بعد التحيه ,,, في البداية اعتذر لأني كنت مشغول الفتره الي راحت وماقدرت ادخل النت ...

البعض شكك في اني سعودي واقوله ( اسمي عبدالله العتيبي ) وما اعتقد فيه اجنبي مثل اسمي

البعض شكك في اني اشجع على الزواج من برا السعوديه واقوله ( ياليت تقرا موضوعي بتروي ) بالنسبه لي شخصيا شعره من البنت السعوديه تسوى كل بنات حواء
يابنات بلدنا الله يخليكم لأهلكم ويستر عليكم احنا مالنا غيركم وانتم كذلك عشان كذا اقول لكم خلوكم واقعيات شوي

لأن احيانا تحطوننا يالشباب قدام أمرين احلاهم مر وهي
يا انك تتزوج اجنبية وتستر نفسك مع انك غير مقتنع يعني فيه رفض نفسي من البدايه وبقولكم شي

الشباب الي يقولون يبون يتزوجون اجنبيات انا اقولكم تراهم كذابين يبون يجننونكم بس وانتم تعرفون مزح الشباب والبنات دايم يجننون بعض

الامر الثاني والعياذ بالله هو طريق الحرام عافانا الله واياكم منه ومافي احد بيختار هالطريق اذا يبقى الطريق الاول

انا بحكي لكم قصتي

انا شاب تخرجت من الجامعه وتوظفت وراتبي بالضبط 7800 ريال اوكي , اسمعوا واحكموا بأنفسكم

مهر البنت مائة ألف ريال اوكي مع القصر انتم وانا نعرف كم تكلفة القصور

والمضحك المبكي بنفس الوقت المسألة ما انتهت هنا ووبس لا لسى باقي حاجات كثيره

شهر العسل وما ادراك ماشهر العسل هههههه لازم برنامج سياحي ومحدده هي بعد تبي ماليزيا واندونيسيا
على قولتها ( وش معنى انا من بد صديقاتي ) المهم مالكم بالطويله رحت للطيار حق السفر والسياحة

وسألت عن البرنامج المهم جلس يحسب وقالي وهو مبتسم بعد يعني بكل برود راح يكلفك 50 الف ريال مدة شهر

35 الف ماليزيا و 15 الف اندونيسيا ( شر البليه مايضحك ) وياليت الموضوع انتهى عند كذا ووبس

ثاني يوم من الزواج عشان ام العروس تكشف عن وجهها لا زم تعطيها 10 الاف ريال ؟؟؟

وهذي فرصه استغلها وبقولها لخالتي ههههه من قالك اني ابيك تفتشين لي ؟؟؟ عمرك مافتشتي

عشان تفتشين لازم 10 الاف ؟؟؟ سلامات وش تحسين فيه انتي ؟؟؟ لو طلبت عشاء في مطعم راقي في بيروت

مع هيفاء وهبي والله العظيم بعد التنسيق مع مدير اعمالها ما يكلف قيمة كشف وجه ام العروس ههههههه

وياليت كذا ووبس خلصنا من امها نجي لجدتها لازم ذهب ؟؟؟ سلامات بتزوج العائله الكريمه كلها انا ؟؟

انا اقول لكم مابي اشوف خالتي ولا امها الي هي جدة العروس بكيفي مابي اشوفكم ( تقريبا 15 الف عشان اشوفكم ) انا متنازل مابي اشوف احد .. خلصنا من موضوع اهلها نجي لموضوع السكن

تقول البنت ( انا مو ناقصه عشان اسكن بشقه او دور بغرب او جنوب او شرق الرياض )

المصون تبي دور شمال الرياض ولا بعد مو شقه تبي دور هههههههه صرت الوليد بن طلال انا مو عبدالله

سلامات من وين لي المبالغ هذي كلها ؟؟؟؟ احد قالك اني سارق بنك ؟؟؟ او احد قالك ان عندي بالبيت غرفه

مليانه ذهب ؟؟؟؟ يابننننننات بلا هبال بلا جنان من جد تخلون الانسان يفقد عقله ؟؟؟

روقونا شوي وخلوكم واقعيات شوي حتى لو بغيت اخذ قروض ما قدرت اغطي حتى قيمة وجه امها وجدتها هههههه
اخذ 15 الف واجلس اقسطها خمس سنوات وسبب القرض وجه ام العروس وجدتها ههههههههه
( شر البليه مايضحك )

الفكره الي ابي اوصلها ,,, احنا عيال بلد واحد يعني لاوم نحس ببعض ونوقف مع بعض ونساند بعض

ولا نستهبل على بعض بمبالغ خياليه ,,, فهمتوا ياشطورات؟؟؟

واحد من الشباب معلق على موضوعي يقول ( يارجال السعوديه تستاهل ) وابي اقوله

هل عندي شي وانا مخبيه عنها ؟؟؟؟ انت نفسك اتحداك توفر المبالغ هذي كلها في حاله انك مثل وضعنا

تخرجت من الجامعه وتوظفت مثل بقية الخلق يمقن ابوك الله يحفظه يدعمك يمقن لا ((( ههههه مزحه بسيطه )))

المهم لا تقولون فيه عنوسه وكذا .. لازم تتغير الجمله هذي لـ (( فيه استهبال من بناتنا )))

وعلى العموم انا اسف اذا كان فيه خطأ بكلامي

وعشان كذا قلت لكم بداية الموضوع قيمة مهر البنت قيمة فله