[align=center]
السلام عليكم ورحمة الله وبركاته

الحمدالله انجزت وانتهيت من مؤسسة مقاولات وتم استلام الفيز


الإجراءات خطوة بخطوة وبشكل سريع كالتالي :

أولا قررت أخيراً إني أفتح المؤسسة ورحت أدور محل طبعا المحل لازم يكون 24م
يعني 4 في 6 والحمدالله لقيت محل أجاره 8 ألاف دفعت 4 الاف حقة 6 شهور
وفتحت سجل تجاري عن طريق موقع وزارة التجارة والصناعة وعطوني رقم قالو سدد عن طريق الصراف 1000 ريال
رحت وسددت والوزارة أرسلت السجل على أرامكس مدري الدي اتش ال (ماذكر)
المهم أخذت السجل ورحت الغرفة التجارية وسويت اشتراك للمؤسسة بـ900 ريال
بعدها رحت سويت لوحة للمحل متر في متر واثثت المكتب كلفني الأثاث تقريبا 2200
بعدها اتجهت للبلدية وقدمت على الرخصة طبعا تختلف الشروط من بلدية الى بلدية أخذو اوراقي وجاني المساح بعد يومين ووقع
وقال خلاص رح سدد 120 ريال وبعدها استلم الرخصة رحت وفعلاً استلمتها
وجاء دور التأمينات والسعودة قلت في نفسي مالي الا الوالدة الله يطول بعمرها أسجلها كموظفة وفعلا رحت للتأمينات وقدمت أوراقي وقالي الموظف بعد يومين ادخل الموقع وسجل بيانات المؤسسة وأضف الموظف السعودي اللي عندك
المهم بعد اسبوعين تقريبا وانا رايح جاي عندهم انتهيت من غثاهم وموقعهم المعقد واستلمت شهادة التأمينات
بعد كذا أخذت أوراقي ورحت لمصلحة الزكاة والدخل وقدمت أوراقي وسلموني اليوم الثاني شهادة الزكاة
وهنا جاء دور مكتب العمل للتقديم على تأشيرات عماله (وهي الزبده كلها ) فيه معقبين عند مكتب العمل يسويلك اوراقك زين ويحطها بملف وانت عليك التقديم
أول شي فتح ملف في الحاسب الآلي اللي هي في ثاني صالة اخذت رقم وانتظرت جاء دوري عطيتهم ملفي وقال تعال بعد يومين
جيتهم بعد يومين وعطاني رقم الحاسب الآلي اللي هو رقم ملفي عندهم
وبعدها اتجهت للتقديم للاستقدام اللي هي الصالة الثالثة أخذت رقم (الساعة 7 صباحا) وانتظرت جاء دوري الساعة 11 قبل الظهر
عطيته الملف والأوراق كاملة وقالي ما راح نعطيك إلا 3 فيز وجنسيات مختلفة والمهن سباك وكهربائي ودهان
طبعا انا في هذه اللحظة كنت في قمة التعب من قوة وكثرة الاجراءات والتعقيد والمشاوير واللطعات الطويلة
فقلت لهم عطوني أي شي المهم اطلع بنتيجة قال خلاص رح سدد 6000 ألاف وتعال بعد يومين استلم الفيز
وفعلا جيتهم بعد يومين وأخيراً استلمت الفيز وانا كلي فرحة حسيت اني استلمت شهادة دكتوراة وســــــــــــلامـــــــــــــــتـــــــــــكـــــ ـــــــم


طبعاً بما أني أنا بنفسي اللي قمت بالمشاوير والزحمة هذي كلها لذالك
خذت معي تقريبا اربعة شهور عشان دوامي أحيانا ماكان يسمحلي
وأيضا الاجراءات الحكومية الحلوة (تعال بعد يومين بعد أربعه أيام الأسبوع الجاي)


أي سؤال حول الاجراءات أنا حاضر..


ألحين وبصراحة أبي مشورتكم هل استمر في هذا المجال ولا أبيع الفيز وأشوف لي مشروع ثاني
لاني بصراحة ماأفهم في المقاولات كثير وحتى لو افهم ماعندي إلا هالثلاث عمال


والمعذرة عالاطالة وأتمنى المشوره الطيبة
[/align]