من اللي يقول ان الدوام 12 ساعه ؟
ومن اللي يقول لك انه في تنقل بين مدينه لمدينه ؟

ياخوان أولاً الدوام الاساسي 8 ساعات فقط
الا
اذا كنت انت تبي دوام اضافي واوفر تايم

واحتمال يكون اقل يعني يمكن تداوم ساعتين وتطق كرتك وترجع لبيتكم
اذا انت مضبط وضعك مع اخوياك ومنسق معهم
لكن نظاماً 8 ساعات فقط

ومعك يومين راحه بالاسبوع
واحياناً اذا صادف ايام الاوف عندك الثلاثاء يكون معك راحه الى يوم السبت يعني يصير معك اربع الى خمس ايام


الشي الثاني مافي تنقل بين المدن
لأنهم موزعين الموظفين كلاً على حسب منطقته من اول ماقبلوهم
وماتقدر تداوم بمنطقه ماهي منطقتك اللي قدمت فيها !

و معروف ان قطاع الامن الصناعي بالمملكه ينقسم الى اربع مناطق فقط
1/ إدارة الامن الصناعي بالشرقيه
2/ إدارة الامن الصناعي بالوسطى
3/ إدارة الامن الصناعي بالغربيه
4/ إدارة الامن الصناعي بالجنوبيه

وكل منطقه لها اداره مستقله يكون التقديم عن طريقها

اما انا ابتكلم عن منطقة الرياض بما انني مقدم فيها وقبلوني ولله الحمد
طبعاً موزعين كل موظف من جهه من جهات الرياض لمحطه معينه تكون قريبه منه
اضرب لك مثال حصل معي شخصياً
وزعو دفعتنا قسمين
قسم سكان شمال وشرق الرياض
وقسم سكان جنوب وغرب الرياض
وقالو القسم الاول راح يداومون بالمحطه اللي على طريق الدمام بما انها قريبه لشرق وشمال الرياض
والقسم الثاني راح يداومون بالمحطه اللي على طريق الخرج والمحطه اللي بالدخل المحدود بما انها قريبه لهم ايضاً

وبالنسبه للي يتنقلون للمناطق النائيه هم طالبينها واصلاً المناطق النائيه مرغوبه جداً وعليها طلب من الموظفين أنفسهم
لان فيها مميزات كثيره من ضمنها زياده بالراتب ..

اتمنى اني وضحت بعض النقاط .
وارجو من الاخوه الاعزاء المشاركه بما يخص شركة الكهرباء فقط و الامن الصناعي تحديداً
لضمان وصول الفائده للجميع
وعدم تشتيت الأفكار على المتلقي ..