هاذي تجربة بنت مع نطاقات


في يوم الاربعاء 30 نوفمبر جاني اتصال على الجوال

كلمتني وحدة وقالت انتي فلانه احنا اخذنا بياناتك من حافز

احنا برنامج " طاقات " وهو برنامج حكومي الزامي وعندك موعد يوم الاحد عشان نعرفك على

البرنامج وبعدين قالت عندك اي استفسار قلت لها وين مكانكم قالت احنا لنا مكاتب في مجمع العثيم

مول وهناك مقرنا الرئيسي ومكاتبنا معروفة وفي نهاية المكالمة قالت انا حابة اعرف اذا راح تجين

لان اذا رفضتي فيه غيرك ينتظر الرصة فلا تضيعينها عليهم قلت ان شاء الله


يوم الاحد

رحت لمجمع العثيم مول في الدمام طبعا معروف مكانه بمدخل الدمام مقابل الكلية التقنية للاولاد

سالت هناك السكيورتي قال في الدور الاخير "دور المطاعم"

طبعا اللي تبغى الوصف تمام من عند مطعم ماكدونالدز الدرج اليسار ترقين وتلاقين المكاتب على يدك

اليسار ولو ما عرفتي فيه سكيورتي اسئليه بس طبعا ما يتوه الوصف

دخلت المكاتب كان فيه وحدة في الاستقبال من جنسية عربيه نادت علي وقالت اكتبي اسمك ووقت

دخولك كتبت بياناتي في ورقة عندها وقالت لما تخرجي بتكتبي الوقت وتوقعي وقالت روحي ثاني مكتب

يسار طبعا رحت قالت لي اسمك عطيتها الاسم قالت دفتر العائلة (لما كلمتني قالت جيبي اي اثبات

عندك بطاقة احوال او جواز سفر او دفتر عائلة) وسالت عن اسمي وقالت ماجبتي اثبات ثاني قلت لها

ماعندي قالت تى لو بطاقة مستشفى او بنك طبعا انا ما اخذت بوكي وكانت هذي غلطة بس مشتها لي

المهم قالت استريحي بعد شوي نعقد الاجتماع التعريفي جلست في اللوبي وكنا حوالي 15 بنت او اكثر

ما حسبت بالضبط كم بس في هالحدود جلسنا تقيبا ربع ساعة وجت وحدة دعتنا للاجتماع

دخلنا قاعة وبدأت تشرح لنا عن البرنامج انه برنامج حكومي الزامي للبحث عن وظائف وتوفيرها

للمسجلين بياناتهم في حافز طبعا الوظائف راح تكون في قطاع خاااااااص مو حكومي وقالت احنا مالنا

اي علاقة بالوظائف الحكومية ..

قالت ان برنامج طاقات هو برنامج كيف ان الفرد يستغل طاقته للبحث عن وظيفة وان القطاع السعودي

الخاص تطور وشرحت يعني بايجاز مزايا البرنامج وكلها اشياء عامة تتكلم عن التوظيف والقطاع

الخاص والتحفيز وبناء الشخصية وهالاشياء بعد الشرح اللي استغرق تقريبا 15 الى 20 دقيقة

قالت ان فيه اختبار لازم نؤديه لتحديد شخصية كل وحدة منا وعشان نتعرف على الوظيفة اللي تناسبها

طبعا كانت خلال فترة الشرح تسالنا اذا احد عنده استفسار او ان كل شيء واضح بالنسبة لنا

المهم طلبت منا الخروج من قاعة الاجتماع والانتظار في اللوبي على بال ما تجهز الاجهزة الحاسوبية

للاختبار انتظرنا 10 دقائق بعدها دخلنا وكان مكتوب على كل جهاز اسم اللي راح تستخدمه وبكذا كان

الاختبار جاهز طبعا هو ماهو اختبار هو فقط كم سؤال عن الشخصية والوظائف اللي ترغبين بها وكم

سؤال انجليزي وكم سؤال رياضيات اشياء جدا بسيطة وسطحية .

ما في وقت محدد للاختبار هي قالت تقريبا نص ساعه الى 45 دقيقة بس احنا اخذنا وقت اقل بكثير

لان طبيعة الاسئلة عامة ومافيه جديد بعد الانتهاء من الاختبار طلبت منا الانتظار في اللوبي وقالت

لنا ان لازم تظهر نتيجة الاختبار على اساس تحدد كل وحدة نتيجتها بعد ما تظهر النتيجة راح يكون لك

موظفة تتابع حالتك وتبحث لك عن وظيفة حسب المتوفر وانتي برضوة راح تبحثي عن وظيفة وراح تنعقد

بينك انتي ومشرفتك لقاءات بشكل دوري عشان تبحثون التقدم اللي حصل معكم وكمان راح تعلمك طرق

جديدة ممكن لكتابة السيرة الذاتية وايضا للثقة بالنفس عند المقابلات وهذا غير الدورات التدريبية اللي

يقدمها االمركز مجانية بس طبعا كلها تصب في التحفيز والوظيفة وهيك ..

بعد ما طلعت نتيجة الاختبار تحدد لكل وحدة يوم تقابل فيه مشرفتها لتبحث معها حالتها والى الان

ما جاء موعدي مع المشرفة ..

بصورة عامة الوضع مطمئن والبرنامج جميل اعجبني جدا وانا عاقدة عليه امال كبيرة اتمنى انها ما تخيب

خصوصا مع الدورات التدريبية واكتساب الخبرات والعمل الجماعي كلها اشياء تبعث على الامل

اسال الله لي ولكم التوفيق


تجربتي البسيطة وان شاء الله انكم استفدتم منها لو القليل

منقوول