السلام عليكم ،،
ياجماعة الخير ،، قولوا لا إله إلا الله ،،
عندي حاجةٍ في نفسي بقولها لكم ،، واللي يبي يفهم زين على زين واللي ماهوب فاهم هذي مشكلته ،،
بالنسبة للمحاضر ومتى توصل والكلام الدراج في سياق إثارة البلبله والتشتيت الحاصل في تأكيد الخبر من عدمه ،،
أنا بريحكم بكلام واقعي ،،

أولاً: سواء المحاضر خلصت ولا ماخلصت مافيه آمل إنك تشوفها قبل يومها ،، بمعنى إنك لازم تنتظر لين تأخذ مجراها النظامي حسب ماصدر من وزارة الخدمة المدنية أن الأمور تتعلق بإدارات الجهات ممثلة بشؤون الموظفين لكل جهة حكومية.
ثانياً: لا أحد ينتظر إني أجي هنا وأقول (أبشررررركم المحاضر وصلت في إدارة كذا وكذا) طيب وين الفائدة من هذا الكلام؟ لا أنتم استفدتوا وش المرتبة اللي بتحصلون عليها ولا أنا اللي جبت شيء لكم شيء جديد تستفيدون منه لأنه كلام مكرر وملينا منه.
أخيراً: نصيحة لكم من باب (الرضى بما قسمه الله) ،، لو حصلت يا عزيزي ويا عزيزتي على مرتبة غير مناسبة لك أي بمعنى أنك تستحق المرتبة السادسة وعطوك الخامسة نصيحة لك لا تتحطم ولا تيأس ولا تجزع من هذا الشيء ،، وأحمد ربك ولا تعترض ووافق عليها والله يكتب لكم اللي فيه الخيره ، لكن!! إذا عطوك مرتبة أقل من المرتبة اللي تستحق بمرتبتين أي معنى إنك تستحق السادسة وعطوك الرابعة فهذي من حقك تعترض والله يحق الحق لراعيه.

( لا تتأملون بشيء أكبر مما سوف تنصدمون به ) ،،

هذا ما أحببت أن أسلط الضوء عليه ،،
وأسال الله لكم التوفيق وأن يكتب لكم اللي فيه الخيره ،،

دمتم بود ،،