فكرة اخرى لو فكرنا بالتجارة العادية في اي شيء عادي غير نسائي:

ممكن تتقاسمي المشروع مع احد اقرباءك من الرجال ويصير انتي مجرد ممولة .. طبعا هذي يبغالها اكوني عندك فلوس جاهزة .. يعني حوالي مثلا 30,000 ريال وهو برضه مثلها .. ويصير الله يعينك الرجال حيكون الكل في الكل لانه هو اللي حيشتغل ويتحرك ويروح ويجي وانتي بس في بيتك تنتظري فلوسك نهاية كل شهر .. وطبعا ممكن هالشي يخليه يكسل ويتقاعس عن الحماس للشغل .. فالأفضل انك مثلا تدخلي في شراكة معه على ان تكوني مثلا انتي ب33% وهو ب66% .. يصير هو الممول الأكبر وأكيد وقتها حيتحمس أكثر لأن اغلب الحلال راح يكون حلاله .. كما انه لو كنتي انتي 50% معه وهو 50% راح يحس بظلم كونه هو يداوم في التجارة ويهتم ويباشر العمل والمراقبة وانتي بس قاعدة في البيت وتاخذين نفس دخله الشهري .. فأرى فكرة انك تكوني بالنصيب الأقل فكرة ممتازة ..


فكري في كلامي .. والله احسه ممكن ينجح .. طبعا كله بمشيئة الله بعد التخطيط السليم ودراسة الموضوع


ولتمويل المشروع ايا كان فعندك طريقة آمنة ومضمونة:

صندوق عبداللطيف جميل لدعم المشاريع الصغيرة ..


صندوق جدا ناجح .. يبدأ بأنهم يسألون المواطن بفكرة مشروعة وماهي بالضبط .. ويشترطون عليه اشياء منها:

1: ان يشتغل بنفسه في المشروع .. يعني مو يقول ابغى افتح محل حلاقة ويجيب عمال .. لا .. يشتغل بنفسه
2: يشرفون على تدريبك بنفسهم في معاهد متخصصة لمدة 4 اشهر .. سواء حلاقة او نجارة او الكترونيات .. الخ
3: المبلغ الذي ستأخذه سيكون قرض حسن .. يعني ترجعه بدون اي فوائد ..
4: خلا فترة عملك في المشروع سيقوم فريق من عبداللطيف جميل بزيارة مقر عملك وتقييم شغلك لمتابعتك والمحافظة عليك من الأخطاء
5: يتم تسديد مبلغ القرض بخصم جزء من ارباحك الشهرية
6: طالما لم تسدد مبلغ القرض كاملا فالمشروع هو ملك لعبداللطيف جميل وانت مجرد مشارك معهم في المشروع
7: بعد انتهاء دفع كامل القرض يصبح المشروع ملك لك بالكامل ولك حرية التصرف فيه او تشغيل احد غيرك فيه من عمال وغيره ..

كلنا شفنا الدعاية حقتهم .. جابوا برضه بنات في اشغالهم ونجحوا .. والله صندوق خيالي

يعني يسلفك .. ويدربك .. ويشرف عليك الى ان تنجح .. وترد المبلغ كامل زي ماهو بدون اي فوائد ربوية