استغرب من بعض الاخوة الي يذكرون ان سعر المتر بـ 15 في الصين !
طول عمرنا نستورد من الصين ولاشفنا هالاسعار !
عموماً .. السعر اكثر من ضعف المذكورة وخصوصاً بعد نظام الجمرك الجديد ..

اخوي بختصر لك الموضوع بكلمتين .. النجيلة الصناعية بحر
والشركات الربحية التسويقية للأسف صارت تغالط كثير من الحقائق لأجل بيع
السلعه بأقلأ تكلفة وأسرع طريقة ممكنة ..

خذ هالمعلومات من صاحب مؤسسة نجيلة ونفذ أكثر من 5 مشاريع تجارية بالساعه
( 3 منها تابعت تنفيذها من الصفر ) وأكثر من 30 استراحة خاصة ..
عايشت مشاكلهم وافراحهم .. الى درجة أن احد الاخوة بالرياض كاد يبكي من مشكلة معينة !


النجيلة الصناعية :
* لحد يقولك أن النجيلة مايتغير شكلها أو لونها لمدة 7 سنوات ! اطلب ملعب نفذه من 3 سنوات وخله يوريك بنفسه .. النجيلة الصناعية صالحة لغاية 7 سنوات ولكن يتغير اللون بشكل تدريجي وتختلف اطوال الشعره من -3 الى 7 سنوات - .

* اهمال الصيانة واعادة توزيع طبقة الربل المطاطي يفقدك مميزات العشب , وتمسك الشعره بالشعره فتتحول النجيلة الصناعية الى اقرب بفرش المنازل !

* بالنسبة للأسعار , فالشركات قليلة بالسوق .. والاسعار تختلف من شركة لاخرى , تبدأ من 74 للصيني الى 80 وتبدأ من 105 الى 130 للهولندي الوطني .

* كثير من المؤسسات بالسوق تذكر ان هناك نجيلة هولندي .. وهذا كذب واتحدى أي مؤسسة تثبت أنه هولندي , اذا كان فعلاً هولندي فاطلب شهادة منشأ أو فاتورة مصنعية ! ولكن فيه شي اسمه ( سعودي هولندي ) وهذا افضل نوع بالسوق .. والي هو تكون الشعره الاساسيه ( مادة بولثرين ) والقاعدة السوداء ( مادة اللاتيكس ) من هولندا ولكن الخياطة في السعودية .

* لاتجزم بأن الي ذكرلك سعر ( 65 ) هو أرخص فعلاً من المؤسسة الي ذكرت ( 75 ) .. صدقني راح تندم الف مرة اذا بحثت عن سعر واهملت الجودة .. اقدر اعطيك نجيلة شعرها ممتاز ولكن قاعدة سوداء غير مدبلة واخدعك فيها .. دائماً حاول أن يكون هناك مستشار فاهم النجيلة .. لأنك راح تدفع مبلغ كبير منت رايح تشتري معلبات ! ( وهذي الخدمة اقدمها مجانية سواء بتاخذ مني ولا من غيري )

* لايوجد هناك 16.000 شعره في المتر بنجيلة الملاعب ! وهذي ضمن الامور التسويقية الكاذبة .. الموجود الأن ( 8816 , 8880 , 10500 , 11000 , 12000 , 13000 ) وغير ذلك فتسمى ( landscapes ) وليست احترافية للعب ومضره !

* الي يقولك أملك نجيلة معتمدة من الفيفا , اطلع من الباب الي دخلت منه لأن الرجل بدا يكذب ! والفيفا ما اعتمدت الا عينات قليلة من ضمنها " elite 55 " وهي الوحيدة الموجودة بالسوق السعودي ولكن فيه بعضهم ذكي ومايبي يحط بذمته , فيقول " مواصفات معتمده من الفيفا " وفي هذي الحالة كسبك وما استاثم لأن فعلا الفيفا مشترطة للاعتماد بعض المواصفات , فهو كسب المواصفات وترك الاعتماد .

* الصيانة تكلفك " 3200 - 5000 " ريال كل 8 أشهر .

* لاتحتاج نجيلة صناعية لملاعب الطائرة , سوها برمل الشواطئ افضل لك وارخص .

* الانارة " 10 - 12م " تكلف 1200 والكبوس 400 والتركيب 1000 ( اجمالي 2400 - 2600 ) مواصفات شعبية طبعاً .

* الشبوك تحسب بالمتر الطولي ( متر في مترين ) وتكلفته من 28 - 35 ريال بدون تركيب ..

* خلف المرامي ضع شبك سنارة صيد بعرض 7 م وطول 6 م ( يكلفك 3000 ريال ) وعمره 10 سنوات .. لو حاولت أنت وفريقين معك تقطعونه ماقدرتوا !

* المرافق , مثل مكتب استقبال وحمامات وانت بكرامه و مكان بيع بارد وعصائر يكلفك " 30 - 40 " الف .


هذي كلها أمور حطها بعين الاعتبار , وانا راح انزل دراستي لجدوى انشاء الملاعب خلال هذا الشهر ان شاء الله , وذلك لظروفي الحالية ..

وعموماً أي شخص محتاج يستفسر او اكون مستشار له باختيار النجيلة او مساعدة انا حاضر مقابل ( الدعاء ) ولا يشترط أن تاخذ النجيلة مني .. انا متواجد دائماً في المحل " طريق القصيم جوار الهلال الاحمر - و مخرج 28 مقابل اسواق الهرم " والي حاب ياخذ عينات للنجيلة فروعنا في :
الرياض - القصيم - حائل - حفر الباطن - تبوك

لا اعلم عن سياسة المنتدى في وضع الارقام .. لذلك من اراد التواصل عبر الجوال يراسلني ع الخاص ..


ابوخالد