هلا بالجميع واعتذر عن التأخير.
قبل ادخل في التفاصيل، استحضرني مشهد سينمائي للكوميديان محمد هنيدي من فيلم (جاءنا البيان التالي) الي كان يجسد فيه دور مذيع تلفزيوني يجري لقاءات عن احتفالات رأس السنه، أجرى حوار مع احد المساجين ودار بينهم هذا الحوار.
هنيدي: اعزائي المشاهدين واحنا داخلين ع السنه الجديده بنقابل احد المواطنين نتعرف؟
السجين: متولي
هنيدي: عم متولي بمناسبة السنه الجديدة تحب تقول إيه ؟
السجين: اقول حسبي الله ونعم الوكيل
أما التفاصيل، فطبعا صحيت بدري، تكجولت وتروشنت ومريت المغسله اخذت شماغي وسيده ع وزارة الخدمة المدنية، طلعت الدور الثالت اقابل خويي قالولي انه مُجاز ، قابلت شاب لطيف وطلبت منه اتعرف على مكان الاستعلام عن معاملة توظيف ماقصر دلني بنفس الدور على صالة كبيرة فيها كمية اجهزة حاسب وأدراج ودواليب مالها آخر وللاسف مافيها إلا موظف واحد بس، مخلينه يستقبل طابور من المراجعين الي جايين يسفسرون عن معاملات رجال ونساء !!!!
وصل دوري بعد ساعة إلا ربع تقريبا، طلع الشاب هذا حبوب جدا ، بس للاسف طيبته هذي مصطنعة لأنه جالس على يوزر مافيه صلاحيات وماغير يطقطق بأصابعه ويدخل رقم الهوية الوطنية على الصفحة الي كلنا ندخلها من موقعهم المنسدح، يعني موظف ديكور ههههه
طلعت من عنده ( يائس ) وأنا ببالي أقرب طريق لماما نوره بدون زحمه، مير ألقى مكتب صغيرون وفيه واحد(ن) أجودي، قلت له بنشدك عن وظائف جامعة الملك سعود قالوا لي باشر السبت الجاي ويوم رحت أكمل اوراقي قالو دزينا ملفاتكم للخدمة، بس ابي اعرف وش مصيرها لا اكثر.
قال: هذي بتلقاها في الفرع !! قلت وش الفرع ياجدي ، قال ياخوي انزل عند السيكورتي وهو يدلك !! <<< وجع رده يذكرني بأحمد حلمي يوم يقول، هوا ليه مفيش حد طايق حد في البلد دي 
نزلت السكيروتي وماقصر دلني على الفرع الي يبعد عن الوزارة ثلاثة كيلو تقريبا، وصلت هناك ونشدت عن الوظايف إياها ، وقالوا اطلع الدور الثاني عند واحد يقاله ن.ع هو المندوب حقها !!
يؤ يؤ يؤ .. وش سالفة المندوب ؟؟
ركبت المصعد وجلست اهوجس، كلمة (مندوب) ماهي بسيطه، لحظتها حسيت اني مقبل على مرحلة صاعقة تتطلب رباطة جأش، دخلت على مكتب المذكور وسبحان الله مقيولة (سيماهم في وجوههم) كتلة ضخمة هامدة على كرسي دوّار ترد من طرف خشمها على اشياء تصورك أنها ملكية فردية!!
شغلت اسطوانتي، يافلان انا صار لي كذا كذا ، وقالوا لي باشر السبت الجاي ويوم رحت للجامعة قالوا الاوراق عندكم وانا مدري وش اسوي؟
قالي - والفطور يلوك بخشته (الله يقلب تسبده) - ياخوي ماعندي شي، هم يختارون الملفات وتجيني جاهزة من عندهم وانا أأشر عليها هذا مطابق وهذا ماينفع!!
وبكذا نوصل للخلاصة ( حسب ماقاله المندوب حق الجامعه )
الأسماء رفعتها الجامعة منذ مبطي وبإختيارها ( المحسوبية )
يعني التوظيف عندهم بـ ( الـواو ) لا مسابقة ولا هم يحزنون
واليوم أنا ماقول غير ( يخرب بيت الدجل والنصب الاحتيال )
والحين ياحلوين تذكرتو مشهد ( حسبي الله ونعم الوكيل) ؟ 