السلام عليكم ورحمة الله وبركاته
مساكم الله بالخير حبايبي اخباركم طيبين ان شاء الله (( الله يخليكم ادعولي ان الله يوفقني ويصبرني بالدورة حبايبي بكرة موعدي ابمشي بعد الغداء ابروح انا وأبـوي بيوديني هناك وبيرجع للقصيم والله اني خااايف من الدورة خاايف وبقوه
ابحضر عندهم من الساعه 6 ونص طبعاا ابروح ونا مامعاي اي اغراض .. اخاف يقولون لي فين اغراضك مع انهم طوارئ القصيم قالوا اذا رحت يعلمونكم بالرياض هل اذا رحت بكرة بيعطوني ورقة طلبات وروح اشتري عليها او بيقولون شفوي جيب كذا وكذا وكذا ... وهل يقولون لي اشتر الاغراض وتعال بنفس اليوم او يقولون بعد يوم او يومين
بصرااحه انا هاااااوي العسكرية وخااصة الطوارئ يعني لو يدوسون على وجهي عاادي لاني هاوي .. لاكن اللي جلست معهم من اقربائي يخوفوون بهرجهم .. اللي يقولي ترى بيجيك سب منهم . وبيجي عندك العسكري ونت نايم يشوتك علشان تقوم من النوم . واللي يقولي ترى بيخلونك اسفل السافلين يذلونك مدري ايش .. بصراااحه يرفعون المعنويات
الحمدلله اني انا من النااس اللي ما يتأثر بهرجهم هذا.. لاكن اللي مخليني اشيل هم مسألة الاغراض لو رحت بكرة وعلي ثوب وشماغ ولا جيبت معاي الاغراض هل بيعطوني ورقة فيها الاغراض وروح اشريها ورجع لهم او بيقولون ليش ماجبت وليه وليه لان ماحد قالي جيب اغراض