اقتباس:
المشاركة الأصلية كتبت بواسطة .::عبدالله::.
السلام عليكم
الله يجزاك خير اخوي " أبو خالد "
متابع لموسوعتك من زمان ، والمفروض
من ادارة المنتدى تغير العنوان لـ " موسوعة المشاريع " : )
في راسي مشروعين ، الاول له فتره وهو يدور براسي
والثاني توه طاري علي من يجي شهر بس ..
الفكرة الاولى او المشروع الاول
وهو عباره عن بيع " هدايا العيد " للاطفال
وهالهديه عبارة عن كيس صغير فيه " بسكوت / حلاو / لعبة صغيرة / ومكن ريال "
ان شاء الله عرفت وش اقصد ؟ .. طبعا الان المصانع تطورت
وقامت تتفنن في الاكياس والكراتين الخاصة بـ هدايا العيد ..
مثلاً تلقى لك كيس على شكل " ثوب " ولا كيس على شكل " شماغ "
ولا كرتون صغير على شكل سيارة " همر " ..
المهم انها اشياء تجذب الناس لها  ..
طبعاً رحت لم شارع السويلم في رمضان الماضي
ولقيت هالاكياس اسعارها مرتفعه نوعاً ما .. يعني
الكيس فاضي يكلف حول الـ 3 ريال .. وفيه بـ 5 ريال وسته و ..
وتعبئته من الحلاو والالعاب تكلف ايضاً حول الـ خمسة ريال ان بغينا
شي جيـّد نوعا ما .. يعني اجمالاً [ 10 ] ريال تقريبا
بالنسبه لـ بيعه رحت لم محلات الهدايا ايضاً برمضان وبالعشر الاواخر تحديداً
لقيت انواع أقل من معقوله بـ 10 / 8 ريال .. ولقيت بالصدفة في محلات الصالحيه
للتمور نفس الاكياس بـ 15ريال ..!
والاقبال عليها كبيييييييييييير ، خصوصاً بـ قبل العيد بيوم ويوميييييين
والميزه اخوي بـ هالشي ان الحرمه او الشخص اذا جا بيشتري منك
هالهديه ماراح يشتري " هدية وحده " لا بيشتري اقل شي " 10 هدايا "
ان قلنا ان الهديه بـ 15 .. تصير الحسبه 150 ريال من شخص واحد !!!!
بنسبة ربح صافي [ 50 % ] .. يعني خمسين ريال ! تقريباً
طبعاً تنفيذ هالفكرة اللي براسي هي بيع مثل هالاشياء لكن عن طريق الاعلان بـ الجرايد
والمنتديات على الانترنت .. والتعامل مع محلات الهدايا الموجوده والاسواق الخيريه
وش رايك اخوي بـ هالمشروع وخاصة انه صغير ومايحتاج رأس مال كبير ؟
وهل ممكن القى محلات ارخص من شارع السويلم تبيع مثل هالاشياء ؟
ولو تقدر الله يعافيك تدلني على احد يصنع او يخيط مثل هالاكياس ؟
والله يجزاك عني وعن كل عضو كل خيييييييييييييييير
واسف على الاطاله ، المشروع الثاني لاحقين عليه ولا ودي اتعبك الان : )
|
حياك الله اخوي ...
الفكرة واضحه ومرتبه ... وفهمت قصدك بالظبط ..
الأجوبه كالتالي :
ــ المشروع ممتاز وغاية في الروعة , وفيه رزق جيد خلال موسمين ( عيد الفطر و عيد الحج ) وانا اشجعك عليه وعلى حسن اختيارك .
ــ للأسف , مافيه غير شارع السويلم في الرياض , ولكن ممكن تزور جده وتشوف سوق ( الهنداوية ) وهو مشهور زي شارع السويلم , وممكن تلقا خيارات اكثر من الرياض لأن اهل جدة يحبون هالشغلات .
ــ المعذره ما اعرف احد يصنعها هنا , ولكن اللي شفتها انت بشارع السويلم مستوردة من الصين او تا يلند او الفلبين .
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــ
حاول بقدر الامكان انك تبتكر موديلات جديده بمساعدة بعض البنات المشهورين بهالشغلات وفيه كم وحده معنا بالمنتدى مبدعين فيها وممكن تتعاونون بينكم وتعم الفائدة للجميع , وممكن تستخدمون المواد المتوفره مثل ( الخوص , السدو ..... الخ )
وموفق بإذن الله ...