أختي أنا عندي وجهة نظر .. الحلويات من كنــافة و غيره مو حاجة يبي لها تحضير مسبق من صاحب العزومة أو الطلعة يعني بدل ما ينتظر له وقت لا يكلم محل الحويات في دقايق و طلبه جاهز .. و غير كذا هذي أشيـاء تكون غالبـًا جاهزة في المحلات .. يعني أنا لما أبي أطلع برا البيت مثلا ممكن أوقف عند محل حلويات بس ما راح أوقف عند بيت و أطلب منه .. .. يعني مثــلا مو زي الكبسات و القرصان و الجريش و الأكلات الشعبية الي الواحد يحرص عليها عشان يضيف النـّاس و يوجّبهم ، يعني الي أنتي تسوينه أشيـاء تكميلية في العزايم مو أشيـاء أسـاسية .. الكنافة و الأشيـاء هذي ..

عندك حليـن من وجهة نظري:

- إذا أنتي شاطرة في الأكلات الشعبية أو أمك شـاطرة في الأكلات الشعبية .. ركزوا ع الأكلات الشعبية مثلا قرصان و جريش و سليق و غيره من هالأشيـاء .. و حطي مع كل وجبة مثـلا شي بسيط من الكنـافة كهدية و قولوا لو عجبتكم إن إحنا بإمكاننا نبيع لكم يعني كعيـّنة ..

- تعرفي على حريم يطبخون يعني ناس شغالين في بيع الأكل من البيوت و كذا .. و قوي علاقتك فيهم .. و قولي لهم أنك شاطرة في هالأمور. و أحب كبداية نتسـاعد .. يعني تعطي صاحبة المطبخ شي من الكنافة تذوقها و تقول رايها فيها .. بعدها تتفقون بأن لو عجبها شغلك إنها تسوق لك . بحيث متـلا مع كل زبون يجي تحط قطعة قطعتين كبداية للزبـاين .. و تقول إذا عجبكم ترا نقدم لكم إيـّاها .. مقـابل السعر الفلاني بالكيلو مثـلا .. و تتفقين معها .. تقولي لها .. أنك راح تشتغلي بالكيلو .. و هي تاخذ مثـلا 30% أو 20% من الفلوس الي تدخل عليكم ... حسب الاتفاق الي بينكم من قيمة السعر .. يعني ممكن تتصلي عليك يوم تقول لك يا فلانة نبي كيلو أو مثلا عشرة كيلو حسب يعني الي تتفقوا عليه و الكيلو بـ عشرة ريـال ..
10*10 = 100 ريال المكسب.
تخصمين لها يصير مثلا تاخذه بـ 70 ريال و هي تحط 30 في جيبها ..


لازم تفهمين منتجك أختي بأنها ما هي سلعة أسـاسية .. بل تكميلية .. ممكن أنك شاطرة بهالشي . . و ركزي عليها هذي نقطة قوة فيك ... شدي حيلك ..

غير كذا بما انك في جدة و تحبون البحر تقدري تمري على الكشكـات المحترمة الي أشكـالها جذابة و تبيعينها لهم بسعر معين و تخليهم يتكسبون منك لو بريال و الا ريالين .. ليه أنا قلت الي أشكـالها نظيفة و حلوة؟ عشـان بس الزبون يرتاح لأن غالبـًا المحلات الي أشكالها متواضعة و لا هي نظيفة الواحد ما يرتاح للأكل الي يبــاع فيها ...


أختي ... الرزق مقبل عليك بس بدون صبر ما راح تحصلي شي .. فيه في التسويق فيه استراتيجية تسمى ( Freebie marketing ) و هي استخدمتها شركة أمواس الحلاقة الي هي جيليت .. و كانت توزع كبداية كل شي ببلاش إلى أن الناس حست بقيمتها و أهميتها و كيف تشيل شعر الدقن بسهولة .. بعدها غيرت استراتيجية و صارت مو ببلاش .. زبدة الكــلام إن الشركة الآن من أكبر الشركات العملاقة في العالم

المطلوب منك ما تبيعي كل شي ببلاش و لكن تتقبلي هامش ربح بسيط كبداية .. و ريال على ريـال يبني لك ثروة ... الغنى و الثروة تبنــى بنـاء و ليست تأتي في يوم و ليلة إلا ما ندر ..



إذا جت أفكـار ثانية في بالي راح أوافيك بها .. ترا الي عندك شي ألف بنت تتمناه .. و تلاقين بنات كثار شاطرين في أشيـاء معينة لكن الفرق بينك و بينهم إنك اتخذتي خطوة عمليـّة و فعلية و هما شاطرين في البهرجة و التميلح

كل الكلام الي يتعلق برأيي بالكنافة و الحلويات مبني على وجهة نظر واحد من الرياض فيعني ما أدري يمكن بالنسبة لكم هالأطبـاق أسـاسية و يبي لها تحضير مسبق و كذا
و ربنا يوفقك