خذني بحضنك برد ولمّني بشويش قوّه
بعثر اجوائي وشب الشوق في كل الحنايا
سو فيني يا نديمي كل شيٍ ما تسوّه
جيتك وكلّي ذنوب ولمّتك تغفر خطايا
والله اني فيك ذايب والغلا مشبوب ضوّه
والمشاعر دون غيرك جاتك جيوش وسرايا
خلّنا ننسى المكان بكل تفاصيله وجوّه
خلّني ما اشوف غيرك في البشر وانته معايا
خلّني وابل سحابك وانت يا المضنون نوّه
خلّني جنة سماك وخّلك في جنة سمايا
خلّني سلطان شعرك وانت في شعري فتوّه
خلّني شاعر جنونك واستقي منك السقايا
يا سمو الحب تدري لبى قلبك يا سموّه
عمري ما تمنيت غيرك واقسمك رب البرايا
يا سمو العشق حلّق لين ما توصل علوّه
حب سامي حب طاهر حب تحلمه الصبايا
حب فيه الشك زايل والزعل غادي عدوّه
لا فراق ولا خصام ولا جروح ولا شظايا
حب فيه الورد يضحك شفت كيف الورد توّه
يبتسم يمزح ينكّت والسبب طيب النوايا
حب مثل الطفل يكبر ويتبختر في نموّه
عيد ميلاده لقانا وفرحة اللقيا هدايا
شي رقّه شي طيبه شي فتنه شي مروّه
والله اشياءك كثيره كثر ما بدمّي خلايا
فيك نخوّه وفيك ذمّه فيك حب وفيك خوّه
فيك من كل الصفات وفيك من كل المزايا
خل حسادك يقولوا زاد خالد في غلوّه
حقّك وحقّك وحقّك دام متربع حشايا
ودامني لا جيت حضنك لمّني بشويش قوّه
ليش ما اهديك المشاعر وانزلك وسط الحنايا!
منقول