من وجهة نظري أشوف راعي هالفكرة يا إما إنه حسود أو إن قلبه مريض و العياذ بالله و بصراحة ما عنده وطنية ولا عنده نخوه و لا شهامة ... يعني الحين البلد فيها نسبة بطالة كبيرة و نسبة عاطلين و عاطلات معهم الشهادات اللي تبيض بالوجه و نسبة الشباب الكبيرة ماشاء الله تبارك الله و نسبة فقر عاليه و بعد هذا كله يفكر إنه يسترجع وش ذا ؟
ودي أعرف الحين هذول اللي يبون يدرسون هالفكره الحقودة و الحسودة ما يقرون الجرايد ؟ ولا يتابعون أحوال الناس و همومهم ...
س/ وش بيستفيدون ؟
س/ وين الشهامة و الرجولة و النخوة و الكرم ؟
س/ وش سويتم مع اللي أكل المال العام ؟
س/ وش سويتم اللي يدفع رواتب للأجانب بـ 20000 ريال أو 50000 ريال أو 100000 ريال شهرياً و يحولونها للخارج ؟
س/ وش عملتم في آخر فضيحة اللي صارت في جدة ؟
الشباب يبحث عن عمل و يبغى لقمة حلال و لا يبغى يمد إيده للحرام ولو خيرتم الشباب بين الوظيفة و بين هالـ 2000 ريال صدقوني إنه راح يختار الوظيفة لكن الحاجة و الديون هي اللي خلت الشباب يقبلون
مع العلم إن هالشباب وطنيين أكثر من ذا اللي وده يدرس و يقترح هالإقتراح الفاشل اللي يدل على الحسد و عدم حبه للوطن ...
وينكم ما توفرون وظائف تليق بالشاب السعودي اللي قلبه كله إخلاص و حب للوطن ؟
وينكم ما تحاسبون المفسدين و أصحاب الأموال اللي ما يزكون و اللي ما غير يسوون أعمال خيرية في الخارج و نسى وطنه و أهله ... الحين سنين و سنين و الشباب يشتكون من البطالة و ينكم ما شفتم حل لهالمشكلة يعني قدرتم ما شاء الله إنكم تفكرون تسترجعون الأموال ولا فكرتم لحل المشكلة الأساسية و هي مشكلة البطالة ؟
وينكم ما تشوفون الطرق كيف هي ؟ وينكم ما تحلون مشاكل الفقراء و المحتاجين و الأرامل و المطلقات ؟
و ينكم ما تشوفون مشكلة إرتفاع الأسعار في المواد الغذائية و العقار ؟ و ينكم ما تشوفون مشكلة طيور الظلام اللي كل يوم و يوم يهددون أمن الوطن و المواطن ؟ و ينكم ما تشوفون مشكلة إنتشار المخدرات بين الشباب و مشكلة الإغتصاب و السرقة و النصب و الإحتيال و مشكلة الأزواج و مشكلة الشركات النصابه اللي تتعاقد مع بلديات المناطق ؟ وينكم ليش ما تقترحون تدريب الشباب و البنات على إطفاء الحرائق في المدارس ؟ وينكم ما تشوفون حل لمشكلة الواسطات ؟ .......................... إلخ إلخ إلخ
يا مجلس الشورى ترى فيه كثير شباب نفسياتهم تعبانه و كثير بنات يبكون في الخفاء و برغم هذا كله مخلصين للوطن و صابرين ولا أنجرفوا وراء الأوهام و وراء اللي يسممون العقول و الخونة ولا همهم الجزيرة و لا ذاك اللي يصيح من بريطانيا ... هذول الشباب عيالكم ... حنا المفروض نفتخر فيهم لأنهم فعلاً يبيضون بالوجه و فيهم الخير إن شاء الله و بدال ما نراعي مشاعرهم و نساعدهم نقوم نعاملهم بلؤم و أنانية و حسد و جشع و طمع و بغض تراهم منكم و إنتم منهم ... يا حسافة لو تطبق هالقرار يا مجلس الشورى ... عيب و الله عيب ... شعب صابر و وفي و يساعد و يساند و كذا موقفكم منهم يا مجلس الشورى يالآباء باكر يدري أبو متعب عنكم و إن شاء الله ما راح يأيدكم لأنه قلبه طيب و يحب شعبه
لا حول ولا قوة إلا بالله العلي العظيم
إنا لله و إنا إليه راجعون

سبحانك اللهم و بحمدك أشهد أن لا إله إلا أنت أستغفرك و أتوب إليك