السلام عليكم ورحمة الله وبركاته . . .
وبعد :
تقدمت للمكتبية عن طريق الايميل بطلب وظيفه مؤقته لديهم . وتم الأمر واتصلوا علي من الادارة بالرياض وتم تحديد موعد المقابله في جده شارع الامير سلطان . .
المهم عدت الأمور على خير وتم توقيع العقد على اني مشرف مبيعات بقسم كتب الحاسب الآلي . . وبراتب 3477 و 33 هلله . خخخخخخ هلله تنطح هلله قبل الريال . .
وتم تحديد على اثرها موعد البدء في العمل .
المهم تفاجأت بأول يوم لي في المكتبه بأن المدير يسولف مع كاشير هندي واسمه جعفر والظاهر ان الهندي اقدم من المدير (( قسم بالله شخصية الهندي روعتني أكثر من المدير))
المهم وقال المدير روح لقسمك وانا ماشي الا والهندي يقول : ليش ما نجربه كاشير
المدير : ياشيخ يمكن يروح وما يرجع مثل الشباب السعوديين اللي رفضوا قبله واتركوا الوظيفه . .
الهندي : طيب هو مامعه صورة من العقد عشان يقولك لا .
( طبعا أبو هنود مسوي ذكي وما يدري ان ولد عمي مدير مكتبة العبيكان في المدينه المنوره )
المهم قال المدير خلاص تعال يا محمد وروح اليوم بس كاشير جرب هالشغله .
وقلت طيب نجرب وش ورانا اخذت فيها اسبوع لطعه . وشفت انه زودها ورحت له وقال غيروا له (( يقصد جعفر )) . . ياحظك ياجعفر المدير ياخذ رأيك . .
المهم غيرت محلي وحطني خدمات عملاء ونفس القصه راح اسبوع وانا عليها تقول محد يبيني كلن يصرفني من عنده . .
المهم فاتحت المدير بالعقد اللي بيني وبينه وقال . . .
انت موقع على العقد انك موافق على اي شغله . وقلت له : لا والف لا والله اني موقع على مشرف مبيعات . .
وقال عطني صورة العقد . . هنا انا قلت ابشر . وجلس يضحك . . وقال تدري لك شهرين تداوم عندنا وانت اصلا ما انت رسمي . (( شوفوا القذر تعبني شهرين وانا ما وراي الا الوالده وإخواني الصغار )) اطلع بدوامين من صباح الله وما ارجع الا الساعه 11.30 وهذي آخرتها من ابن البلد . .
طلعت من عنده واتصلت على ذيباااان (( مدير فرع المكتبة في المدينه )) . .
وعطيته السالفه وقلت له بس بشرط اذا بتخدمني وقال ابشر بعزك . .
قلت ابي اذا تعرف احد في الاداره يرسل صورة من العقد اللي باسمي وفعلا والله جابه . .
المهم قلت له ابيها موجهه بفاكس مع التظلم اللي ارسلته لك انا ضد المكتبه لفلان شغال في حقوق الانسان . . . وقال تمـ
وطبعا انا صورت نفسي يوم كنت كاشير ومبين نفسي زعلاان . .
وصورت نفسي وانا جالس عند الهنود في خدمة العملاء . .
وصورت العقد والتوقيع على كلمة مشرف مبيعات . .
وحطيتها كلها في ورقه وحده تظلم مرفق معه الصور . .
والرجال ما قصر ارسل كل شي واتصلوا علي جمعية حقوق الانسان ورحت لهم وشرحت لهم كل شئ . .
وتم فتح التحقيق مع المدير . . ويده اليمنى جعفر . . وطالبوا المكتبه براتب أربعة أضعاف عن كل شهر . . وإلا ستقدم اوراقها مبينة فيه مخالفة المكتبة في نظام التوظيف وكذلك التلاعب بالموظفين وجهدهم واستغلاله في تحقيق مصالحهم دون حفظ حقوقهم . .
وإلى الحين انتظر نهاية القضيه وعسى خير ان شاء اللهــ
إخواني والله هالقصه اللي صارت لي حقيقة وليست من باب المبالغه واللي يقراء موضوعي من أوله الى آخره وما دخل الموضوع راسه . .
يروح سيده لمكتبة العبيكان ويشوف كم سعودي شغال هنااك (( طبعاً من غير المدير )) . .
اذا لقيتم احد غيره ابشروا بالحقوق . .
وبس اسألوا ليش السعوديين اذا توظفوا عندهم يتركونها . .
ولكن انا سأكون اطيب من هالمدير الخائن ولا راح ادعي عليه لأنه يجي بتاكسي ويرجع بيته بتاكسي . . هذي تكفيه . . والله يسامحهـ . .
دعوااتكم . . .