السلام عليكم ورحمة الله وبركاته

الحمدلله والصلاة والسلام على رسول الله وعلى آله وصحبه أجمعين

اقولكم وش صار معاي بالضبط

اليوم الاربعاء هو اول يوم لي في الكشف الطبي في مستشفى قوى الامن في الرياض
جيتهم الساعه 07:55 دقيقه .. انتظرنا عند الباب .. فتح الباب الساعه 8 .. قاعد ينادي بالاسامي .. واستغربت اسمي مو معهم مع اني متأكد ان موعدي اليوم .. المهم رحت وسئلته .. قالي انت اول يوم ؟ قلت ايه .. قال يا شباب اللي اول يوم يجوني الساعه 10 بالضبط .. انتظرت فسيارتي ساعتين .. رحت لهم الساعه 10 .. وقاعدي ينادي بالاسماء .. اسمي معهم الحمدلله .. جلسنا على الكراسي بالترتيب .. بعد كذا خلونا نأخذ بصمه .. وطلعنا بعدها على الوزن والطول .. المهم انا طولي 168 بالضبط .. يوم قاس طولي .. طالع فيني .. اخذ الورقه .. قالي انتظر برا .. المهم انتظرت لين خلصو كلهم .. اللي رجعهم علشان الطول يمكن 10 او 11 ماني متأكد .. بعد ما خلصو كل المجموعه .. نادا على اسامينا يقيس الطول من جديد .. علشان القصير يقتنع انه قصير ... كتب على الورقه 168 قالي الله يوفقك ...( حسيت الدنيا انفتحت فوجهي الحمدلله ) بعدها رجنا على الاشعه .. يأخذون اشعه لأظهرك وبطنك .. وقالو لنا خلاص تجونا يوم السبت والاحد علشان نكمل باقي الكشف .. السبت الحضور الساعه 7 .. والاحد نفس الكلام الساعه 7 .. قال اللي يتأخر عن الساعه 7 راح يكون مجموعه الساعه 9 .. طبعاً الساعه 9 فيه مجموعه ثانيه على كلام المناوب .. والحضور يوم السبت والاحد بالزي الرياضي وما حدد اي لون .. كانو معنا مجموعه من المباحث والدفاع المدني يكشفون ..شباب لأحد ييئس .. تأكد ان مو جايك الا رزقك ..

وبالتوفيق للجميع