المقابله كانت بالمركز الجامعي بالسامر تدخلون من البوابه اللي مكتوب عليها المركز الجامعي لدراسات الطالبات لانها اقرب للعماده تسألون عن مكتب العميده اعتقد انه بالدور الثاني مدري الثالث<<مضيعه

المهم استقبلونا السكرتيرات تبع العميده ومعاهم ورقه فيها كشف بأسماء الطالبات اللي يسوون المقابله وتقولين لها اسمك وبعدها يعطونكم اوراق فاضيه وتكتبين فيها سيرتك الذاتيه اسمك وعمرك ومؤهلاتك والخبرات والدورات والاشياء اللي حاطتها بالملف تبع التقديم مثل كرت العائله وشهاده حسن السيره والسلوك

بعدها طلبوا ملفاتنا الاصل والصوره وكرت العائله عشان يطابقونها وبعدها دخلوها للعميده منى ال مشيط هي اللي سوت معانا المقابله ومعاها السكرتيره تبعها ومسجله طلبه ووحده ثانيه مدري وش تخصصها
وبعدها نادوا علي طبعا لاني اول وحده اخذوا ملفي يعني مو بالترتيب الشغله دخلت وسلمت وكان الوضع لابأس به
مو بقد القلق اللي كنت فيه من قبل ماجلست لين قالوا لي تفضلي وسألتني العميده واللي معها كيف الحال وهيك

وبعدها قالت لي توك تخرجتي وكم معدلك واعطيتها برنت كامل الاسم والعمر وسنه التخرج والدورات اللي عندي
ومعدلاتي قالت لي وين ساكنه وبعدها سألتني ليش قدمتي على جامعه الملك خالد ؟
وبعده وش مسمى الوظيفه اللي قدمتي عليها ووين مقرها وليش هالوظيفه بالتحديد
جاوبتها قالت الحين تسألك مسجله الطلبه بالتخصص وسألتني عن مهام مسجل الطلبه وعن برنامج الوورد وش فايدته وهل لي برامج او مشاريع سويتها من قبل بمجال الحاسب
واللي جنبها سألتني لو انقبلتي على الوظيفه وش راح تقدمين للجامعه وهل راح اتحمل ضغط العمل
ورجعت العميده تسألني عن الثقافه وقالت وش الكتب الثقافيه اللي اطلعت عليها وسألتني الجنادريه السنه هذي
كم رقمها واممممممم ايه وسألتني بعد ليش مارحت بمجال التدريس قلت لها قدمت بس المسأله مطوله

هذي اللي اتذكرها الحين وبعدها قالت لي عندك اي شي تحبين تضيفينه قلت لا قالت بالتوفيق واعطتني الوثائق الاصليه والصور عندهم طبعا في اثناء المقابله كانت تدون ملاحظات بالقلم الرصاص على السيره الذاتيه
بس العميده شكلها جدا مريح وطيوبه واللي معاها نفس الشي يعني لاتتوترين ولا تخافين وكل شي بالحياه قسمه ونصيب والانسان ماراح يأخذ الا المكتوب له

اذا تذكرت شي بعد راح اكتبه لكم واتمنى التوفيق لكل العسولات اللي كانوا معاي اليوم وللي باقي ماحضروا المقابله