اقتباس:
المشاركة الأصلية كتبت بواسطة انآآ غيير
هو قالي انه اتفق مع ناس ينزلون له دعايه في 40منتدى عن العطورات حقته وعن بخوري
مابيقدم لي شي بس قال انه اكيد اذا نجحت الدعايه وجاته طلبات بيطلب مني اجهزها له طبعا بالسعر الي ابيعه منه دايم
|
دعاية إلكترونية بإمكانك انتي بنفسك تسوينها والمقصد هنا انها مو حملة متكاملة او تسويق خارج النت او غيرها من المعاني ، لكن دامه بيكفيك التعب وبيكفيك النسخ واللصق من منتدى لمنتدى توكلي على الله ووافقي ولانتي بخسرانة شي ان شاء الله ... حال موافقتك على العرض اختي الكريمة انتي تحولتي من تاجرة الى موردة بمعنى انك توفرين له بالجملة وهو عليه التصريف ، ومن واقع تجربة في مجال قريب من مجال عملك اقولك ان وضعك الحالي كموردة جملة افضل بمراحل من انك تتعبين بالقطاعي وارسال لهذا او لذاك ومناحلة مع شركات الشحن ومتابعة مع العميل و و و غيرها من مراحل البيع الإلكتروني بالقطاعي ...
بما انه الرجل مابيستخدم اسمك في البيع ، بيكون مجرد بايع لمنتجك .. يحق له انه يعلن عن المنتج دون الرجوع اليك بالوسيلة اللي يراها مناسبة .. على سبيل المثال : المطابخ اللي تعلن عن وجبات غداء او غيرها ، تلاقين في المنيوهات او في اعلاناتها اسم البيبسي او الكولا بدون ماترجع للشركة .. ليش ؟؟ لانها بمجرد تنزيلها لهالبضاعة من الشركة يحق لها انها تصرفها وتستخدم الوسائل اللي تساعدها على تصريفها بالطريقة المناسبة .. ويحق لها استخدام مسماها فيما يساهم بتصريفها بطريقة اسرع .. لانه اولاً واخيراً مكسبها في بيعها مو في بقائها مجمعة عندها ..
اتفقي مع الرجال على انه يسحب منك بالجملة .. بمعنى صرفي عليه بالدرزن .. وافتحي لنفسك منافذ اخرى .. اتفقي مع غيره على التصريف بالجملة .. وإبقي على التصريف القطاعي لحين تلاقين ان التصريف بالجملة اصبح يغني تماماً عن التصريف بالقطاعي اوقفيه وحولي زبائن القطاعي على الموزعين او تجار التجزئة ..
ايضاً بما انه الرجل شاري مثل مايقولون ومتحمس للبضاعة ولتصريفها لاتشرطين عليه نسبة .. بدل ماتأخذين .. اعطيه .. قولي له في الشهر الواحد اذا وصلت طلباتك 12 درزن على سبيل المثال .. لك 3 درزن مجاناً .. اوزنيها باللي يناسبك ويغطي ربحك .. بهالشكل تغرينه انه يصرف اكبر عدد ممكن .. وتجبرينه هو او غيره من التجار انه يركز على تصريف منتجك .. ليش ؟؟ اذا كان مكسبه في الدرزن المدفوع 10% من قيمة التكلفة على سبيل المثال .. مكسبه مع الدرازن المجانية في حال تحقيقه للتارقت بيكون 100% .. يعني بيجبر نفسه انه يبيع اول بأول من منتجك بس عشان يوصل للمجاني واللي بيحقق منه ربح طيب ..
اما إذا تطلبتي منه من الحين وابي 5% ولا 10% وابي اسمي اجباري بكل اعلان وابي وابي .. التاجر بياخذ منك مابيقول لا .. لكن بمجرد مايلقى جهة شغلها مقارب لشغلك ومالها شروط مثل شروطك بيقول لك لو سمحتي اطلعي مع اقرب مخرج وبيتعامل مع غيرك ..
دائماً الإغراءات تُنمي وتزيد والتشرطات تُنقص وتزيل..
اولاً واخيراً هي وجهة نظر فإن ناسبتك خذي بها وإن ماناسبتك خذي اللي يفيد واتركي الباقي
اقتباس:
المشاركة الأصلية كتبت بواسطة انآآ غيير
هذا انا جاوبت عطنا الي عندك  |
اسئل الله لك ولنا وللجميع التوفيق ...