اخي الكريم : هل أنت في الرياض ؟ لأن خبرتي كلها بمحلات الرياض

نسيت موضوع عصارة البرتقال...
تحتاج عصارة برتقال كهربائية ( نفس الكبس ) سعر اقل وحدة الف وخمس مية...
لا تستخدم الكبس اليدوي لان الزبون راح يطفش من الانتظار ولا يرجع لك ثانية...ولو طلب جركل برتقال ، لو استخدمت الكبس العادي ما يملاه العامل غير بعد ساعة..

فيه اشياء اساسية هذه لا تحتمل تقليل النفقات فيها مثل الخلاط والعصارات..لأنها هي الأساس والشغل قايم عليها...

باقول لك سر ولا تقول لأحد عليه ، تراه سر
استخدم الميزان في شغلك...ولا تسوي لي كذا
ماهو ميزان الوزن الكبير ...لا...فيه موازين صغيرة توزن بالقرام...الكيلو...الف قرام..

وش فايدتها؟
فايدتها أنك تضبط شغلك وتضبط الطعم...لان الزبون لو لقى كل يوم طعم للافوكادو مثلا..راح يتعقد منك ولا يثق في المحل وتخسره...باعطيك مثال واحد عن الافوكادو...ولا اقدر اكتب كل العصيرات يطلع موضوع طويل واتعب من الطباعة

الافوكادو يا عزيزي 250 قرام مع الحليب تسوي كاس كبير...ويطلع طعمه ممتاز...ولا هو ثقيل ولاهو خفيف...لكن لو اشتغلت بالحبات بدون وزن..مرات تلاقي حبات كبيرة ومرات حبات صغيرة...لو بتحط مثلا حبة ونص..كل مرة بيتغير طعم العصير لان الوزن راح يختلف...مرة تكون 350 قرام ومرة 150 قرام...وبينهم فرق كبير بالطعم ...ولا تقدر تضبط ارباحك...موضوع الوزن يريحك كثير والزبون يثق أن كل مرة يجيك يلقى نفس الجودة...

الله يوفقك