السلام عليكم
طبعا اليوم كان موعدنا ورحنا الحمدلله
برغم اني كنت سعيدة لحضور العديد من البنات لكني حزنت بنفس الوقت
لأنه الحضور الجمهوري بحسب نظرة الغرفة التجارية يدل على التفشي الخطير للبطالة والحاجة الماسة للعمل وكسب العيش
وشفتوا كيف امهات جوا مع بناتهم
وايضا حضور طفل مع امه
وكل هذا يدل على الرغبة في العمل لمختلف الاسباب
كنت سعيدة فعلا بحضور هذا الكم وكنت سأسعد اكثر اذا حضر اكثر من ذلك
طبعا جميع القائمات على الارشاد الوظيفي (بارك الله فيهم، صراحة كانوا اخلاق) ما توقعوا حضور هذا الكم الكبير
والبنات اللي حضروا اكيد سمعوها لما قالت : ما توقعنا حضور هذا الكم !!
انا ساعتها قلت في نفسي : لازم تشوفوا الحقيقة بعينكم ، برغم ان الحقيقة نفسها اعظم مما شافوه اليوم
وسعدت كثيرا لما قالت : ان شاءالله الكل يجد وظائف ، ومافي مشكلة لو جيتوا عن طريق خبر سمعتوه بس ((( لازم تسجلوا في الموقع)))

يا بنات اللي ما سجلوا لا تنسوا تسجلوا في الموقع بس عشان تكون سيرتكم الذاتية موجودة عندهم وان شاءالله تتوفقوا بوظيفة حلوة
*********
يطول الحديث عن اللي حصل اليوم
لكن في نقطة مهمة لازم اقولها لأني سألت عنها وهي:
بالنسبة للمسارات الوظيفية اللي رح تكون يوم 13/14/15 ابريل 2008 (الاحد ، الاثنين ، الثلاثاء) فيه وظايف رح تكون معروضة في هذا اليوم مافيها اختلاط ابدا ، وفيه وظايف فيها اختلاط .
لكن المسار الوظيفي اللي رح يجي بعد هذه الايام (طبعا لسه ما حددوا متى بالضبط لكن احتمال بعد شهر والله اعلم) رح تكون الوظائف مافيها اختلاط
والبنات اللي حضروا اكيد سمعوا بالشي دا
*****
طبعا مثلما قالوا الاخوات في ردودهم اللي قبلي ، انه لازم تاخذي البطاقة لحضور المسار
اللي ما اخذت بطاقة اليوم فقالوا تجي المسار اللي حيكون بعد هذه المسارات واللي قولتلكم انهم لسه ماحددوا موعدها و قالوا مارح يكون فيها اختلاط.
*********
طيب نجي للمهم : دحين هم قالوا لو استقلتي من العمل اللي سويتي فيه عقد معهم عن طريقنا وكانت اسباب استقالتك غير مجدية فما رح نكون مسؤولين عنك في البحث عن وظيفة لمدة 5 سنوات
ولو استقلتي ورحتي شركة ثانية متعاونة مع الغرفة فما رح يكون لنا حق نعمل عند الشركة الثانية وحتى لو قبلتنا الشركة الثانية فالتأمينات الاجتماعية رح يرفضوا
ليش كدا؟؟؟
خايفين البنات يستحلوها داخلين طالعين على هذه الشركات
وسألت اللي جنبي ليش كدا يقولوا: قالت : اكيد الشركات من حقها تضمن جدية الموظفة.
رحت سألتها ( نهاية الارشاد) لو استقلت عشان جاني عرض وظيفي احسن ؟؟؟
قالت : هذا ما يعتبر سبب تستقيلي عشانه لأنه في ناس ترضا تشتغل ب700 ريال .
خلاصة الكلام : لو لا سمح الله استقلتي من العمل اللي وفرته لك الغرفة (لأسباب لا تستحق الاستقالة من وجهة نظر الغرفة) فأنتي سبعي نفسك ولا عاد تطالبيهم يشوفولك شغل الا بعد 5 سنوات
اخيرا حاجة مهمة قبل انسى : من حقك تقرأي العقد كويس وماتوقعي حتى تقتنعي ولا تستعجلي، ولا تنسوا تقروأ انظمة عمل المرأة من موقع مكتب العمل ، عشان تكون عندك خلفية وتعرفي ايش لك وايش عليكي ، كمان لا تنسوا تعملوا تسويق لنفسكم يوم المقابلات وتضبطوا السيرة الذاتية مثلما علمونا اليوم ، ولا تنسي تجيبي نسخ عديدة من ملفك
((اذا نسيت شي ان شاءالله يذكروه باقي الاخوات))
الله يوفق الجميع
**********

في امان الله