامي مع الرجال وكنت اخاف الخبط بكلامي بس الحمدالله عدت على خير
انتظرت وانتظرت وانتظرت انتظرهم يقولون بنت حصه ننتظرك تجين توقعين عالعقد لكن بنت حصه شكل سيرتها الذاتيه مرميه فالزباله
بعد حول 3 شهور بعد مابديت افقد الامل فيهم , اتصلت علي موظفه من القسم النسائي
قالت عندك مقابله بكره الساعه الفلانيه قلت يابنت الحلال سويت مقابلتين والحين هذي بتكون ثالث مقابله ممكن اعرف وش السالفه !! قالت الاداره رشحتك تكونين فالشوؤن الاداريه  وانه المقابلات السابقه كانت لوظيفه ادخال بيانات واكتفينا من الموظفات بهالقسم ومقابلتك للشوؤن الاداريه  انفجعت بعد المكالمه وماصدقت بغيت اطير من الفرحه وبشرت كل اهلي
مادريت انها مقابله زي اي مقابله ثانيه
المهم رحت وحسيت اني خلاص باخذ هالمنصب واني فالشوؤن الاداريه وقلت بس يابنت هذي فرصتك طلعي كل شيء زين فيك وقابلوني مدير مصري ومدير سعودي
طبعاً شكلي والله اعلم دخلت على كل مدارء الشركه كل شوي اشوف وجهه جديد ههههههههه
سئلوني عن دراستي الحاليه وقلت لهم اني ادرس عن بعد انتساب مطور كل شي يكون عالانترنت
اللهم اداوم في فترة الاختبارات اللي ماتتعدا الاسبوعين او اقل بعد 
قال ايوووه ايوووه هذا المصري وكانه يسكتني وكانه يقول مكانك مو هنا ترى وقابلناك تسكيته بس والسعودي ماكان يقول شيء ساكت بس سئلني عن الكمبيوتر وبرامجه اذا انا ملمه واعرف لهم قلت ايه انا دارسه دبلوم تقنية مكاتب المهم خلصت المقابله والمصري مااعجبني كلامه ولا اسلوبه رجعت لقسم النسائي الا المسوؤله عن قسم البنات تسئل بنت جايه انتي مين مكلمك تجين تسوين مقابله قالت الدكتور الفلان انا طارت عيوني والبنت طارت عيونها اللي مكلمها المدير المصري اللي قابلني قالت المسوؤله كيف مكلمك قالت كلمني وقال تعالي عندك مقابله
معناة البنت لها علاقه بهالمصري والله يخلي الواسطات وشكلها بتاخذ مكاني
المهم طلعت وانا بالي مع هالبنت حتى اسمها مانسيته مو حقد فيها الله يرزقها لكن وش هالواسطات الاليمه ودي يعني تعلمني كيف تنقي هالواسطه هههههههههههه 
المهم عرفت بعد سؤالي عن وضعي وش صار علي في قبول اول لا قالت المسوؤله بالقسم النسائي معليش يابنت حصه الاداره رفضو يقبلون اي بنت مازالت تكمل دراستها 
ودي اعرف ليه يرفضون واساساً اي عقد فيه اجازه للدراسه
ومع انه اعرف بنات بالشركه يدرسون ويشتغلون لكن حظي مايل سبحان الله
قلت مالي الا اوصل لاول مدير قابلني بهالشركه لعله ينصفني كلمت الشركه وقلتلهم
ابي اكلم المدير فلان عندي موضوع مهم معه كلمني السكرتير حقه الله يعطيه العافيه قال هو مسافر حالياً لكن بعطيك ايميله واكتبيله قلت اوكي هاته واخذ الايميل واكتبله خطاب ههههههههه وهذا هو كلامي نسخته لكم
اقتباس:
السلام عليكم ورحمة الله وبركاته
أستاذ / فلان ,,
معك بنت حصه قدمت قبل فتره على وظيفه فالشركه بالمسمى الوظيفي ( مدخلة بيانات ) وتم مقابلتي الأولى من قبلك
والحمدالله تجاوزت المقابله , وتم الاتصال علي لحضوري لمقابله اخرى لنفس المسمى الوظيفي , قابلوني اثنين من الجنسيه المصريه
كانت المقابله كتنصيف لبعض المتقدمات في مامعنى الكلام اذا لم يتم قبولي بهذه الفتره فسيكون في اختيار موظفات بعد 3 اشهر ،
ولم يتم قبولي خلال هذه الفتره وتم الاتصال علي بعد 3 اشهر لاستدعائي لمقابله ثالثه وكان توقيتها في الاجازه الاخيره
( إجازة العشرة ايام للطلبه ) وهذه المره مقابلتي لوظيفه في الشوؤن الاداريه كما قالت المتصله وتمت مقابلتي تحت
اشراف مصري وسعودي ، قالوا لي : سوف يتم الرد عليكِ اذا تم قبولك بعد اسبوع .. مر اسبوعين وعلمت بأنه
لم يتم قبولي فالوظيفتين التي قدمت عليها والوظيفه المرشحه لها من قبلكم .
كنت متيقنه بأنه سيتم قبولي فأحدى الوظيفتين وتم رفضي للوظيفه بسبب دراستي !!
علماً بأنه في المقابله الاخير تم سؤالي عن وضع دراستي واختباراتي وكانوا حريصين جداً على
وضع دراستي في الجامعه ( الانتساب المطور ) وهم لم يعلموا عن ثلاثة ارباع دراستي دراسة كما تسمى (دراسه اون لاين )
وحضوري فقط سيكون للأختبارات , سألني احدى المشرفين عند مدة اختباراتي سئل وجاوب من نفسه
بأن مدة اختباراتي اسبوعين وهم لم يعلموا ( ماهية طبيعة التعليم عن بعد او الانتساب المطور ) ؟
وكثف اسئلته عن دراستي الجامعيه ولم يكثف اسئلته عن شهادة الدبلوم وشهادة الخبره التي تخولني
لقبولي باحدى الوظيفتين .. ومرت المقابله وانتهت ومر اسبوع ولم يتم الرد واسبوعاً اخر و علمت برفضي بسبب دراستي .
استفساري لك /
هل كل قطاع خاص له الاحقيه في رفض المتقدمين للوظيفه بسبب ( طلب العلم ) ؟
وإنت تعلم بأن جميع انواع العقود لها ضوابط ، شروط ، قوانين خاصه لكل منظمه وايضاً أجازات
ومن ضمن الأجازات " اجازة دراسه " ومن حق كل موظف يدرس ان يطلب أجازته بمدة لاتعلوا عن عشرة ايام .
أستاذ فلان.. اتمنى ان تنظر في امري وإن لاتكون دراستي عائق لوظيفتي .
وفي الختام .. السلام عليكم ورحمة الله وبركاته
مقدمة الأستفسار / بنت حصه
|
حطيت رقم جوالي بهالاستفسار .. مامرت ساعتين الا وهالمدير متصل
ورديت قال اخت بنت حصه قلت ايه نعم معك المدير فلان وصلني ايميلك ومن هالكلام
واقعد اتناقش معه ليييييين طلعت حرتي كلها فالنهايه انتهى الاتصال ومافي اي شيء
======
رابع مقابله /
تعالي يابنت حصه عندك مقابله لوظيفه سكرتيرة
اقول لامي واختي عن مكالمتهم امي تقول خلاص لاعاد تروحين امي ياعمري حست اني كنت انتظر اي اتصال وكاني بديت اتعب نفسياً وتبيني مااحط امل يعني زي ماقالت قلعتهم
واختي تقول شكلهم شايفين فيك مواصفات عاليه واحتارو هم وين يحطونك 
قلت شكلي والله اعلم اني بمسك الشركه بكبرها هههههههههههههه قلت بروح حتى لو اني حفرت طريقهم ماعليه وش اسوي مابي اترك شيء وبعدين اندم ليتني رحت وليتني رحت اصرت امي تروح معي قلت يالله دامك تبين تتعنين معي تعالي هههههههههههه امي كان ودها تدخل على اي مدير وتقعد تشرشح فيه امي ماعندها وقت تلفت اعصابها على بنتها
مقابلتي كانت مع مدير مصري ثاني ومدير سعودي ثاني السعودي ساكت والمصري يهذر بالجوال
ويسكر ويقول لي كلمتين ويرجع يهذر حسستهم بعد مقابله تسكيته بس قلت يالله يابنت منتي بخسرانه لارجل ولايد سوي اللي عليك وامشي ومقابله بعد اجتزتها طبعا انا اقيم نفسي هههههههههههههه وجيت لامي ويمه يالله سرينا لبيتنا
وانتهت معاناتي مع هالشركه اللي لين الحين ماجاني ولا نص مكالمه يعني دقه وتسكيره ولا كول معي ولا حتى مسج هههههههههه ولا اي شيء منهم
=======
* ثالث معاناه /
من كثر مااكتب معاناه قعدت اردد
( ياليل خبرني عن امر المعاناه , هي من صميم الذات ولا اجنبيه )
كانت مع شركة رديت على استفسارات تخصها بهالمنتدى تنزل للشركه وظائف ويعصرني قلبي الم وحسره ههههههههههه بسم الله علي من الالم
مقابلتي الاولى كانت مع مدير الموارد البشريه ومديرة شوؤن الموظفين
مقابله زينه الحمدالله واخوي كان معي يوقع انه راضي اسوي مقابله ومعجب بالشركه مره
اسئلتهم كانت بسيطه وسلسه جاوبت على كل شيء وصارو يقولون لي عن نظام الشركه وحوافزها وعن دراستي وانهم بيدرسوني على حسابهم وصار المدير يحاول يفرض راييه علي انه يقول لو مثلا نبيك بتخصص الفلاني بجامعة ثانيه تدرسين زي ماقلنا لك , قلت لا احب تخصصي وعاجبني نظام دراستي صعبه ادرس شيء انا مابيه وبعدين قال لي طيب لو نبي مستواك بالانجليزي يتحسن ونعطيك دورات خارج المملكه ترضين تسافرين قلت لاصار معي محرم ماعندي اي مشكله
قال ايه اكيد نتكفل بمحرمك حتى بغسيل ملابسه قلت طيب لاسمح الله محرمي ماقدرت بأمكاني ادرس دورات هنا قال اللي تحبينه قلت خلاص تم وقال لي عن نظام الاجتماعات الخارجيه اللي تصير بدول خليجيه او اوروبا وانه هل عادي تسافرين مع قروب بنات قلت لا بيني وبين نفسي اقول فيها قبايل وانا اختك قلت دام معي محرمي فـ انا موافقه على السفريات قال طيب قروب بنات مافيها خوف قلت بس انا مارضى لنفسي اسافر من دون احد من اهلي قال خلاص يابنت حصه كل امورك تمام شاوري اهلك على نظام السفر وكلمينا قلت خلاص واروح لبيتنا واتفاهم مع اهلي وتعرفون كيف نظرية الاهل بسفر البنت بلحالها وحوسة واكيد ماارضاها على نفسي بعد بس العقليات تختلف مين افهم ومين اخلي امي اخواني خواتي واقعد اشرح لهم وقلت بسكتهم بـ انكم موافقين ولاصار فيه سفره احد فيكم يفضي نفسه لي وكل هالكلام طار بهالهواء
محد دق علي صرت ارسل للمديره ابي اتاكد اذا مثلاً مانقبلت بترسلون عالايميل خطاب تعذر بعدم قبولي !! ارسلت وماردت وبعدين اخوي كلمهم يسئل وش صار معي وبعدها بكم يوم قالو تعالي
مقابله ثانيه / مقابلتي الثانيه مع مديرة شوؤن الموظفين كانت تقول لي انتي شكلك كل مازهقتي ارسلت لي ايميل عيوني طارت بالله هذا اسلوب مديره تتكلم مع طالبة وظيفه
قلت لا والله ماهي سالفة كل مازهقت !! لكن لو انك رديتي علي كان مارسلت لك ايميل مره ثانيه
وقامت رقعت موضوعها وحولتني على مدير هندي بعد لطعة ساعه حتى الهنود ماخذين حقهم
اقول بنفسي ياربي وش بقول مع هالهندي اختي كانت تحت بالاستقبال ارسلها من باب التخفيف عن نفسي واوسع صدر اختي اللي طفشانه من الانتظار اقولها بدخل على مدير هندي وش رايك اخلي سواقنا يطلع له يسولف معه وقابلني هالهندي ومقابله مشي حالك وكلم وحده مدري وش تطلع قال اختبروها بالطباعه واروح لهم وبرضو البنت تتكلم من طرف خشمها  انا مدري وش حظي مع النفسيات
وانتهت المقابلات هذي ولا شيء فالطريق
======
* رابع معاناه /
مقابلتي مع دكتور فعياده ومدير عام سوري الجنسيه قابلني على اساس اكون موظفه
بقسم عيادة تجميل نسائيه كان كل شيء تمام على انه راتبهم مره بسيط ودوامهم طويل
بس قلت عادي ماعليه المهم اتوظف ولا كبدي بتطق  وقال لي بكره تعالي وجيبي صوره من بطاقة العائله او بطاقة احوالك وتباشرين عملك 
لكن اهلي رفضو هالوظيفه لاسباب مدري كيف اقولها ماقنعتني ابد وقلت خلاص
امري لله اهلي رايهم مهم وربي بيعوضني باحسن منها
====
خلصت معاناتي
الحمدالله قبل كل شيء وبعد كل شيء الحمدالله ,
بعد هالتعب والخيبة الامل استفدت اشياء كثيره اني تعودت على شيء اسمه مقابله شخصيه
حفظت اجوبتي وعرفت كل شيء حسيت انه صارت عندي خبره بهالمجال
قررت ادرس انجليزي واقوي لغتي يعني ادرس توفل
عرفت ان ( النساء ) يخافون على اماكنهم الوظيفيه وبعض منهم مايحبون الخير
لبني جنسهم عكس الرجال لدرجة اني صرت افضل اتعامل مع رجال واعطيه اوراقي
ولا اجي لحرمه ترفع ضغطي هههههههههههههههه البنات بيزعلون علي الحين لكن اتكلم عن واقعي والله وماقول كلهم كلن فيه حقه  
اللي يضحك فالموضوع , انه تجيني اتصالات واجد من شركات وكذا
فـ مره واحد كلمني قال لي تو وصلني سيرتك الذاتيه قلت طيب انتم اي شركه بالضبط
من كثر ماارسلت سيرتي ماعرفت وش خليت وش بقيت وهاللي كلمني شكله فاضي
لاني والله مادري وش يقول من كلامه ومتصل بوقت كانه متأخر شوي وسجلت رقمه عشان لاسمح الله دق مارد عليه كتبت الرقم بجوالي شركة اتصالات مدري موبايلي او زين هههههههههههههه
فر مخي من الوظائف والتقديم والشركات
وصرت اقول يارب ارزقني بملايين واخذ كل هالشركات اللي قدمت عليها هههههههههه
دعواتكم لي , ترى عندي مقابله اليوم الصبح ومانمت للحين
ياخوفي انصرع عندهم ويقولون شيلي عفشك حبيبتي مانبيك
عساني وسعت صدوركم ههههههههه وماخيبت رجاكم او كسرت خاطركم ولا شيء
طولت بالكلام سامحوني بس ماعرفت اختصر تعرفون الحريم يحبون السواليف
تحياتي ’’ بنت حصه
التعديل الأخير تم بواسطة بنت حصه ; 22-10-2011 الساعة 04:32 AM
|