احتمال كبير من اليوم الاول او الثاني .. يبدأون اختيار ضباط الصف منكم
يختارون عريف و رقيب فصيل لكل فصيل .. مهمتهم حفظ النظام و تلقي الاوامر وتوجيهها للفصيل
و يختارون رقيب الدوره .. رقيب لكل الدوره .. وفي اغلب الاوقات اللي راح يختاروهم في البدايه راح يغيروهم بعد اسبوع او اسبوعين ..
ويختارون بعد :

الكاتب : هذا عايش اقوى ايامه في الدوره .. مهمته تسجيل التكميل اليومي .. كتابه المحاضر .. ادخال البيانات .. يقدر خلال الـ 45 يسحب على نص الحصص ما يحضرها ..

وبعد الـ 45 يقدر يسحب عليها كلها ..

عريف الصحه: وهذا مهمته تلقي طلبات الخروج للعياده من الافراد .. ويسجل اوراقهم ويقدمها للرقيب المناوب .. ( وبالنسبه لنا .. ماعندنا عياده في المركز زي الامن

العام .. فـ يطلع اللي طالبين عياده في اسعاف خاص بالمركز .. ويوديهم على مستشفى قوى الامن في العزيزيه في مكه او مستشفى الملك فيصل بالششه .. فـ يطلع معهم العريف

ويبقى معهم الين ما يخلصون .. يعني بيكون اكثر واحد طلع من المركز ) وغالبا ً ما يحضر نص الحصص ..

عريف الخفارات : وهذا مهمته ترتيب و وتوزيع الخفارات على الفصايل و الافراد و توزيعهم على مواقع خفاراتهم .. ومتابعه الخفارات ويشوف من انسحب ومن يجي وقت خفارته و

عيا يصحى .. طبعا يصير وجهه يجيب الهم من تشوف تتذكر الخفاره .. و ما يناديك الا وانت تلعن وتسب فيه .. تظن انه يبيك تمسك خفاراه .. الا اذا زبطت وضعك معه .. ويصير

يلغي الخفاره اللي عليك و ينقز للأسم اللي بعد اسمك((مده الخفاره ساعتين))

طبعا ً اذا كان عدد الدوره كبير .. راح يزيد عدد صف الضباط .. عريف الصحه يصير له مساعد .. والكاتب يصير له مساعد

المميزات اللي يكسبها صف الضباط ..
قرب من المناوبين .. وتوثيق علاقات تفيده كثير فيما بعد .. ما يتجازا مع العموم اذا تجازت الدورها كلها .. ما يتجازا قدام الافراد .. يا اما يتجاز مع صف ضباط او

يتجازا لحاله .. و اصلا نادرا جدا انه يتجازا صف ضابطً .. ما يمسك خفارات .. لهم سكن خاص لهم يمديه ينسحب و يرقد فيه .. لهم طاوله في الميز خاصه لهم .. و مميزات

ثانيه راح يعرفوها مع الوقت ..


بدايه كل يوم في الدوره

راح يكون عندك برنامج ثابت ( نادر جدا ً يتغير )

الساعه 3:30 او 3:45 .. يجيك المناوب يصحيك ..
تقوم تغسل و جهك و تتوضى للفجر .. وتروح البوفيه تاخذ لك كوب حليب وبسكوت نص ساعه
بعدها ( تشكّل ) وتتوجه للمسجد
تصلي الفجر ..
تنزل للميدان .. تشكّل وياخذون التكميل ( الغياب لو فيه )
وتاخذون الحصه الاولى .. مشي لفه او لفتين و هروله لفتين على الميدان و تمارين اطاله ..
الساعه 7 تقريبا ً( تشكّلون ) و انصراف للميز فطور ( ما تغسل ايدك ) .. وانصراف على البوفيه ربع ساعه او اقل
الساعه 8 تقريبا .. تنزل الحصه الثانيه ( حصتين ورا بعض ) يعلموك المشاه و الاستعداد و الاستراحه و الدورانات ( الدوران لليمين و اليسار و الخلف )
الساعه 10 تقريبا ( تشكلون ) و تنصرفون على البوفيه .. راحه لمدة ساعه تقريبا .. وبعدها ( تشكل ) و تنصرف تتوضى لصلاة الضهر .. بعدها ( تشكل ) و تنصرف للمسجد ..
تصلي .. وتطلع من المسجد ( تشكّل ) وتنصرف للميز تتغدا .. بعدها ( تشكل ) وتنصرف للصاله الرياضيه تريح الين الساعه 3 .. بعدها تطلع تتجهز لصلاة العصر .. و ( تشكل )
و تنصرف للمسجد تصلي العصر .. بعدها ( تشكل ) وتنصرف للبوفيه الى الساعه 5 العصر .. وبعدها ( تشكل ) وتتوجه للميدان للحصه الثالثه ( احلى حصه ) تمارين سويديه
وتمارين اطاله العضلات .. وبعدها ( تشكل ) وتنصرف من الميدان للساحه امام البوفيه .. و ( تشكل ) وتنصرف للبوفيه .. وبعدها ( تشكل ) و تتجهز لصلاة المغرب .. و (
تشكل ) و تتوجه للمسجد ..
بعد الصلاه ( تشكل ) وتنصرف على الميز تتعشى .. وتنصرف تغسل و البوفيه و تتوضى لصلاة العشاء ..
و ( تشكل ) و تتوجه للمسجد .. تصلي و تطلع ( تشكل ) و داخليه ( تصليبه ) 45 دقيقه .. وبعدها (( اعمال اداريه " انقريه " )) .. وبعدها ( تشكل ) و تنصرف على السكن للنوم

اكثر حاجه راح تسوونها .. التشكيل .. تطفش من كثر ما تشكل

( داخلية )
او التصليبه .. يوقف الفرد او الفصيل ثابت في وضع استعداد بدون اي حركه ..
الحركه المسموحه لك .. تحرك اصابيع رجولك داخل البوت ( الجزمه ) عشان لا يوقف الدم و تجيك دوخه

( الاعمال الاداريه) ( انقريه ) :
تنظيف الميدان و الساحات المقابله للبوفيه و المركز كامل .. تلقط علب العصير و الكراتين و الاكياس .. او تشيل اللي يطلبوه منك لما يحتاجون في التموين نقل اشياء

مكاتب او كراسي او دواليب او اسرة نوم او اي شي يبي ينقولنه .. ياخذوكم تشيلونه

( السكن ) ( البركس ) :
المكان المخصص للنوم .. اسرة نوم دورين للفصيل كامل .. على العاده يكون فيه دواليب للأغراض .. كل اثنين يشتركون بدولاب واحد

(الصاله الرياضيه ) :
صاله مخصصه لتدريب الدورات التخصصيه ( جودو و كاراتيه و كونغ فو ) ..
على العاده تكون صاله كبيره ارضيتها مفروشه مشمّع مكيفه .. تنصصرف لها للراحه في الظهر خلال الـ 45 ..

طبعا ً هذا برنامجك من السبت الى الاربعاء خلال الـ 45

اما الخميس و الجمعه .. نفس البرنامج .. بس بدون حصص ..
يعني ماعندك الا تشكيل و صلاه و ميز و بوفيه و اعمال اداريه و داخليات و هي الفرصه الوحيده المسموح لك فيها انك تتروش وتاخذ راحتك في الدش ..
وراح تطفش فيها .. وتحس ان اليوم طوووووووييييل

( الزياره ) :
من ثالث اسبوع في الدوره .. كل يوم الخميس مسموح الزياره من بعد صلاة العصر الى قبل المغرب..
من بعد الفطور او الغداء يصرفوكم على السكن .. مدة ساعتين او ثلاث ..
تريحون و تتروشون .. واللي ما يبدل ملابسه الوسخه ما يطلعوه زياره ههههههه
لازم تكون نظيف .. ومافي على ملامحك اثار تعب او ارهاق .. ويشوفوك اهلك بهالمنظر ..
و الزياره مسموحه شبابيه او عائليه .. مدتها تقريبا ً من ساعه الى ساعتين ( على حسب مزاج ضابط خفر )
بالنسبه للمركز عندنا .. ممكن يزوروك اهلك ( العائله ) يجلسون في المواقف الخارجيه ويخلوك تطلع لهم
و الشباب يدخلون المركز و يجلسون في الميدان او الساحات الداخليه ..
طبعا اللي بيجيك يجيب معه بساط تجلسون عليه .. و مسموح يجيب لك اللي نفسك فيه من اكل وشرب واحتياجات شخصيه .. وفرصه حلووووه انه يدخل لك جوال و شاحن او دخان وانت

تخبيه في الميدان وترجع تاخذه في وقت ثاني ( في الليل مثلا )
(( فيه ناس عندنا جابو مفطحات وقت الزياره .. ما تشوف الا التباسي داخله ههههههههههههههه ))
بعد الزياره تشكيل وتفتيش شخصي .. وعلى حسب مزاج المناوبين .. منهم اللي يمنع حتى البسكوت انك تاخذه بعد الزياره .
بعدها انصراف تتوضى وتصلي المغرب .. ويستمر البرنامج ..

من الاسبوع الرابع .. تبدا الحرب النفسيه من المدربين و المناوبين .. اللي يقولك بعد يومين الخروج و اللي يقولك بعد اسبوع .. و تجيك الاشاعات من كل صوب .. ان

صدقتهم فـ الله يعينك .. بتضيق عليك الدنيا على وسعها .. وبتنفس ..

لا تصدق لا جندي ولا عريف ولا رقيب ولا الضباط ولا حتى قايد المركز نفسه ..
لا تصدق انك بتطلع .. الا لمن تتعدى بوابة المركز بـ 10 متر
احتمال كبير .. يقولك خروج .. واحمل متاعك .. وتوصل الين البوابه .. ويقولك (( قف ))..( للوراء در )رجعك متاعك للسكن و انزل الميدان .. يخلون نفسيتك تقفل

مزبوووووط ..