انا عندي محل عصير وغلطت غلطتين لا تكررها :
1- الغلط الاول اخذت محل على شارع ما فيه حركة سيارات كثير وهذي مشكلة ، حركة سيارات كثيرة تساوي زباين اكثر.
2- اخذت محل في منطقة ما فيها كثافة سكانية ، يعني منطقتي كل بيت فيه عائلة عبارة عن زوج وزوجته وطفل او طفلين وهذي مشكلة ؟ ليش مشكلة
اولا : قلة الشباب في الحي وهم اكثر زباين محلات العصير
ثانيا : قلة الطلب على العصير
يعني الزبدة لا تاخذ بالاحياء الجديدة حتى لو الاجار ارخص ، خذ بمنطقة فيها كثافة سكانية لو الاجار اغلى شوي ، ولا تخاف من زيادة الاجار لانك تعوضه بالدخل والارباح....اما تاخذ محل اجاره اقل وزباينه اقل تتورط بالاجار والتكاليف مثل راتب العامل وسكن العامل وكهرباء المحل وغيرها.
3- موضوع الخمسين الف اعتقد لازم تزودها شوي لانه بيطلع لك مصاريف ما توقعتها ولا تقول لي وشهي لاني ناسي هههههه لكن انا مثلك بديت بخمسين الف ، لقيت نفسي عند نهاية التنفيذ صرفت مية الف على المحل.
4 - اذا تمشي المحل ديكور عادي وشغل عادي ممكن الخمسين تكفي ، لكن راح تخسر زباين تفكر بشكل المحل ، وكل شي له ضريبة.
5- موضوع انك تشتغل بالمحل بنفسك صعبة تستمر بالمحل ، وراح تطفش وتقفله ، لازم يكون عامل بالمحل وابحث عن السوري اولا او المصري اللي سبق انه اشتغل بمحل عصيرات ، وهذا بيريحك كثير لانه عارف الشغلة ، كيف تبحث ؟ تلف على محلات العصير وتسالهم.
6- اصلا لو جلست بالمحل بتلاقي مشكلة من يجيب طلبات المحل ؟ ومن يشتري الفواكه، وممكن لو انت معزم تجلس بالمحل تشتري الطلبات بالصباح وتجلس في المحل من بعد العصر الى اثنعش بالليل او وحدة.
كثير من الاشياء تروح عن راسي ، لكن لو عندك اسئلة انا حاضر

الله يوفقك عليك بالصدقة فانها من ابواب الرزق ، والمحافظة على الصلاة ، والدعاء يا قوي يا متين يا رزاق ارزقني ، لان الله تعالى يقول : " ان الله هو الرزاق ذو القوة المتين "