ايامنـا والليالـي كــم نعاتبـهـا
شبنا وشابت وعفنا بعض الاحوالـي
تاعـد مواعيـد والجاهـل مكذبهـا
واللي عرف حدها من همهـا سالـي
ان اقبلت يـوم ماتصفـي مشاربهـا
تقفي وتقبل وما دامت علـى حالـي
فـي كـل يـوم تورينـا كبايبـهـا
واليوم الاول تراه احسن مـن التالـي
ايـام فـي غلبهـا وايـام نغلبـهـا
وايام فيهـا سـوى والدهـر ميالـي
جربت الايام ومثلـي مـن يجربهـا
تجريب عاقل وذاق المـر والحالـي
نضحك مع الناس والدنيـا نلاعبهـا
نمشي مع الفي طوع حيـث مامالـي
كم مـن علـوم وكـم اداب نكسبهـا
والشعـر مـازون مثقـال بمثقالـي
اعرف حروف الهجا بالرمز واكتبها
عاقل ومجنون حاوي كل الاشكالـي
لكن حظـي ردي والـروح متعبهـا
مافادني حسن تأديبـي مـع أمثالـي
ان جيت ابي حاجة عـزت مطالبهـا
العفو ما واحد في النـاس يـا والـي
قـوم ليـا جيتهـا رفـت شواربهـا
بالضحك وقلوبها فيها الـردى كالـي
وقوم ليا جيتهـا صكـت حواجبهـا
وابدت لي البغض في مقفاي واقبالـي
ما كني الا اسموي حـال مغضبهـا
والكل في عشرتـه ماكـر ودجالـي
يا حيف تخفىامور كنـت حاسبهـا
والاهل واصحابنا والـدون والعالـي
والروح وش عذرها في ترك واجبها
راح الحسب والنسب في جمع الاموالي
نفسي تبى العز والحاجـات تغصبهـا
ترمي بهـا بيـن اجاويـد وانذالـي
المال يحيـي رجـال لاحيـاة بهـا
كالسيل يحيي الهشيم الدمـدم البالـي
عفت المنازل وروحي يـوم اجنبهـا
منها غنيمة وعنها البعـد اولـى لـي
لاخير في ديرة يشقى العزيـز بهـا
يسشي مع الناس فـي هـم واذلالـي
دار بهـا الخـوف دوم مـا يغيبهـا
والجوع فيها ومعها بعض الاحوالـي
جوعى سراحينهـا شبعـى ثعاليبهـا
الكلـب والهـر يقـدم كـل ريبالـي
عز الفتى راس ماله مـن مكاسبهـا
يا مرتضي الهون لا عز ولا مالـي
دللت بالروح لين ارخصـت جانبهـا
وانا عتيبي عريـب الجـد والخالـي
قوم تدوس الافاعـي مـع عقاربهـا
ولها عزايـم تهـد الشامـخ العالـي
خل المنازل غـراب البيـن يندبهـا
يبكي عليهـا بدمـع العيـن هطالـي
لاتعمـر الـدار والقـلات تخربهـا
بيع الردي بالخسارة واشتـر الغالـي
ماضاقت الارض وانسدت مذاهبهـا
فيها السعـة والمراجـل والتهفلالـي
دار بدار وجيران بجيـران نقاربهـا
وارض بارض واطلال بـا طلالـي
والناس اجانيب لين انـك تصاحبهـا
تكون منهـم كمـا قالـوا بالامثالـي
الارض لله نمشـي فـي مناكبـهـا
والله قـدر لـنـا ارزاق واجـالـي
حـث المطايـا وشرقهـا وغربهـا
واقطع بهـا كـل فـج دارس خالـي
واطعن نحور الفيافـي فـي ترايبهـا
وابعد عن الهم تمسي خالـي البالـي
من فـوق عمليـة تقطـع براكبهـا
فدافـد البيـد درهــام وزرفـالـي
تبعدك عـن دار قـوم ودار تقربهـا
واختر لنفسـك وللمنـزال منزالـي
لو مت فـي ديـرة قفـرا جوانبهـا
فيها لوطي السباع الغبـس مدهالـي
اخير من ديـرة يجفـاك صاحبهـا
كـم ذا الجفـا والتجافـي والتعلالـي
دوس المخاطر ولا تخشـى عواقبهـا
تسعى على الرزق ماحـت للاشبالـي
والشمس في برجها والغيـم يحجبهـا
قفي وتقبل لها في العـرش مجدالـي
رب السماوات يامحصـي كواكبهـا
يا مجري السفن في لجات الاهوالـي
ضاقت بنا الارض واشتبت لهايبهـا
والغيث محبـوس يـارزاق ياوالـي
يالله مـن مزنـة هبـت هبايبـهـا
رعادها بات له في البحـر زلزالـي
ريح العوالي مـن المنشـا تجاذبهـا
جذب الدلي من جبا مطويـة الجالـي
ديمومـة سبلـت والاخـت ذوايبهـا
وانهل منها غزيـر الوبـل همالـي
تسقي ديار شديـد الوقـت حاربهـا
ما عاد فيها لبعض النـاس منزالـي
يا جاهـل اسمـع تماثيـل مرتبهـا
فيها معانـي جميـع القيـل والقالـي
مثل المحابيـب زادت فـي قوالبهـا
في صرفها زايدة عن قرش وريالـي
يـارب توبـه وروحـي لاتعذبهـا
يوم القيامـة اذا ماضاقـت اعمالـي
وازكي صلاتي على المختار واوهبها
شفيعنا يـوم حشـر فيـه الاهوالـي





مهم للغايه
https://www.btalah.com/t48727.html