[align=center]

السلام عليكم و رحمة الله وبركاته

أبوي مطلق أمي و عايشين مع أمي بيت مستأجرينه أخواتي و كلهم موظفين يعني الحمدلله وضع البيت جيد

بس بصراحه ــ أنا وضعي خاص ،،،

الله يهدي أبوي و يصلحة دلعني بزيادة عن أخواني و ماكان يبخل علي و هذا بسبب ظروفي الصحية لأني ألحمدلله أنخلقت شوي تعبانه أقل زعل كان يأثر فيه و يخلي أزمة الربو تجيني و يتعبو معي أهلي مستشفيات و أبر و حاله ما يعلم بيها إلأ الله عزوجل


كبرت و من صغري أخواني يكرهوني و ما يتمنو لي الخير و يعلم الله أني ماأبالغ في كلامي ،،، و لا أبغى أتكلم عن هاذي الأمور لأنه مافيه أتعب أكثر من تعبي !


الحمدلله طلعت ع الدنيا و أنا عندي ربو و من يوم ربي خلقني و الدكاترة يعالجوني بأبر تحتوي على نسبة عالية من الكورتيزون لأنه ماكان جسمي يقبل أي أدويه ألين آخر أبره أخذتها قبل سته سنوات ــ لما وقفت الأبر بدأت الآثار الجانبية للكورتيزون تظهر علي و تظرني بشكل كبير تساقط الشعر و ضعفه و عدم نمو الأظافر و حساسية الجلد و ضعف عام أقل مجهود يتعبني و أقل دفه تطيحني و أقل دقة أشوف الموت من ألمها و تآكل الأسنان وتساقطها فقدت أكثر من عشرة ضروس و لما رحت لدكتورة الأسنان بمستوصف خيري أسعاره متواضعه ـ قالت لي بالحرف ـ أحمدي ربك أنه طاحت الضروس اللي من جوه و أبتسامتك شكلها طبيعي ، و لكن أثقل و أكبر هذه الآثار الجانبية هو تضاعف وزني ــ طولي 170 سم و كان وزني 73كيلو و بعد أربعة شهور و نصف من توقف الأبر أصبح وزني الضعف 141 كيلو و ظل في أزدياد حتى وصل إلى 159 كيلو ،،، اللهم لك الحمد اللهم لا أعتراض


رغم وزني الضخم ـ سبحان الله ـ أعاني من فقر الدم و نقص الكوليسترول ــ تعبت من سمنتي المفرطة اللي يعلم الله عزوجل إن مالي يد فيها وربي أكتب الكلام هذا و أنا أبكي ـ تعبت و أنا شايله وزن ثاني فوق وزني الطبيعي حتى دراستي مو قادره أخلصها تخصصي عملي جداً يبغى صحة جيدة ـ أصبت بأرتفاع في ضغط الدم بشكل مفاجأ خصوصاً مع تضاعف وزني و طحت في الجامعة و من وقتها ما كملت دراستي للآن أنقطعت ثلاثه سنوات و نصف و الجامعة وقفت عني المكافأة لأني تعديت الفترة الأساسية لدراسة البرنامج أستغليت فترة جلوسي في البيت و تعلمت ع الكمبيوتر و صرت الحمدلله سريعه فيه تعلمت على حزمة الأوفيس ماعدا الأكسس مره صعب و تعلمت على برامج التصميم و صرت أشتغل من البيت عشان ما أحتاج لأحد أعمل تصاميم و بحوث و تقارير و أوراق بحثية و أشياء كثيره و كنت أحرص على أن زبايني يكونو من برى جدة حتى لا أعطي مجال للتواصل المباشر و يكون التعامل بالحسابات و رسائل الجوال و الإيميلات و بس و منهم من كان يخاف الله تعالى و يرسلي فلوس و حق تعبي و منهم من كان يستغلني وأشتغل له الشغل كامل و لا يدفع لي و لا ريال - حسبي الله عليهم دنيا و آخرهـ - ألين ما خرب كمبيوتري و ما صار عندي جهاز الفلوس اللي معاي صرفت بيها على نفسي و على صحتي وقعدت فترة بدون كمبيوتر و الجهاز اللي معاي حالياً أشتراه لي فاعل خير جزاه الله ألف خير


بس مافي شغل زبايني شافوا لهم أحد ثاني يسوي لهم شغلهم ـ حالتي صعبه و أخواني و أخواتي مافي منهم أي مبالاة ما يبغو يساعدوني بسبب حقدهم علي كما ذكرت ، حتى لما أتعب روشتة الدواء مااقدر أشتريه خصوصاً أن معظم الأدوية اللي تتناسب مع جسمي ما تتوفر بالمجان في المستشفيات الحكومية


لفيت على الجمعيات الخيرية و على الضمان و على أي مكان ممكن يساعدني و مافي فايده كلهم يرفضوني عشان أصغر من السن المطلوب لأستحقاق مساعداتهم و لأني لا مطلقه ولا أرمله و أبوي الله يسامحه عايش بس ما يدرون أن أبوي أتصل عليهـ يسبني و يقلعني و يقفل الخط بوجهي و حافز رفضني لأني طالبة أنتظام و لكني منقطعه عن الدراسة لظروف صحتي و لعدم وجود أي مصدر للرزق لي


حتى أهل الخير لما حاولوا يساعدوني و طبعاً بيرسلوا أحد يتأكد من وضعي و من حقهم يشوفوا وضع البيت جيد يصرفوا نظرهم عني و ما يصدقوني يحسبوني كذابه و لكني مستعدة للخضوع للكشوفات و الفحوصات في أي مستشفى بأشراف الشخص اللي يبغى يساعدني خصوصاً أن علاج سمنتي لا يتوفر في المستشفيات الحكومية و أنما في المراكز الخاصة بعلاج السمنة بأنواعها..! ، و يلزمني وقت عشان أتعالج و أنزل حتى لو جزء من وزني عشان ألحق أكمل دراستي قبل ما يطوى قيدي نهائياً و أنحرم من دراستي الجامعية و شهادة البكالوريوس


في اليوم أبكي مرتين من ظلم مجتمعي ليه ... مو قادرة ألبس ملابس حق بنات في عمري ، محلات المقاسات الكبيرة كلها غالية و ياليت على موديلات حلوه لما كنت أنزل السوق قبل سنتين أشتري لي قطعة ما أفكر عجبني أو ما عجبني اللي يجي على قدي آخذه أهم شيء حاجة تسترني ، بعض من أخواني و أخواتي ينحرجوا من حجمي الضخم و مره قالها لي أخوي لما أخرج معاكي كأني خارج مع خالتي أو جدتي ، أتعب كثير خصوصاً أن المصابين بالسمنه لديهم مناعة أضعف من الأصحاء ، مافي شاب يفكر أنه يرتبط بوحده بحجمي ، نظرات الناس و تعليقاتهم و سخريتهم اللي مافيها أي نوع من الأحساس و الأنسانية ، دراستي مو قادرة أكملها خصوصاً أن تخصصي مكلف مادياً و عملي جداً و فيه أدوات كثيرة و شيل و حط و لكنه يناسب قدراتي الذهنية ، حتى لما وقفت دراستي صرت أقدم على أي وظيفة عشان أصرف بيها على نفسي و لكن يرفضوني عشان وزني اللي يعلم الله مالي أي ذنب فيه ،،، و الله أني سويت أكثر من خمسة و عشرين مقابلة شخصية دون النظر لمهاراتي و إمكانياتي ولا أستطيع العمل كحارسة أمن أو ما شابه بسبب صحتي الضعيفة و من أشهر قليله أكتشفت أني أعاني من بداية خمول في الغدة الدرقية ...!


و الآن قاعدة أدرس كمبيوتر عشان يصير عندي شهادة حاسب أتوظف بيها بإذن الله و لي يومين أبكي عشان قيمة الدورة قيمتها 2500 ريال دفعت منها 1800 باقي 700 و حق الباص يوديني و يجيبني الشهر بـ 200 ريال دفعت حق أول شهر بس باقي لي حق الثلاث الشهور الجاية 600 ريال ـــــ يعني مجموع اللي ناقصني 1300 ريال ، حتى اللي يبغى أسم المعهد و رقمه و يآخذ أسمي و يتفاهم معهم و يسدد لهم ماعندي مشكله بس لو صارت لي أي مشاكل و أحراج بسببه في ذمته و ماني مسامحته دنيا و آخره

يشهد الله تعالي عن صحة كل كلمة و الله خير الشاهدين


من زمان و أنا نفسي أكتب لكم الكلام هذا و مستحية مرهـ و خجلانه أنه أقولكم هاذي الأمور ،، بس ما تدرون قديش مرتاحه و أنا حاسة أنه في أحد راح يعرف معاناتي


يسعدكم ربي دنيا و آخرهـ و جعلكم من سكان جناتهـ و جزا الله خير الجزاء لكل من أعطى من وقته لقراءة قصتي و اجتهد في مساعدتي حتى لو كان ذلك بالدعاء بظهر الغيب و الكلمه الطيبة


.
[/align]